Know about Quinoa: అన్నం బదులు క్వినోవా తింటే షుగర్ తగ్గుతుందా? తెలుసుకోండి..
Know about Quinoa: డయాబెటిస్ పేషెంట్లు క్వినోవా తినడం మంచిదా కాదా అనే సందేహం ఉంటుంది. దానిలో పోషకాల గురించి వివరంగా తెలుసుకోండి.
మనం తరతరాల నుంచి బియ్యం అన్నం తినడానికి అలవాటు పడ్డాం. ఎక్కువ అన్నంతో తక్కువ కూర వేసుకుని తినడం వల్ల రక రకాల ఆరోగ్య సమస్యలు తలెత్తుతున్నాయి. వాటిలో అతి ముఖ్యమైనది మధుమేహం. ఈ మధ్య కాలంలో పూర్తిగా తెల్లటి బియ్యాన్ని అంతా తింటున్నారు. ఎక్కువగా పాలిష్‌ చేసేయడం వల్ల దీనిలో పీచు పదార్థం బాగా తగ్గిపోతుంది. అందువల్ల ఇది సరళ పిండి పదార్థంగా మారుతుంది. తొందరగా అరిగిపోయి ఒక్కసారిగా రక్తంలో గ్లూకోజ్‌ శాతాన్ని పెంచేస్తుంది. కొన్ని రోజుల పాటు ఇదే కొనసాగుతూ ఉంటే ఇన్సులిన్‌ సెన్సిటివిటీ తగ్గిపోయి క్రమంగా అది మధుమేహానికి దారి తీస్తుంది. ఈ నేపథ్యంలో గత కొంత కాలంగా ఆరోగ్యంపై ఎక్కువగా దృష్టి పెట్టే వారు క్వినోవా తినేందుకు మొగ్గు చూపుతున్నారు. మరి అన్నంతో పోలిస్తే దీని వల్ల ఎక్కువగా ఆరోగ్య ప్రయోజనాలు ఉంటాయా? అంటే ఔననే అంటున్నారు పోషకాహార నిపుణులు.
క్వినోవాలో పోషకాలు :
ఓ కప్పు క్వినోవా అన్నాన్ని తినడం వల్ల మనకు 222 క్యాలరీలు లభిస్తాయి. అలాగే 8 గ్రాముల ప్రొటీన్‌, 39 గ్రాముల కార్బోహైడ్రేట్‌లు, 5 గ్రాముల పీచు పదార్థాలు, 3.55 గ్రాముల కొవ్వులు దొరుకుతాయి. ఫోలేట్‌, విటమిన్‌ బీ6, విటమిన్‌ ఈ, కాపర్‌, జింక్‌, ఐరన్‌, మాంగనీసు వంటివి లభిస్తాయి.
క్వినోవాతో ప్రయోజనాలు :
- తక్కిన ధాన్యాలతో పోలిస్తే దీనిలో పీచు పదార్థాలు అధికంగా ఉంటాయి. బ్రౌన్‌ రైస్‌లో కంటే వీటిలోనే ఎక్కువ. అందువల్ల ఇవి జీర్ణ వ్యవస్థను బలోపేతం చేస్తాయి. మల బద్ధకం సమస్యలను దూరం చేస్తాయి. పేగుల్లో వాపుల్లాంటివి ఉంటే తగ్గుతాయి. అక్కడ మంచి బ్యాక్టీరియాలను పెరిగేలా చేస్తాయి. అలాగే ఈ పీచు పదార్థాల వల్ల కొంచెం తినే సరికి కడుపుకు నిండుగా అనిపిస్తుంది. తొందరగా ఆకలి కాదు. అందువల్ల బరువు తగ్గాలనుకునే వారు దీన్ని ప్రయత్నించవచ్చు. దీన్ని తినడం వల్ల ఊబకాయ సమస్య దరి చేరకుండా ఉంటుంది.
- ఇది ముఖ్యంగా గ్లూటెన్‌ ఫ్రీ. మధుమేహ వ్యాధిగ్రస్తులు దీన్ని తినడం వల్ల ఫలితం ఉంటుంది. టైప్‌ టూ డయాబెటీస్‌ రాకుండా ఉంటుంది. గుండె జబ్బుల ప్రమాదం చాలా వరకు తగ్గుతుంది.
- రోజు వారీ అవసరాలకు సరిపడా ప్రొటీన్‌ని అందించడంలో క్వినోవా ముఖ్య పాత్ర వహిస్తుంది. అదే వరి అన్నంలో అయితే దీని శాతం తక్కువగా ఉంటుంది.
- 2020లో 40 మంది పెద్దవారికి రోజుకో క్వినోవా బిస్కెట్‌ని (15 గ్రాములు) ఇచ్చి చూశారు. 28 రోజుల పాటు ఈ బిస్కెట్‌ని ఇచ్చే సరికి వారిలో చెడు కొలస్ట్రాల్‌ చెప్పుకోదగ్గ స్థాయిలో తగ్గింది. దీంతో ఇది కొలస్ట్రాల్‌ని తగ్గుస్తుందని పరిశోధకులు తేల్చారు.