Sooji Potato Rolls: పిల్లలకు ఉప్మా నచ్చడం లేదా..? అయితే రవ్వతో ఇలా రోల్స్ చేసి ఇవ్వండి, చాలా ఇష్టంగా తింటారు

ఉదయాన్నే పిల్లలకు బ్రేక్‌ఫాస్ట్ తయారు చేసి పెట్టడం అనేది ఈ రోజుల్లో తల్లులకు పెద్ద టాస్క్. రోజుకో వైరైటీ ఉంటే కానీ వాళ్లకు నచ్చదు. అందుకే పిల్లల కోసం రకరకాల బ్రేక్‌ఫాస్ట్ రెసిపీలు తయారు చేసేందుకు తల్లలు తపన పడుతుంటారు. మీరు అలాంటి వారే అయితే మీకు ఈ రెసిపీ చాలా బాగా సహాయపడుతుంది. ఉప్మా రవ్వ బంగాళాదుంపలతో చేసే ఈ పదార్థం పిల్లలకు, పెద్దవారికి కూడా చాలా బాగా నచ్చుతుంది. ఎలా తయారు చేయాలో ఇక్కడ తెలుసుకోవచ్చు.

రోల్స్ కోసం కావలసిన పదార్థాలు..

• 1.5 కప్పు ఉప్మా రవ్వ
• 1.5 కప్పుల పెరుగు
• 1/4 కప్పు నీరు
• రుచికి తగినంత ఉప్పు
• 1.5 టీస్పూన్ ఎనో పౌడర్

రోల్స్ లోపలి కర్రీకి కావాల్సిన పదార్థాలు

• 2 కప్పులు ఉడికించిన బంగాళాదుంపలు
• 1 టేబుల్ స్పూన్ నూనె
• 1/2 కప్పు తరిగిన ఉల్లిపాయలు
• 1 tsp అల్లం వెల్లుల్లి పేస్ట్
• 1 స్పూన్ ఆవాలు
• 1 టీస్పూన్ జీరా
• 1/2 స్పూన్ పసుపు పొడి
• 1 స్పూన్ మిరప పొడి
• 1 టీస్పూన్ ధనియాల పొడి
• తరిగిన కొత్తిమీర ఆకులు

తాళింపు కోసం కావాల్సిన పదార్థాలు

• 1 స్పూన్ నూనె
• 1/2 టీస్పూన్ ఆవాలు
• 1/2 స్పూన్ పసుపు పొడి
• 1 టీస్పూన్ ఎర్ర మిరప పొడి
• 1 టీస్పూన్ తరిగిన కొత్తిమీర ఆకులు
• 1/4 కప్పు నీరు

రవ్వ, బంగాళాదుంప రోల్స్ తయారీ విధానం:

• ముందుగా ఒక గిన్నెలో ఉప్మా రవ్వ తీసుకుని దాంట్లో పెరుగు, ఉప్పు వేసి నీళ్లు పోసి చక్కగా కలపి పక్కకు పెట్టుకోండి.
• ఇప్పుడు ఒక ప్యాన్ తీసుకుని దాంట్లో నూనె పోయాలి.
• నూనె వేడెక్కిన తర్వాత దాంట్లో ఆవాలు, జీలకర్ర, పచ్చిమిర్చి ముక్కలు, ఉల్లిపాయ ముక్కలు, అల్లం వెల్లుల్లి పేస్ట్ వేసి వేయించాలి.
• ఇవి నూనెలో వేగిన తర్వాత సన్నగా తురిమి పెట్టుకున్న బంగాళాదుంపలను దాంట్లో వేసి వేయండి.
• తరువాత దీంట్లో పసుపు, కారంపొడి, ధనియాల పొడి, ఉప్పు, కొత్తిమీర వేసి బాగా కలపాలి.
• బంగాళాదుంపలు చక్కగా ఉడికి వాటికి మసాలాలు అన్నీ పట్టిన తర్వాత స్టవ్ ఆఫ్ చేసేయండి.
• ఈ మిశ్రమం అంతా చల్లారిన తర్వాత వాటిని పొడవాటి ఉండలుగా చేయండి.
• ఇప్పుడు ముందుగా తయారు చేసుకున్న రవ్వ మిశ్రమంలో కాస్త ఈనో పౌడర్ వేసి, నీళ్లు పోసి బాగా కలపండి.
• తరువాత రెండు లేదా మూడు గ్లాసుల్లో ఈ మిశ్రమాన్ని కొద్దిగా వేసి ఒక్కో గ్లాసులో ఒక్కో బంగాళాదుంప ఉండను వేయండి.
• బంగాళాదుంప ముద్దలు మొత్తం మునిగిపోయేలా వాటిపైన కూడా రవ్వ బ్యాటర్ తో కప్పేయండి.
• ఇప్పుడు ఒక లోతు గిన్నె తీసుకుని దాంట్లో నీళ్లు పోసుకుని వేడి చేయండి.
• మరుగుతున్న నీటిలో ఈ గ్లాసులను పెట్టి ఇడ్లీలను ఉడికించినట్టుగా ఆవిరి మీద 15 నిమిషాల పాటు ఉడికించండి. ఉడికిన తర్వాత వీటిని పక్కక్కు పెట్టేయండి.
• ఇప్పుడు మరో ఫ్రైయింగ్ ప్యాన్ తీసుకుని దాంట్లో నూనె పోసి వేడిచేయండి.
• నూనె వేడిక్కిన తర్వాత ఆవాలు, పసుపు, కారం వేసి దాంట్లో నాలుగు ఐదు స్పూన్ల నీటిని పోయండి.
• ఈ నీళ్లు కాస్త వేడిక్కిన తర్వాత ఉడికించుకున్న రవ్వ బంగాళాదుంప రోల్స్ తీసుకుని వేయించుకోవాలి.
• వీటిని గుండ్రంగా తిప్పుతూ బంగారు రంగులోకి వచ్చే వరకూ వేయించుకోవాలి.
• తరువాత వీటిని తీసుకుని బంగాళాదుంపలను కట్ చేసినట్టుగా గుండ్రంగా కట్ చేసుకోవాలి.
• అంతే రవ్వ రోల్స్ తయారయినట్టే. వీటిని ఉదయాన్నే బ్రేక్‌ఫాస్ట్‌గా అయినా తినచ్చు. సాయంత్రం స్నాక్స్ రూపంలో అయినా తీసుకోవచ్చు. పిల్లలకు బాక్సుల్లో పెట్టి పంపించచ్చు. ఎప్పుడు చేసినా ఇది మీ ఇంట్లో వాళ్లకి, ముఖ్యంగా పిల్లలకు కచ్చితంగా నచ్చుతుంది.