మదర్స్ డే రోజున అమ్మకోసం స్పెషల్‌గా ఏదైనా వండాలనుకుంటున్నారా? పన్నీర్ దమ్ బిర్యానీ ట్రై చేయండి!

మదర్స్ డే దగ్గరకొచ్చేసింది. ఈ స్పెషల్ రోజున అమ్మను ఇంప్రెస్ చేయడానికి రకరకాల ప్రయత్నాలు చేస్తుంటాం కదా. అందులో వంట కూడా ఒకటి. రోజూ వంట చేసి పెట్టే అమ్మకు మనం వంట చేసి పెట్టడం స్పెషలే కదా మరి. అందులోనూ బిర్యానీ లాంటి స్పెషల్ వంటకాన్ని చేస్తే ఎలా ఉంటుంది. అయితే రండీ. కొన్ని ప్రత్యేకమైన చిట్కాలు, టెక్నిక్స్‌తో బిర్యానీని మరింత ప్రత్యేకంగా చేసేద్దాం. అమ్మ నోరూరించేలా, కడుపు నిండేలా ఈ పన్నీర్ దమ్ బిర్యానీని తయారు చేస్తే, అమ్మ కళ్లల్లో ఆనందం, ఆమె ఫీలయ్యే హ్యాపీనెస్ యే మీరిచ్చే నిజమైన బహుమతి. మరి ఆలస్యం లేకుండా పన్నీర్ దమ్ బిర్యానీ ఎలా తయారుచేయాలో చూసేయండి.

పన్నీర్ దమ్ బిర్యానీ తయారీకి కావాల్సిన పదార్థాలు:

• నీళ్లు - 3 లీటర్లు
• ఉప్పు - 1 టేబుల్ స్పూన్
• బిర్యానీ ఆకు - 1
• అనాస పువ్వు - 1
• లవంగాలు - 3
• దాల్చిన చెక్క - అంగుళం
• జాపత్రి - 1
• యాలకులు - 2
• నిమ్మకాయ - 1/4వ ముక్క
• నెయ్యి - 3 టేబుల్ స్పూన్
• తాజా కొత్తిమీర - 2 టేబుల్ స్పూన్
• తాజా పుదీనా - 2 టేబుల్ స్పూన్
• బాస్మతి రైస్- 2 కప్పులు
• వెన్న - 2 టేబుల్ స్పూన్లు
• నూనె- 1 టేబుల్ స్పూన్
• జీలకర్ర - 1 టేబుల్ స్పూన్
• ఉల్లిపాయ - 1 (మీడియం సైజు తరిగిన ముక్కలు)
• టమాటాలు - 4-5 (మీడియం సైజు తరిగిన ముక్కలు)
• వెల్లుల్లి పాయలు - 6-7
• అల్లం - 1 అంగుళం
• కాశ్మీరీ ఎండు మిరపకాయలు - 4
• జీడిపప్పు - 10 పప్పులు
• కారం పొడి - 1 టేబుల్ స్పూన్
• పసుపు - 1/2 టీ స్పూన్
• చక్కెర - 1 టేబుల్ స్పూన్
• గరం మసాలా - 1 టీ స్పూన్
• నీళ్లు - 1/2 లీటరు
• పెరుగు - 1/2 కప్పు
• ఫ్రెష్ క్రీం - 2 టేబుల్ స్పూన్లు
• కస్తూరీ మేతీ - 1 టేబుల్ స్పూన్
• వేయించుకున్న ఉల్లిపాయలు - 1 కప్పు
• పన్నీర్ - 500 గ్రాములు

పన్నీర్ దమ్ బిర్యానీ తయారుచేయడానికి కావాల్సిన పదార్థాలు:

