చిన్నారులు ఎత్తు ఎదగడానికి వ్యాయామం ఎంతవరకు హెల్ప్ అవుతుంది? ఏయే వ్యాయామాలు చేయడం బెటర్
చిన్నారులు ఎత్తు పెరగడానికి వ్యాయామం కొంతవరకు సహాయపడుతుంది. అయితే, ఇది పూర్తిగా వ్యాయామం మీద మాత్రమే ఆధారపడి ఉండదు. కాకపోతే జన్యుపరమైన అంశాలతో పాటు ఎదిగే వయస్సులో ఫిట్‌గా ఉండటం వారి ఎత్తును ఎక్కువగా నిర్ణయిస్తాయి.
పిల్లలు ఎత్తుగా కనిపించాలనే చాలా మంది తల్లిదండ్రులకు ఉంటుంది. పిల్లల్లో కూడా తాము ఎత్తుగా ఉండాలనే కోరిక బలంగా ఉంటుంది. అయితే ఎదిగే వయస్సులోనే సరైన వ్యాయామాలు చేయడం వల్ల శరీరాన్ని సాగదీయవచ్చు. ఇది కండరాలను బలపరిచి, మంచి భంగిమను అలవాటు చేయొచ్చు. మరి, ఎత్తు ఎదగడానికి తోడ్పడే వ్యాయామాలు ఏంటో ఒకసారి చూసేద్దామా?
వ్యాయామం శరీరంపై ఎలాంటి ప్రభావం చూపిస్తుంది:
శరీరంపై ప్రభావం చూపిస్తూ ముఖ్యంగా బరువు మోసే వ్యాయామాలు, సాగదీసే వ్యాయామాలు ఎముకలతో పాటు కండరాలను బలపరుస్తాయి. ఇది మంచి షేప్‌తో ఉండటానికి సహాయపడుతుంది. తద్వారా పిల్లలు నిటారుగా నిలబడి కొంచెం పొడవుగా కనిపించవచ్చు. అధిక తీవ్రత కలిగిన కొన్ని రకాల వ్యాయామాలు శరీరంలో వృద్ధి హార్మోన్ విడుదలను ప్రేరేపిస్తాయి. ఈ హార్మోన్ పిల్లల ఎదుగుదలకు చాలా ముఖ్యమైనది. అయితే, వ్యాయామం ద్వారా విడుదలయ్యే హార్మోన్లు చాలావరకూ జన్యుపరమైన పరిమితులను అధిగమించలేదు.
ఎత్తు ఎదగడంలో తోడ్పడే అంశాలు:
- ఎత్తు ఎక్కువగా జన్యుపరంగా మాత్రమే ఏర్పడుతుంది. కేవలం దానికి శరీర వ్యాయామం తోడ్పడుతుందంతే.
- సరైన పోషకాహారమైన (ప్రోటీన్లు, కాల్షియం, విటమిన్లు) పిల్లల ఎదుగుదలకు చాలా ముఖ్యం. వీటితో పాటుగా శరీరానికి తగినంత విశ్రాంతి, మనస్సుకు తగినంత ప్రశాంతత కూడా వృద్ధి హార్మోన్ విడుదల కోసం అవసర పడుతుంది.
- బరువులెత్తడం వల్ల ఎత్తు ఎదగరనే అపోహ చాలా మందిలో ఉంది. కానీ, సరైన పర్యవేక్షణలో బరువులు ఎత్తడం వంటివి చేస్తే పిల్లల ఎదుగుదలను ఆపలేరు. వాస్తవానికి, ఇది కండరాలు, ఎముకలను బలపరుస్తుంది.
కాబట్టి, వ్యాయామం అనేది పిల్లల ఆరోగ్యానికి, వారి పూర్తి ఎత్తును చేరుకోవడానికి సహాయపడుతుంది. కానీ కేవలం వ్యాయామం ఒక్క దాని మీదే ఆధారపడి వారి తుది ఎత్తును నిర్ణయించలేరు. జన్యువులు, పోషకాహారం, నిద్ర కూడా ఇందులో ముఖ్యమైన పాత్ర పోషిస్తాయని గుర్తుంచుకోవాలి. మీ పిల్లల సరైన ఎదుగుదల గురించి మీకు ఆందోళన ఉంటే, డాక్టర్‌ను సంప్రదించడం ఉత్తమం.
