9-1 Rule: ఈ తొమ్మిది అంకెలతో.. మీ జీవితం మారిపోతుంది..
9-1 Rule: ఒకటి నుంచి తొమ్మిది దాకా ప్రతి అంకె ఒక ఆరోగ్య సూత్రం చెబుతుంది. వాటిని గుర్తుపెట్టుకుని పాటిస్తే మంచి లాభాలు పొందొచ్చు.
రోజూ ఎంత సమయం నిద్రపోవాలి? ఎన్ని నీళ్లు తాగాలి? అసలు రోజూవారీ జీవితం ఎలా ఉంటే ఆరోగ్య సమస్యలు రావు అనే సందేహం వస్తూ ఉంటుంది. ఎలాంటి గజిబిజి లేకుండా ఈ 9-1 రూల్ గుర్తుంచుకోండి. ఒక్కో అంకె ఒక్కో ఆరోగ్య సూత్రం చెబుతుంది. అవేంటో వివరంగా తెల్సుకోండి. ఈ తొమ్మిది అంకెలు గుర్తుంచుకుంటే మీరు రోజూవారీ చేసే ప్రతి విషయంలో స్పష్టత ఉంటుంది.
9:
నంబర్ 9 మీరు నడవాల్సిన అడుగులను సూచిస్తుంది. అంటే రోజుకు కనీసం 9000 అడుగులు వేస్తే ఆరోగ్యం మీ సొంతమవుతుంది.
8:
ప్రతి రోజూ ఎన్ని నీళ్లు తాగాలని నంబర్ 8 సూచిస్తుంది. అంటే రోజుకు కనీసం 8 గ్లాసుల నీళ్లు తప్పకుండా తాగితే డిహైడ్రేషన్ సమస్య ఉండదు. నీళ్లు కనీసం ఇన్ని తాగాలని గుర్తుంచుకున్నా కూడా దీనికే పరిమితం అవ్వక్కర్లేదు. మీకు దాహం వేసిన ప్రతిసారి ఆగకుండా నీళ్లు తాగడమే మంచి సూత్రం.
7:
రోజుకు కనీసం 7 గంటల నిద్ర తప్పకుండా ఉండాలి. దానివల్ల రోజంతా ఉత్సాహంగా ఉండగలుగుతారు. నిద్రలేమి వల్ల దాని ప్రభావం రోగ నిరోధక శక్తి మీద, రోజంతా మీరు చేసే పనుల మీద కూడా పడుతుందని గుర్తుంచుకోండి.
6:
ఆరు నిమిషాలు ధ్యానం చేయడం మీ రోజూవారీ దినచర్యలో భాగం చేసుకోవాలి. దీనివల్ల ప్రశాంతత పెరుగుతుంది. లేదా మీ ఇష్ట దైవం ముందు కూర్చుని కనీసం 6 నిమిషాలన్నా కళ్లు మూసుకుని ప్రార్థన చేస్కోండి.
5:
తాజా కూరగాయలు, పండ్ల ముక్కలు రోజుకు 5 సార్లు కొద్దికొద్దిగా అయినా తినాలి. తాజా ఆహారం మీ జీవితంలో భాగం అయిపోవాలి. అంటే మీరు అన్నం తినేటప్పుడు పక్కన కీరా, ఉల్లిపాయ, టమాటా ముక్కలు తినడం. లేదంటే ఏవైనా పండ్ల ముక్కలు, సలాడ్లు తినడం అలవాటు చేసుకోవాలి.
4:
రోజంతా కూర్చునే పనిచేసేవాళ్లు కనీసం పని మధ్యలో 4 చిన్న బ్రేకులు తీసుకోవాలి. ఎక్కువ సేపు అక్కర్లేదు. అలా కాసేపు నడిచి వచ్చి మళ్లీ మీ పని మొదలు పెట్టొచ్చు. అస్సలే కదలకుండా కూర్చోవడం మంచిది కాదు.
3:
రోజుకు 3 సార్లు కడుపునిండా తినడం మర్చిపోవద్దు. ఎట్టి పరిస్థితుల్లో అల్పాహారం తినాలి. ఏమీ తినకుండా పడుకోవడం కూడా మంచిది కాదు.
2:
మీరు రాత్రి పూట భోజనం చేసిన తర్వాత కనీసం 2 గంటల తర్వాత మాత్రమే నిద్ర పోవాలి. అంటే మీ భోజనానికి, నిద్రకి కనీసం రెండు గంటల విరామం ఉండాలి. పూర్తిగా ఆహారం జీర్ణం అవుతుంది. ప్రశాతంగా నిద్ర పడుతుంది.
1:
రోజూ కనీసం ఏదో ఒకటి శారీరక శ్రమ ఉండేలా చూడాలి. ఏదైనా ఒక ఆట ఆడటం, లేదా జిమ్ వెళ్లడం, డ్యాన్స్ చేయడం.. ఏదో ఒకటి తప్పకుండా చేయడం అలవాటు చేసుకోండి.
ఈ తొమ్మిది అంకెలను, అవి చెప్పే ఆరోగ్య సూత్రాలు గుర్తుంచుకోండి. సింపుల్ గా అన్నీ ఫాలో అయిపోవచ్చు.
