ఇంట్లోనే మ్యాంగో ఫ్రూటీ తయారు చేయాలనుకుంటున్నారా? ఇదిగోండి సింపుల్ రెసిపీతో ఇలా ట్రై చేసేయండి!

సమ్మర్ వచ్చేసింది, స్పెషల్ అండ్ కింగ్ ఆఫ్ ద ఫ్రూట్ అయిన మ్యాంగోలు మార్కెట్లోకి వచ్చేశాయి. అయితే ప్రతిసారీ నేరుగా మామిడిపండునే తింటే ఏం బాగుంటుంది. ఈ సారి ఫ్రూటీ స్టైల్లో కూడా ఎంజాయ్ చేసేయండి. పిల్లలు బయట దొరికే ఫ్రూటీ కావాలని అడిగినా, మీరిలా ట్రై చేసిచ్చేయండి. బయటదొరికే ఫ్రూటీకి బైబై చెప్పేయండి! మరింకెందుకు ఆలస్యం పది నిమిషాల్లో తయారుచేసుకోగల ఫ్రూటీ రెసిపీ చూసేద్దామా..

మ్యాంగో ఫ్రూటీ తయారు చేయడానికి కావల్సిన పదార్థాలు:

• బాగా పండిన మామిడి పండ్లు- రెండు(బంగినపల్లి)(మూడు కప్పుల ముక్కలు)
• దోరగా పండిన మామిడి పండు- ఒకటి(తోతాపురి)
• చక్కెర- రెండు కప్పులు (రుచికి తగినంత)
• నీరు - లీటరన్నర
• మ్యాంగో ఎసెన్స్- పావు టీ స్పూన్

ఇంట్లోనే మ్యాంగో ఫ్రూటీ మేకింగ్:

1. ముందుగా రెండు పండిన బంగినపల్లి మామిడి పండ్లను బాగా కడుక్కోండి.
2. వాటిని చెక్కు తీసి చిన్న చిన్న ముక్కలుగా చేసుకోవాలి.
3. ఇప్పుడు తోతాపురి మామిడి పండు తీసుకుని దానిని కూడా చిన్న ముక్కలుగా చేసుకోండి.
4. చెక్కు తీసి చిన్నగా కట్ చేసుకున్న మామిడికాయ ముక్కలన్నింటినీ కుక్కర్లో వేయండి.
5. అందులోనే పంచదార వేసి సరిపడినన్ని నీళ్లు పోయండి.
6. ఇప్పుడు ఆ కుక్కర్ ను స్టవ్ మీద ఉంచండి.
7. ఐదు విజిల్స్ వచ్చిన కుక్కర్ ను కిందకు దింపి మామిడి ముక్కలను మెత్తగా గుజ్జుగా అయ్యేంత వరకూ మెదపండి.
8. గుజ్జును వడకట్టి మిగిలిన పిప్పిని పారేయాలి.
9. ఈ స్టేజ్ లో ఒక్కసారి మామిడి గుజ్జు తీపిని పరీక్షించండి. రుచికి తగ్గట్టుగా తియ్యదనం లేకపోతే మెత్తటి పొడిగా ఉన్న పంచదారను కలుపుకోవాలి.
10. కొందరు తియ్యదనాన్ని ఎక్కువ తీసుకోవాలనుకుంటే, మెత్తటి పిండిగా మార్చుకున్న చక్కెరను కలపండి.
11. ఇప్పుడు అందులో ఐదారు చుక్కల మ్యాంగో ఎసెన్స్ వేసి బాగా కలుపుకోండి.
12. ఆ తర్వాత అందులో అరలీటరు వరకూ నీళ్లు పోసి బాగా తిప్పండి.
13. ఈ ఫ్రూటీని ఫ్రిజ్‌లో ఐదారు గంటల పాటు ఉంచి తీస్తే సర్వ్ చేసుకోవడానికి రెడీ అయిపోయినట్లే.

మామిడి ఫ్రూటీ తాగడం వల్ల కలిగే ముఖ్యమైన ప్రయోజనాలు :

• మామిడిపండ్లలోని సహజమైన చక్కెరలు శరీరానికి తక్షణ శక్తిస్తాయి. వేసవిలో నీరసంగా అనిపించినప్పుడు దీన్ని తాగడం వల్ల ఇన్స్టాంట్ ఎనర్జీని పొందచ్చు.
• మామిడి పండ్లలో నీటి శాతం ఎక్కువగా ఉంటుంది. మ్యాంగో ఫ్రూటీని తాగడం వల్ల హైడ్రేటెడ్ గా ఉండచ్చు.
• ఇందులో ఫైబర్ ఉంటుంది.ఇది జీర్ణక్రియను మెరుగుపరుస్తుంది, మలబద్ధకాన్ని నివారిస్తుంది.
• మామిడిలో విటమిన్ సి పుష్కలంగా ఉంటుంది. ఇది రోగనిరోధక వ్యవస్థను బలపరుస్తుంది. ఇన్ఫెక్షన్ల నుండి రక్షిస్తుంది.
• ఈ పండులో విటమిన్ ఎ, యాంటీఆక్సిడెంట్లు ఉంటాయి. ఇవి చర్మాన్ని ఆరోగ్యంగా ఉంచడానికి, కాంతివంతంగా చేయడానికి సహాయపడతాయి.
• మామిడిలో బీటా కెరోటిన్ ఉంటుంది, ఇది విటమిన్ ఏగా మారుతుంది. కంటి ఆరోగ్యాన్ని మెరుగుపరుస్తుంది.
• మ్యాంగోలో పొటాషియం, మెగ్నీషియం వంటి ఖనిజాలు ఉంటాయి, ఇవి రక్తపోటును నియంత్రించడంలో సహాయపడతాయి. గుండె ఆరోగ్యాన్ని మెరుగుపరుస్తాయి.

కాబట్టి, ఇంట్లో తయారుచేసిన మ్యాంగో ఫ్రూటీ రుచికరమైనది మాత్రమే కాదు, ఆరోగ్యానికి కూడా ఎంతో మేలు చేస్తుంది. ముఖ్యంగా వేసవిలో ఇది ఒక అద్భుతమైన పానీయం.