మానసిక ఆందోళనలు వేధిస్తున్నాయా? గౌర్ గోపాల్ దాస్ చెప్పే సంతోష మంత్రాలతో ప్రశాంతత పొందండి!

మనం గడుపుతున్న బిజీలైఫ్ కారణంగా ఆందోళనలు, ఒత్తిడి ప్రతి ఒక్కరి జీవితంలోని భాగం అయిపోయాయి. వృత్తిపరంగా ఎదుర్కొనే ఒత్తిళ్ల కారణంగా అనేక అనారోగ్య సమస్యలను ఎదుర్కొంటున్నారు. ఇవి చాలదన్నట్లు పర్సనల్ రీజన్స్‌తో కూడా ఒత్తిడికి లోనవుతున్నారు. ఈ ఒత్తిడితోనే మనుషులు మానసికంగా కుంగిపోతున్నారు.

అలా జరగకుండా ఉండాలంటే, మానసిక ఆరోగ్యం కోసం సంతోషంగా ఉండటం చాలా అవసరం. అయితే మనలో అంతా కష్టపడటమెలాగో తెలుసుకుంటాం. కానీ, సంతోషంగా ఎలా ఉండాలో తెలియదు. ఎల్లప్పుడూ ఏదో ఒక ఆందోళనతోనే గడిపేస్తుంటారు. దీనివల్ల తెలియని మానసిక ఒత్తిడితో పాటు జీవితంలో విజయం దిశగా సాగలేరు. మీరు కూడా ఇలా ఆందోళన పడుతూ గందరగోళంలో ఇరుక్కుపోయామని అనుకుంటున్నారా..? జీవితంలో పెరిగిపోతున్న అనవసరమైన ఆందోళనల నుంచి బయటపడాలంటే ఇలా చేయండి. మోటివేషనల్ స్పీకర్ గౌర్ గోపాల్ దాస్ చెప్పిన కొన్ని సూచనలను పాటించండి. అవి మిమ్మల్ని లోపలి నుండి సంతోషంగా ఉంచటానికి సహాయపడతాయి.

సంతోషంగా ఉండటానికి ఈ నియమాలు పాటించండి

1) అన్నీ సంపాదించడం సంతోషం కాదు, మీ దగ్గర ఉన్నదాన్ని ఆనందించడమే సంతోషం. మనిషికి కోరికలు అనంతం, అవి తీరకపోతే బాధపడతాడు. కానీ, సంతోషంగా ఉండాలనుకుంటే మీ దగ్గర ఉన్నదాన్ని ఆనందించి జీవించడమే సంతోషం.

2) సంతోషంగా ఉండటం అనేది మీ ఛాయీస్. ఏదైనా జరగడం లేదా లభించడం మీద సంతోషం ఆధారపడి ఉండదు. మీరు సంతృప్తిగా ఉంటేనే మనసులో సంతోషం ఉంటుంది. ఒకవేళ మీకు సంతృప్తి లేదంటే ఎటువంటి సంఘటన జరిగినా, ఎలాంటి వస్తువు దొరికినా సంతోషంగా ఉండలేరు.

3) మీరు చేసే పనుల నుండే సంతోషం,సంతృప్తి లభిస్తుంది. సంతోషం ఎవరో ఇచ్చే రెడీమేడ్ వస్తువు కాదు. సంతోషాన్ని మనసుతో అనుభవించాలి. అప్పుడే మీరు జీవితంలో సంతోషంగా ఉండగలరు.

4) సంతోషంగా ఉండాలంటే ఇతరులకు వివరించడం ఆపేయండి. మనశ్శాంతి, సంతోషం కోసం మౌనంగా ఉండటం మంచిది.

5) అన్నీ ప్లాన్ చేసుకుని నడవడం వల్ల చాలా సార్లు నిరాశ కలుగుతుంది. దానివల్ల బాధ కలుగుతుంది. జీవితంలో కొన్ని విషయాలను ప్లాన్ చేయకుండా వదిలేయాలి. ప్లాన్ చేయని విషయాలు చాలా సార్లు ఎక్కువ సంతోషాన్ని ఇస్తాయి.

ఈ సూత్రాలను పాటించడం వల్ల మనం మరింత సంతోషంగా, ప్రశాంతంగా, సంతృప్తిగా, సానుకూల దృక్పథంతో జీవించగలుగుతాం. ఇది మన మానసిక ఆరోగ్యాన్ని మెరుగుపరుస్తుంది. జీవితాన్ని మరింత ఆనందమయం చేస్తుంది.

వీటిని ఆచరణలో పెట్టడానికి పాటించాల్సిన సూచనలు:

• ప్రతిరోజూ మీకున్న మూడు విషయాలు గుర్తుంచుకుని వాటికి కృతజ్ఞత చెప్పండి. మౌనంగా ఉండటానికి ప్రయత్నించాలనుకుంటే వారంలో ఒక రోజూ పూర్తిగా నిశ్శబ్దంగా ఉండండి.
• ఒత్తిడిని సమర్థవంతంగా నిర్వహించడం కూడా మానసిక ఆరోగ్యానికి చాలా ముఖ్యం. శ్వాస వ్యాయామాలు, ధ్యానం, యోగా లేదా ప్రకృతిలో సమయం గడపడం వంటివి ఒత్తిడిని తగ్గించే పద్ధతులు.
• మీరు తీవ్రమైన మానసిక ఇబ్బందిని ఎదుర్కొంటుంటే, దయచేసి ఒక మానసిక ఆరోగ్య నిపుణుడిని సంప్రదించడానికి వెనుకాడకండి.
• మీరు సాధించిన చిన్న విజయాలను కూడా గుర్తుంచుకుని వాటిని సెలబ్రేట్ చేసుకోండి.
• ప్రతికూల పరిస్థితుల్లో కూడా సానుకూల దృక్పథాన్ని అలవర్చుకోవడానికి ప్రయత్నించండి.