క్రమం తప్పకుండా వ్యాయామం చేయడం వల్ల పిల్లల మొత్తం ఆరోగ్యం మెరుగుపడుతుంది. ఇది మంచి నిద్రకు, ఆరోగ్యకరమైన బరువుకు, సరైన పోషకాల శోషణకు సహాయపడుతుంది. ఇవన్నీ సరైన ఎదుగుదలకు అవసరం. మీరు కూడా మీ పిల్లలను ఎత్తు ఎదిగేందుకు ప్రయత్నించమని చెబుతూ ఉంటే, ఇదిగోండి ఈ ఎక్సర్ సైజుల మీద ఫోకస్ పెట్టమని చెప్పండి.
ఎత్తు పెరగడానికి సహాయపడే కొన్ని వ్యాయామాలు:
- ఒక బార్‌ను పట్టుకుని వేలాడటం అనేది శరీరాన్ని వదులుగా వేలాడదీసి వెన్నెముకను సాగదీస్తుంది.
- కోబ్రా స్ట్రెచ్‌లో బోర్లా పడుకుని, అరచేతులను నేలపై ఉంచి, ఛాతీని పైకి లేపడం వల్ల వెన్నెముక సాగుతుంది.
- పిల్లి-ఆవు భంగిమలో నాలుగు కాళ్ళపై ఉండి, వెన్నెముకను పైకి వంచడం, కిందికి దించడం వంటివి చేయాలి.
- ఫార్వర్డ్ స్పైన్ స్ట్రెచ్‌లో కూర్చుని కాళ్ళు చాపి, ముందుకు వంగి కాలి వేళ్ళను తాకడానికి ప్రయత్నించడం.
- సైడ్ స్ట్రెచ్‌లో నిలబడి ఒక చేయి పైకెత్తి, వ్యతిరేక దిశలో వంగాలి.
- లెగ్ స్ట్రెచ్‌లో కూర్చుని కాళ్ళు చాపి, చేతులతో కాలి వేళ్ళను తాకుతుండాలి.
- పెల్విక్ షిఫ్ట్‌లో నేలపై పడుకుని మోకాళ్ళు వంచి, నడుము భాగాన్ని పైకి లేపడం.
- పప్పీ పోజ్‌లో నాలుగు కాళ్ళపై ఉండి, చేతులను ముందుకు చాచి ఛాతీని నేలకు ఆనించడం చేస్తుండాలి.
- మౌంటెన్ పోజ్‌లో నిటారుగా నిలబడి, చేతులను పైకెత్తి సాగదీయడం వంటివి చేయాలి.
బరువు మోసే వ్యాయామాలు:
వీటితో పాటుగా జంపింగ్ జాక్స్, స్కిప్పింగ్, బాస్కెట్‌బాల్, వాలీబాల్, సింగిల్ లెగ్ హాపింగ్, స్క్వాట్ జంప్స్, ఈత కొట్టడం, ల్యాండ్ స్విమ్మింగ్ లేదా ఆల్టర్నేట్ లెగ్ కిక్, బోర్లా పడుకుని కాళ్ళు చేతులను ఈత కొట్టినట్లు కదిలించడం వంటివి కూడా ఉపయోగకరంగానే ఉంటాయి.
యోగా ద్వారా హైట్ ఎదగడం
యోగా చేసి హైట్ ఎదగాలని కోరుకునే వాళ్లు కోబ్రా పోజ్, ట్రయాంగిల్ పోజ్, వృక్షాసనం, పిలేట్స్ రోల్ ఓవర్ వ్యాయామాలు వెన్నెముకను సాగదీయడానికి, కండరాలను బలపరచడానికి మంచి భంగిమను కలిగి ఉండటానికి సహాయపడతాయి. అయితే సరైన పోషకాహారం, తగినంత నిద్ర కూడా ఎదుగుదలకు చాలా ముఖ్యం.
టాపిక్