1. ముందుగా పన్నీర్ ముక్కలను గోరువెచ్చని నీటిలో 10-15 నిమిషాలు నానబెట్టండి. ఇది వాటిని మృదువుగా చేస్తుంది. తర్వాత నీటిని వడకట్టి పక్కన పెట్టండి.
2. ఆ తర్వాత బాస్మతి బియ్యాన్ని బాగా కడిగి 30 నిమిషాలు నీటిలో నానబెట్టండి.
3. మరోవైపు ఒక పాన్‌లో నెయ్యి లేదా నూనె వేడి చేసి, సన్నగా తరిగిన ఉల్లిపాయలు బంగారు రంగు వచ్చే వరకు వేయించి పక్కన పెట్టుకోండి. వీటిని బిర్యానీ చివరలో అలంకరించడానికి ఉపయోగిస్తారు.
4. ఇప్పుడు ఒక లోతైన గిన్నెను తీసుకుని అందులో మూడు లీటర్ల నీరు పోసి మరిగించండి.
5. నీరు మరుగుతున్నప్పుడు అందులో కాస్త ఉప్పు, ఒక అనాస పువ్వు, బిర్యానీ ఆకు, 4 లవంగాలు, దాల్చిన చెక్క, జాపత్రి, యాలకులు, నిమ్మకాయ ముక్క, 1 టేబుల్ స్పూన్ నెయ్యి,
6. తాజా కొత్తిమీర 1 టేబుల్ స్పూన్, తాజా పుదీనా 1 టేబుల్ స్పూన్ వేసి బాగా మరిగించుకోవాలి.
7. మరుగుతున్న ఈ నీటిలో కడిగి పక్కన పెట్టుకుని బాస్మతీ బియ్యాన్ని పోసి కలపండి.
8. బియ్యం దాదాపు 70 ఉడికే వరకూ ఉంచి ఆ తర్వాత దానిని వడకట్టి అన్నాన్ని పక్కకుపెట్టుకోండి.
9. ఇప్పుడు మరో కడాయి తీసుకుని స్టవ్ మీద పెట్టి దాంట్లో వెన్న 2 టేబుల్ స్పూన్లు, నూనె 1 టేబుల్ స్పూన్ వేసి వేడి చేయండి.
10. నూనె కాస్త వేడెక్కిన తర్వాత అందులో జీలకర్ర వేసి వేయించుకోండి. తర్వాత సన్నగా తరిగిపెట్టుకున్న ఉల్లిపాయలు, టమాటా ముక్కలు, వెల్లుల్లి రెబ్బలు, అల్లం ముక్క, ఎండుమిర్చి, జీడిపప్పులు, కారం పొడి, పసుపు, చక్కెర, ఉప్పు, గరం మసాలా వేసి బాగా కలపండి.
11. కాస్త వేగిన తర్వాత ఇందులో అర లీటర్ నీళ్లు పోసి మూత పెట్టండి.
12. ఈ మిశ్రమం 8 నుంచి 10 నిమిషాల వరకూ ఉడికిన తర్వాత స్టవ్ ఆఫ్ చేసి చల్లారనివ్వండి.
13. చల్లారిన తర్వాత ఒక మిక్సీ గిన్నె తీసుకుని అందులో వేసి మెత్తటి పేస్ట్ లా మిక్సీ పట్టండి.
14. ఇప్పుడు ఒక మిక్సింగ్ బౌల్ తీసుకుని దాంట్లో మిక్సీ పట్టిన పేస్ట్ ను వేయండి.
15. అందులోనే అర కప్పు పెరుగు, రెండు టేబుల్ స్పూన్ల ఫ్రెష్ క్రీం, కసూరీ మేథీ 1 టేబుల్ స్పూన్, ముందుగానే ఫ్రై చేసి పెట్టుకున్న ఉల్లిపాయ ముక్కలను పావు కప్పు, రుచికి తగినంత ఉప్పు వేసి బాగా కలపండి.
16. దీంట్లో నానబెట్టి పక్కకుపెట్టుకున్న పన్నీర్ ముక్కలు వేసి బాగా కలపండి.
17. ఇప్పుడు ఒక వెడల్పాటి గిన్నె తీసుకుని దానికి లోపలి భాగంలో నెయ్యి అప్లై చేసి అందులో పన్నీర్ ముక్కల మిశ్రమాన్ని ఒక లేయర్ లా వేయండి. ( సగం వేస్తే సరిపోతుంది)
18. దాని మీద పుదీనా, కొత్తిమీర, వేయించుకున్న ఉల్లిపాయలు వేసి గార్నిష్ చేయండి.
19. ఇప్పుడు సగానికి పైగా ఉడికిన అన్నం తీసుకుని లేయర్లాగా వేయాలి. దానిపై మిగిలిన పన్నీర్ ముక్కల మిశ్రమాన్ని లేయర్లా వేయండి. దాని మీద కొత్తిమీర, పుదీనా, ఉల్లిపాయలు వేసి మరోసారి గార్నిష్ చేసుకోండి.
20. చివరిగా మిగిలిన అన్నం మొత్తాన్ని వేసి కొత్తిమీర, పుదీనా, ఫ్రైడ్ ఆనియన్స్ వేసుకుని గార్నిష్ చేసుకుని, ఒక టేబుల్ స్పూన్ నెయ్యి వేయండి.
21. ఇప్పుడు ఆ గిన్నెకు మూతపెట్టి గాలి బయటకు పోకుండా ఉండేలా ఏదైనా పిండితో కవర్ చేయండి.
22. ఇప్పుడు స్టవ్ మీద ఒక పెనం పెట్టి దాని మీద దమ్ చేసి పెట్టుకున్న అన్నం గిన్నెను ఉంచి వేడి చేయండి. పదిహేను నుంచి 20 నిమిషాల వరకూ మీడియం ఫ్లేములో ఉడికించాలి.
23. 20 నిమిషాల తర్వాత మూత తీసి చూశారంటే, మీరు కోరుకున్న పన్నీర్ దమ్ బిర్యానీ రెడీ అయిపోయినట్లే.

దీన్ని రైతాతో గానీ, మిర్చీ కా సాలన్ తో అయినా ట్రై చేయొచ్చు.