Fertility score: మీ సంతాన సామర్థ్యం స్కోర్ చెప్పే టెస్ట్, ఆలస్యంగా పిల్లలు కనాలనుకుంటే మీకొక వరమిది..
Fertility score: మీరు పిల్లలు కనడం వాయిదా వేయాలనుకుంటే ఏ‌ఎమ్‌హెచ్ టెస్టు తక్కువ వయసులోనే చేసుకోవడం వల్ల మీ సంతాన సామర్థ్యం గురించి స్పష్టంగా తెలుస్తుంది. దీని పూర్తి వివరాలు తెల్సుకోండి.
ఉద్యోగంలో భవిష్యత్తు ప్రణాళికల వల్లనో, ఆర్థికంగా మంచి స్థితిలో లేమనే కారణం చేతనో చాలా మంది పిల్లలు కనడాన్ని వాయిదా వేస్తున్నారు. ఈ రెండే కాక కాస్త ఆలస్యంగానే పిల్లలు కనాలి అనుకోడానికి కారణాలు చాలా ఉన్నాయి. అయితే అలా ఆలస్యం చేస్తే పిల్లలు పుట్టరేమో అనే సందేహం, భయం కూడా లోలోపల ఉంటాయి. ఆ భయం లేకుండా ఒక స్పష్టత రావాలంటే యాంటీ ముల్లెరియన్ హార్మోన్( ఏ‌ఎమ్‌హెచ్) టెస్ట్ చేయించుకోవచ్చు. ఇది ఒక ఫర్టిలిటీ స్కోర్ అనుకోండి.
ఏ‌ఎమ్‌హెచ్ అంటే ఏంటి?
ఒక చిన్న ఉదాహరణతో ఏ‌ఎమ్‌హెచ్ గురించి అర్థం చేసుకుందాం. మీ అండాశయాలను అండాలు ఉండే ఒక లైబ్రరీ అనుకోండి. యాంటీ ముల్లెరియన్ హార్మోన్( ఏ‌ఎమ్‌హెచ్) అనేది ఈ ఎదుగుతున్న అండాల నుంచి విడుదలవుతుంది. లైబ్రరీకి లైబ్రేరియన్ పుస్తకాల సంఖ్య ఎలా తెలియజేస్తాడో, అలాగే ఈ యాంటీ ముల్లెరియన్ హార్మోన్ అండాల సంఖ్యను తెలియజేస్తుంది. ఏ‌ఎమ్‌హెచ్ ఎక్కువగా ఉంటే అండాల సంఖ్య ఎక్కువగా ఉందని, తక్కువంటే తక్కువ సంఖ్య అని తెలియజేస్తుంది. వయసు బట్టి సాధారణంగానే ఏ‌ఎమ్‌హెచ్ స్థాయులు తగ్గుతాయి. కానీ కొందరిలో ఇరవై నుంచి ముప్ఫై వచ్చే మధ్య వయసులోనే ఈ స్థాయులు తక్కువగా ఉంటాయి. కాబట్టి భవిష్యత్తులో సంతాన సాఫల్యత అవకాశాలు, ప్రభావాలు ఇది తెలియజేస్తుంది.
మీ 20 లలో ఏ‌ఎమ్‌హెచ్ కోసం ఎందుకు పరీక్షించుకోవాలి?
- సాధికారత: మీ సంతానోత్పత్తి సామర్థ్యాన్ని అర్థం చేసుకోవడం వల్ల మీ భవిష్యత్తు కుటుంబ నియంత్రణ గురించి నిర్ణయాలు తీసుకోవడానికి మీకు అవకాశం ఉంటుంది.
- సరైన చర్యలు: ఎఎమ్హెచ్ స్థాయిలు తక్కువగా ఉంటే, ఈ విషయం ముందుగానే తెలుస్తుంది. దాంతో పునరుత్పత్తి ఆరోగ్యానికి మెరుగుపర్చుకోడానికి కావాల్సిన జాగ్రత్తలు ముందు నుంచే తీసుకునేలా సాయపడుతుంది.
- మానసిక ప్రశాంతత: పిల్లలను కనడం ఆలస్యం చేయాలనుకుంటే మీ ఏ‌ఎమ్‌హెచ్ గురించి తెలుసుకోవడం వల్ల కాస్త ప్రశాంతత దొరుకుతుంది. సంతాన లేమి గురించి భయం తగ్గుతుంది.
