మ్యాంగో లస్సీ తయారు చేయడం ఇంత ఈజీనా? వేసవిలో తప్పకుండా ట్రై చేయాల్సిన రెసిపీ ఇది!
ఎండలకు శరీరం వేడెక్కిపోతుందా? క్షణాల్లో మీ దాహాన్ని తీర్చి, శరీరాన్ని చల్లబరుచుకునేందుకు మ్యాంగో లస్సీ తాగండి. తియ్యగా, కమ్మగా, చల్లగా అనిపించే ఈ పానీయం ఆరోగ్యానికి కూడా చాలా మంచిది. మరి ఈ మ్యాంగో లస్సీని ఎలా తయారు చేసుకోవాలో, వేసవిలో దీన్ని తాగడం వల్ల కలిగే ప్రయోజనాలేంటో చూద్దాం రండి!
వేసవి కాలం వచ్చిందంటే చాలు, మండే ఎండలకు శరీరం డీహైడ్రేట్ అవుతుంది. ఇలాంటి సమయంలో చల్లని, రుచికరమైన పానీయం కోసం మనసు, నాలుక తహతహలాడుతుంటాయి. అటువంటి సమయంలో మీ నాలుకకు చల్లటి, కమ్మటి విందులా అనిపించే అద్భుతమైన పానీయాల్లో ఒకటి మ్యాంగో లస్సీ! పండిన మామిడి పండ్ల తియ్యదనం, చిక్కటి పెరుగు చల్లదనం కలగలిపి చేసిన ఈ లస్సీ కేవలం రుచికరమైనది మాత్రమే కాదు, ఆరోగ్యానికి కూడా ఎంతో మేలు చేస్తుంది. వేసవి తాపాన్ని తట్టుకోవడానికి, శరీరాన్ని హైడ్రేటెడ్‌గా ఉంచడానికి, జీర్ణక్రియను మెరుగుపరచడానికి మ్యాంగో లస్సీ ఒక చక్కని ఎంపిక. మరి ఈ రుచికరమైన, ఆరోగ్యకరమైన మ్యాంగో లస్సీని ఎలా తయారు చేయాలో తెలుసుకుందాం రండి.
మ్యాంగో లస్సీ తయారీకి కావలసిన పదార్థాలు:
- 1 కప్పు బాగా పండిన మామిడి పండు ముక్కలు (లేదా 1 కప్పు మామిడి గుజ్జు)
- 1 కప్పు పెరుగు (చిక్కటిది)
- 1/2 కప్పు పాలు
- 2-3 టేబుల్ స్పూన్లు చక్కెర (లేదా తెనె)
- 1/4 టీస్పూన్ యాలకుల పొడి (ఐచ్ఛికం)
- కొన్ని ఐస్ ముక్కలు (ఐచ్ఛికం)
- గార్నిష్ కోసం: పిస్తా పలుకులు లేదా కుంకుమ పువ్వు (ఐచ్ఛికం)
మ్యాంగో లస్సీ తయారీ విధానం:
- మామిడిపండు లస్సీ తయారు చేయడం కోసం ముందుగా బాగా పండిన మామిడి పండును తొక్కతీసి చిన్న చిన్న ముక్కలుగా కట్ చేసుకోవాలి.
- ఇప్పుడు ఒక మిక్సీ జార్ తీసుకుని దాంట్లో మామిడిపండు ముక్కలు వేసి మెత్తటి పేస్టులా తయారు చేసుకోవాలి.
- తరువాత దీంట్లోనే చిక్కటి పెరుగు, పాలు, చక్కెర, యాలకుల పొడి వేసి మరో సారి బ్లెండ్ చేయాలి. చక్కెర వద్దు అనుకునే వాళ్లు తేనెను కూడా కలుపుకోవచ్చు.
- అన్ని పదార్థాలు బాగా కలిసిపోయి, మెత్తటి గుజ్జులా అయ్యే వరకు బ్లెండ్ చేయండి. చల్లదనం కోసం దీంట్లో ఐస్ ముక్కలు వేసి బ్లెండ్ చేసుకోండి.
- అంతే దీన్ని గ్లాసుల్లోకి పోసుకుని కుంకుమ పువ్వు, డ్రై ఫ్రూట్స్ తో గార్నీష్ చేసుకున్నారంటే మీ నాలుకను రీఫ్రెష్ చేసి, శరీరాన్ని చల్లబరిచే మ్యాంగో లస్సీ రెడీ అయినట్టే. లొట్టలేసుకుంటూ తాగేయడమే.
వేసవిలో మ్యాంగో లస్సీ తాగడం వల్ల కలిగే ప్రయోజనాలు:
శరీరాన్ని చల్లబరుస్తుంది: పెరుగు సహజమైన శీతలీకరణ లక్షణాలు కలిగి ఉంటుంది. దీన్ని తాగడం వల్ల శరీరంలో వేడి తగ్గి చల్లగా హాయిగా అనిపిస్తుంది.
డీహైడ్రేషన్ నివారిస్తుంది: పెరుగు, పాలు శరీరానికి అవసరమైన నీటిని, శక్తిని అందిస్తాయి. వేసవిలో ఎక్కువ మంది ఎదుర్కొనే డీహైడ్రేషన్ సమస్యను తగ్గించేందుకు మ్యాంగో లస్సీ చక్కటి ఆప్షన్.
జీర్ణక్రియను మెరుగుపరుస్తుంది: పెరుగులోని ప్రోబయోటిక్స్ జీర్ణవ్యవస్థను ఆరోగ్యంగా ఉంచుతాయి.
శక్తినిస్తుంది: మామిడిలోని సహజ చక్కెరలు తక్షణ శక్తిని అందిస్తాయి.
పోషకాలను అందిస్తుంది: లస్సీ తయారీలో ఉపయోగించిన అన్ని పదార్థాల్లోనూ విటమిన్లు, ఖనిజాలు పుష్కలంగా ఉంటాయి.
తియ్యగా, చల్లగా నాలుకకు విందులా అనిపించే ఈ డ్రింక్ ను పిల్లల నుంచి పెద్దల వరకూ ప్రతి ఒక్కరూ ఇష్టంగా తాగుతారు. కాబట్టి, ఈ వేసవిలో ఈ రుచికరమైన, ఆరోగ్యకరమైన మ్యాంగో లస్సీని తప్పక ఆస్వాదించండి!
సంబంధిత కథనం