Rice Idli: అప్పటికప్పుడు ఇలా రైస్ ఇడ్లీ చేసేయండి, ఇవి మెత్తగా స్పాంజిలా వస్తాయి-rice idli recipe in telugu know how to make this breakfast ,లైఫ్‌స్టైల్ న్యూస్
తెలుగు న్యూస్  /  Lifestyle  /  Rice Idli Recipe In Telugu, Know How To Make This Breakfast

Rice Idli: అప్పటికప్పుడు ఇలా రైస్ ఇడ్లీ చేసేయండి, ఇవి మెత్తగా స్పాంజిలా వస్తాయి

Haritha Chappa HT Telugu
Mar 20, 2024 06:00 AM IST

Rice Idli: ఇడ్లీలు అనగానే ముందు రోజే పిండిని రుబ్బుకుని నానబెట్టుకుని పులియబెట్టుకోవాలి. అయితే ఉదయాన అప్పటికప్పుడు రైస్ ఇడ్లీని చేసుకుంటే మెత్తగా వస్తాయి. ఇవి చాలా తక్కువ సమయంలోనే రెడీ అవుతాయి.

రైస్ ఇడ్లీ రెసిపీ
రైస్ ఇడ్లీ రెసిపీ (Unsplash)

Rice Idli: ఇన్‌స్టెంట్ ఇడ్లీ... ఉదయాన్నే లేచిన తర్వాత ఏం టిఫిన్ చేయాలో ఆలోచించేవారు ఈ ఇన్‌స్టెంట్ ఇడ్లీని ట్రై చేయండి. ఇవి మెత్తగా, స్పాంజిలాగా వస్తాయి. రెగ్యులర్ ఇడ్లీలతో పోలిస్తే ఇవి చాలా తక్కువ సమయంలోనే రెడీ అవుతాయి. రెగ్యులర్ ఇడ్లీలను ముందు రోజే రుబ్బుకొని రాత్రి పులియబెట్టుకోవాలి. ఈ ఇన్ స్టెంట్ ఇడ్లీలకి పిండిని ముందు రోజు రాత్రే రెడీ చేసుకోవాల్సిన అవసరం లేదు. అప్పటికప్పుడు చేసుకోవచ్చు. వీటిని చేసుకునేందుకు బియ్యం రవ్వ, పుల్లని మజ్జిగ, అటుకులు ఉంటే సరిపోతుంది. ఈ మూడింటితో ఇన్ స్టెంట్ ఇడ్లీ సులువుగా రెడీ అయిపోతుంది. పిల్లలకు కూడా ఇది చాలా నచ్చుతుంది. ఈ ఇన్ స్టెంట్ ఇడ్లీ ఎలా చేయాలో ఇప్పుడు చూద్దాం.

రైస్ ఇడ్లీ రెసిపీకి కావాల్సిన పదార్థాలు

అటుకులు - ఒక కప్పు

పుల్లని మజ్జిగ - మూడు కప్పులు

బియ్యం రవ్వ - ఒకటిన్నర కప్పు

వంటసోడా - పావు స్పూను

ఉప్పు - రుచికి సరిపడా

రైస్ ఇడ్లీ రెసిపీ

1. ఒక గిన్నెలో అటుకులు వేసి అందులో పుల్లని మజ్జిగను వేసి నానబెట్టాలి.

2. ఓ పావుగంట వదిలేసాక దాన్ని మిక్సీ పట్టుకుంటే మెత్తగా పిండిలాగా అవుతుంది.

3. ఇప్పుడు ఆ అటుకుల మిశ్రమంలో బియ్యం రవ్వ, రుచికి సరిపడా ఉప్పు, వంట సోడా, మిగిలిన మజ్జిగ వేసి బాగా కలుపుకోవాలి.

4. ఓ అరగంట పాటు అలా వదిలేస్తే బియ్యం రవ్వ పుల్లని మజ్జిగలో బాగా నానుతుంది.

5. ఇడ్లీ పిండి మాదిరిగా అవుతుంది. ఇప్పుడు ఇడ్లీ స్టాండ్ లోని ఇడ్లీ ప్లేట్లకు అడుగున నెయ్యి లేదా నూనె రాసి ఈ రుబ్బును వేసి ఇడ్లీ కుక్కర్లో పెట్టేయాలి.

6. కాసేపటికి వేడి వేడి ఇడ్లీలు రెడీ అయిపోతాయి.

7. ఇడ్లీలు చాలా మెత్తగా, స్పాంజిలాగా ఉంటాయి.

8. వీటిని సాంబార్‌తో తింటే అదిరిపోతాయి. ఏ చట్నీతో తిన్నా కూడా ఇవి టేస్టీగానే ఉంటాయి.

పిల్లలకు అప్పటికప్పుడు చేయడానికి వీలుగా ఈ ఇన్ స్టెంట్ ఇడ్లీల రెసిపీ ఉంటుంది. ముందు రోజు ఇడ్లీ పిండి రుబ్బుకోవడం కుదరనివారు... మరుసటి రోజు ఇలా పుల్లని మజ్జిగతో బియ్యం రవ్వ , అటుకులు వేసి ఇడ్లీని చేసుకుంటే టేస్టీగా ఉంటుంది. కొబ్బరి చట్నీతో ఇడ్లీ తింటే అదిరిపోతుంది. దీనిలో ఎక్కువగా బియ్యం రవ్వ ఉంది. కాబట్టి పిల్లలకు నీరసం కూడా రాదు. ఒక్కసారి ఈ ఇడ్లీని చేసుకొని తినండి. రెగ్యులర్ ఇడ్లీ కన్నా ఇది మెత్తగా ఉంటుంది. కాబట్టి పిల్లలకు నచ్చడం ఖాయం.

టాపిక్