ఏ‌ఎమ్‌హెచ్ స్థాయిలను ఏం ప్రభావితం చేస్తుంది?
- ఆహారం: ప్రాసెస్ చేసిన ఆహారాలు, చక్కెర పానీయాలు, అనారోగ్యకరమైన కొవ్వులు అధికంగా ఉన్న ఆహారం హార్మోన్ల సమతుల్యతను దెబ్బతీస్తుంది, ఇది ఏ‌ఎమ్‌హెచ్ ను ప్రభావితం చేస్తుంది.
- అంతర్లీన పరిస్థితులు: అండాశయ తిత్తులు, ఎండోమెట్రియోసిస్ లేదా అండాశయ శస్త్రచికిత్స చరిత్ర వంటి కొన్ని ఆరోగ్య సమస్యలు ఎఎంహెచ్ ఉత్పత్తిని ప్రభావితం చేస్తాయి.
- జన్యు పరంగా..: ఇతర లక్షణాల మాదిరిగానే, ఏ‌ఎమ్‌హెచ్ స్థాయిలు మీ జన్యువుల ద్వారా ప్రభావితమవుతాయి.
- ఒత్తిడి: దీర్ఘకాలిక ఒత్తిడి ఏ‌ఎమ్‌హెచ్ తో సహా మీ హార్మోన్లపై విపరీత ప్రభావం చూపుతుంది. అధిక స్థాయి ఒత్తిడి హార్మోన్లు ఏ‌ఎమ్‌హెచ్ ఉత్పత్తిని తగ్గిస్తాయి.
- ఆటో ఇమ్యూన్ వ్యాధులు: ఈ అనారోగ్య పరిస్థితులు కొన్నిసార్లు అండాశయాలు మరియు ఏ‌ఎమ్‌హెచ్ స్థాయిలను ప్రభావితం చేస్తాయి.
ఏ‌ఎమ్‌హెచ్ స్థాయిలను మెరుగుపరచుకోవచ్చా?
ఏ‌ఎమ్‌హెచ్ స్థాయులు పెంచుకోడానికి కచ్చితమైన మార్గం లేనప్పటికీ, కొన్ని జీవనశైలి మార్పులు హార్మోన్ల ఆరోగ్యానికి మద్దతు ఇస్తాయి. మీ సంతానోత్పత్తి సామర్థ్యాన్ని మెరుగుపరుస్తాయి.
- సమతుల్య ఆహారం: పండ్లు, కూరగాయలు, తృణధాన్యాలు, లీన్ ప్రోటీన్ అధికంగా ఉండే ఆహారం తీసుకోవాలి. బెర్రీలు, విటమిన్ డి అధికంగా ఉండే ఆహారాలు తినాలి. ఇవి మెరుగైన సంతానోత్పత్తి ఫలితాలతో ముడిపడి ఉంటాయి. హార్మోన్ల సమతుల్యత కోసం అవకాడో వంటి ఆరోగ్యకరమైన కొవ్వులను చేర్చుకోవాలి.
- ఇవి తగ్గించండి: చక్కెర పానీయాలు, ప్రాసెస్ చేసిన ఆహారాలు, అనారోగ్యకర కొవ్వులను తినకండి. ఇవి మీ హార్మోన్ల సమతుల్యతను దెబ్బతీస్తాయి, ఏ‌ఎమ్‌హెచ్ ను తగ్గిస్తాయి.
- ఒత్తిడి: యోగా, ధ్యానం లేదా శ్వాస వ్యాయామాలు వంటి ఒత్తిడిని తగ్గించే పద్ధతులను అభ్యసించండి.
- వ్యాయామం: వ్యాయామం మొత్తం ఆరోగ్యాన్ని మెరుగుపరుస్తుంది. నెలసరి క్రమంగా వచ్చేలా చేస్తుంది . ఇది సంతానోత్పత్తికి సానుకూల సంకేతం.
- వైద్యుడిని సంప్రదించండి: మీరు ఎఎంహెచ్ కోసం పరీక్ష చేసుకోవాలని ఆలోచిస్తుంటే, మీ సంతానోత్పత్తి గురించి ఆందోళనలు ఉంటే, వైద్యులను సంప్రదించండి. మీ డాక్టర్ మీ వ్యక్తిగత పరిస్థితిని అంచనా వేస్తారు. కొన్ని పరీక్షలను సిఫారసు చేస్తారు.