Pumpkin Pulusu: గుమ్మడికాయ ముక్కల పులుసు ఇలా పెట్టి చూడండి.. పర్ఫెక్ట్‌గా వస్తుంది..

గుమ్మడికాయతో కూర ఎలా చేయాలో తెలియట్లేదా. చాలా రుచిగా పులుసుపెట్టి చేసి చూడండి. చింతపండు రసంలో గుమ్మడి కాయ ముక్కలు ఉడికించి చేసుకునే ఈ కూర అన్నం, చపాతీలోకి కూడా బాగుంటుంది. తయారీ ఎలాగో తెలుసుకోండి.

కావాల్సిన పదార్థాలు:

2 కప్పుల గుమ్మడికాయ ముక్కలు

2 పచ్చిమిర్చి

నిమ్మకాయ సైజంత చింతపండు

2 చెంచాల బెల్లం

1 చెంచా బియ్యం పిండి

1 చెంచా కారం

పావు చెంచా పసుపు

తగినంత ఉప్పు

కొద్దిగా కొత్తిమీర తరుగు

2 చెంచాల నూనె

సగం చెంచా ఆవాలు

సగం చెంచా జీలకర్ర

1 ఎండుమిర్చి

పావు చెంచా ఇంగువ

1 కరివేపాకు రెబ్బ

తయారీ విధానం:

1. ఒక కడాయిలో గుమ్మడికాయ ముక్కలు, పచ్చిమిర్చి ముక్కలు, పసుపు వేసుకుని ముక్కలు మునిగేనన్ని నీళ్లు పోసుకుని మూత పెట్టుకోవాలి.
2. ఈ ముక్కల్ని పది నిమిషాల పాటూ ఉడకనివ్వాలి. అందులోనే కారం, ఉప్పు కూడా కలుపుకోవాలి.
3. ఈ లోపు చింతపండు నానబెట్టుకుని గుజ్జు తీసుకుని పక్కన పెట్టుకోవాలి. ఈ రసాన్ని గుమ్మడికాయ ముక్కల్లో పోసుకోవాలి. ఒక 5 నిమిషాల పాటూ ముక్కల్ని పులుసులో ఉడకనివ్వాలి.
4. అందులోనే కొద్దిగా బెల్లం కూడా వేసుకుని బాగా కలుపుకోవాలి. అంతా ఉడికిపోయాక ఒక చెంచా బియ్యంపిండిలో నీళ్లు కలుపుకుని ఆ మిశ్రమాన్ని పులుసులో పోసుకోవాలి.
5. స్టవ్ కట్టేసి కొత్తిమీర తరుగు కూడా చల్లుకుని దింపేయాలి.
6. మరో చిన్న కడాయిలో రెండు చెంచాల నూనె పోసుకుని వేడెక్కాక ఆవాలు, జీలకర్ర, ఎండుమిర్చి, ఇంగువ కరివేపాకు వేసి తాలింపు పెట్టుకోవాలి.
7. ఈ తాలింపును ముక్కల పులుసులో కలుపుకుంటే సరి. గుమ్మడికాయ ముక్కల పులుసు రెడీ అయినట్లే.