Bed Wetting In Children: ఏడేళ్లు దాటినా పిల్లలు పక్క తడుపుతున్నారా? ఎందుకంటే..
Bed Wetting In Children: ఏడేళ్లు దాటినా కూడా కొంత మంది పిల్లల్లో పక్క తడిపే అలవాటు మానదు. అందుకోసం కారణాలు, కొన్ని టిప్స్ తెల్సుకోండి.
పసి పిల్లలు సర్వ సాధారణంగా పక్కను తడిపేస్తూ ఉంటారు. అందుకనే తల్లిదండ్రులు వారికి డైపర్లను వేస్తూ ఉంటారు. అయితే ఐదేళ్లు దాటి దగ్గర నుంచి చాలా మంది పిల్లల్లో ఈ అలవాటు క్రమంగా తగ్గిపోతుంది. బాగా ఊహ తెలిసిన వయసు అంటే ఏడేళ్లు తర్వాత ఇక పిల్లలు ఈ అలవాటును పూర్తిగా మానుకుంటారు. అయితే కొంత మంది పిల్లలు మాత్రం ఎనిమిది, తొమ్మిదేళ్లు వచ్చినా సరే ఇంకా పక్కను తడుపుతూనే ఉంటారు. అందులో అంతగా భయపడాల్సిన పనేం లేదని వైద్యులు చెబుతున్నారు. ఇందుకు గల కారణాలేంటో? ఈ అలవాటును ఎలా నియంత్రించవచ్చో వివరిస్తున్నారిక్కడ.
పక్క తడపడానికి కారణాలు :
- చాలా మంది పిల్లలు జన్యు పరంగా వచ్చిన కారణాల వల్ల ఇలా పెద్ద వయసు వచ్చినా కూడా పక్క తడుపుతూ ఉండొచ్చు. తల్లిదండ్రులకు చిన్నప్పుడు ఇలాంటి లక్షణాలు ఉన్నట్లయితే పిల్లల్లో కూడా ఈ అలవాటు కలుగుతుంది.
- పిల్లలు మూత్రాశయ నరాలు ఇంకా బలంగా తయారు కాకపోవడం వల్లా వారు మూత్రాన్ని ఆపుకోలేరు. అందువల్ల మూత్రం వస్తోంది లేచి వెళ్లాలన్న సిగ్నల్స్‌ మెదడుకు సరిగ్గా అందవు. ఈ లోపే పక్క తడిచిపోవడం పూర్తయిపోతుంది.
- కొందరికి మూత్రాశయం చిన్నదిగా ఉంటుంది. అలాగే మనం నిద్రలో ఉన్నప్పుడు మూత్రం తక్కువగా తయారు కావడానికి వాసోప్రెసిన్‌ అనే హార్మోన్‌ విడుదల అవుతుంది. వీరిలో ఈ హార్మోన్‌ విడుదల కావడం తగిన స్థాయిలో లేకపోవచ్చు.
- కొందరు పిల్లలు తాము లేచి వాష్‌రూంలోకి వెళ్లినట్లుగా కలగంటూ ఉంటారు. ఆ క్రమంలో పక్క మీదనే పని కానిచ్చేస్తారు. మెలుకువ వస్తే గాని వారికి అసలు విషయం అర్థం కాదు.
- పిల్లలు ఏదైనా తీవ్రమైన ఒత్తిడిలో ఉన్నా కూడా ఈ పక్క తడపడం అనేది ఉంటుంది. కాబట్టి వీటిలో దేని వల్ల పిల్లలు ఇబ్బంది పడుతున్నారు? అన్న విషయంపై ముందు తల్లిదండ్రులు అవగాహన తెచ్చుకోవాలి. అవసరం అనుకుంటే వైద్యుల్ని సంప్రదించాలి.
ఇంట్లో ఎలా నియంత్రించవచ్చు?
ఇలాంటి అలవాటు ఉన్న పిల్లలను తల్లిదండ్రులు తిట్టడం, భయపెట్టడం లాంటివి చేస్తుంటారు. అలా చేయడానికి బదులుగా సానుకూల వాతావరణంలో వారిని సముదాయించండి. మూత్రం వచ్చినప్పుడు లేచే ప్రయత్నం చేయమని సూచిస్తూ ఉండండి. సాయంత్రం నుంచి ఎక్కువగా మంచి నీటిని తాగించకండి. ఉదయం పూట మూత్రం వెళ్లాల్సి వచ్చినప్పుడు వారికి కాసేపు వేచి ఉండమని చెప్పండి. అందువల్ల వారి మూత్రాశయ నరాలు బలోపేతం అవుతాయి. దీంతో వారికి మూత్రాన్ని ఆపుకునే సామర్థ్యం మెల్లిమెల్లిగా పెరుగుతుంది.