వేసవిలో అన్నం, బంగాళాదుంపలతో ఈ రెండు రకాల క్రిస్పీ అప్పడాలు చేసేయండి, ఒక్కరోజు ఎండితే చాలు

ఎండకాలం వస్తే చాలు వడియాలు, ఊరగాయలు, అప్పడాలు, ఆవకాయలు, నిల్వ పచ్చళ్లు పెట్టేందుకు మహిళలు సిద్ధమైపోతారు. అప్పడాల పెట్టడం మాత్రం అందరికీ రాదు. వాటిని చేయడం కూడా కష్టం అనుకుంటారు. మేము చాలా సింపుల్ గా అన్నం, బంగాళాదుంపలతో అప్పటికప్పుడు అప్పడాలు ఎలా చేయాలో తెలుసుకోండి.

ఈ అప్పడాలను రెండు మూడు రోజులు ఎండలో ఆరబెట్టాల్సిన అవసరం లేదు. కేవలం ఒక్కరోజులోనే అప్పడాలను తయారుచేసి నిల్వ చేసుకోవచ్చు. ఇన్‌స్టంట్ అప్పడాలను తయారుచేసే విధానం గురించి తెలుసుకోండి.

ఇన్‌స్టంట్ అన్నం అప్పడాల రెసిపీకి కావాల్సిన పదార్థాలు

జీలకర్ర - ఒక స్పూను

ఇంగువ - చిటికెడు

వండిన అన్నం - ఒక కప్పు

ఉప్పు - రుచికి సరిపడా

నీళ్లు - రెండు కప్పులు

అన్నం అప్పడాల రెసిపీ

1. అన్నం అప్పడాలు చేసేందుకు ముందుగా 2 కప్పుల నీటిని ఒక పాత్రలో మరిగించండి.

2. ఆ తర్వాత నీటిలో రుచికి తగినంత ఉప్పు, చిటికెడు ఇంగువ, చిన్న చెంచా జీలకర్ర వేసి మరిగించండి.

3. నీరు మరుగుతున్నప్పుడు అందులో ఒక కప్పు వండిన అన్నం వేసి నిరంతరం కలుపుతూ ఉండండి. గడ్డలు ఏర్పడకుండా చూసుకోండి.

4. ఈ మిశ్రమం మందంగా మారే వరకు కలిపి తరువాత స్టవ్ ఆఫ్ చేసేయండి.

5. ఆ మిశ్రమం చల్లారాక చేతులకు కాస్త నీటిని రాసుకుని చిన్న అన్నం ముద్దను తీసుకోంది.

6. చేత్తోలనే ఆ ముద్దను అప్పడాల్లా వత్తుకుని ఒక ప్లాస్టిక్ షీట్ పై పెట్టండి.

7. ఇలా అన్నీ చేశాక ఎండలో లేదా ఫ్యాన్ కింద 8 గంటలు ఎండబెట్టండి.

8. ఎండిపోయిన తర్వాత వాటిని నూనెలో వేయించి తినవచ్చు.

………………………………………………………………………..

ఆలూ అప్పడాల రెసిపీకి కావాల్సిన పదార్థాలు

బంగాళాదుంపలు - మూడు

ఉప్పు - రుచికి సరిపడా

మిరియాల పొడి - అర స్పూను

ఇంగువ - చిటికెడు

నీరు - తగినంత

అరటి పిండి - అర కప్పు

ఆలూ అప్పడాల రెసిపీ

1. ఇన్‌స్టంట్ ఆలు అప్పడాల తయారుచేయడానికి ముందుగా బంగాళాదుంపలను మెత్తగా ఉడికించుకోవాలి.
2. ఉడికించిన బంగాళాదుంపలను తొక్క తీసి ఒక గిన్నెలో వేసి మెత్తగా చేత్తోనే మెదుపుకోవాలి.
3. అందులోనే అర కప్పు అరటిపిండి, రుచికి తగినంత ఉప్పు, మిరియాల పొడి, ఇంగువ, కొద్దిగా నీరు వేసి బాగా కలిపి పలుచని పేస్టులా తయారుచేసుకోండి.
4. ఆ తర్వాత ప్లాస్టిక్ షీట్ మీద కొద్దిగా నూనె రాయాలి.
5. ఇప్పుడు మిశ్రమం నుంచి చిన్న చిన్న ఉండలు చేసి ప్లాస్టిక్ షీట్ పై పెట్టి అప్పడంలా చేత్తోనే ఒత్తుకోవాలి. అలా అన్ని చేసుకోవాలి.
6. ఈ అప్పడాలను ఎండలో లేదా ఫ్యాన్ కింద 8 గంటలు ఎండబెట్టండి. తరువాత అప్పడాల సిద్ధమైపోతాయి.

ఇక్కడ మేము చెప్పిన రెండు రకాల అప్పడాలు చేయడం చాలా సులువు. అంతేకాదు ఒకరోజులోనే తినేందుకు సిద్ధమైపోతాయి. కాబట్టి వీటిని ప్రయత్నించి చూడండి.