ఆన్‌లైన్‌లో మీ పిల్లలు సురక్షితమేనా? డేటింగ్ యాప్‌ల చీకటి కోణాన్ని బయటపెట్టిన కేరళ ఘటన

ఆన్‌లైన్ డేటింగ్ యాప్‌లలో ఉన్న ప్రమాదాలను, వాటి చీకటి కోణాన్ని బహిర్గతం చేస్తూ కేరళలో జరిగిన ఒక సంచలన కేసు దేశవ్యాప్తంగా కలకలం రేపింది. 16 ఏళ్ల బాలుడు లైంగిక వేధింపులకు గురికావడంతో, తల్లిదండ్రులు తమ పిల్లల ఆన్‌లైన్ భద్రత గురించి తీవ్రంగా ఆలోచించాల్సిన పరిస్థితి ఏర్పడింది.

ప్రభుత్వ ఉద్యోగులతో సహా 14 మంది అరెస్ట్

డేటింగ్ యాప్ ద్వారా పరిచయం పెంచుకున్న తరువాతే ఈ దాడి జరిగిందని పోలీసులు గుర్తించారు. ఈ దారుణానికి పాల్పడిన వారిలో ప్రభుత్వ ఉద్యోగులతో సహా మొత్తం 14 మందిని పోలీసులు అరెస్ట్ చేసి, వారిపై లైంగిక వేధింపుల అభియోగాలు మోపారు.

గత నెలలో ఈ దర్యాప్తు కొనసాగుతుండగా, బాధిత బాలుడు దాదాపు రెండేళ్లుగా నకిలీ ప్రొఫైళ్లను ఉపయోగించి ఆ ప్లాట్‌ఫామ్‌లో చురుగ్గా ఉన్నట్లు తేలింది. ప్రస్తుతం ఆ బాలుడు సురక్షితంగా ఉన్నాడు.

పెరుగుతున్న ఆన్‌లైన్ వేధింపుల కేసులు

నిజానికి, ఇలాంటి దారుణమైన వేధింపుల ఘటనలు పోలీసులకు కొత్తేమీ కాదు. ఆన్‌లైన్ నేరాలు, ముఖ్యంగా పిల్లలను లక్ష్యంగా చేసుకునే నేరాలు రోజురోజుకు పెరిగిపోతున్నాయని పోలీస్ వర్గాలు చెబుతున్నాయి.

ఈ తరహా నేరాలన్నీ తాము క్రమం తప్పకుండా ఎదుర్కొనే కొన్ని నిర్దిష్ట నమూనాలలోకే వస్తాయని పోలీసులు తెలిపారు. ఆన్‌లైన్ గేమ్‌లు, సోషల్ మీడియా, పోర్నోగ్రఫీకి బానిసలైన పిల్లలను గుర్తించి, వారికి చికిత్స అందించే లక్ష్యంతో రూపొందించిన డిజిటల్ డి-అడిక్షన్ ప్రోగ్రామ్ (D-DAD) ద్వారా తమకు ఈ విషయం స్పష్టమైందని పేర్కొన్నారు.

దేశంలోనే తొలి డి-డాడ్ (D-DAD) ప్రాజెక్ట్

2023లో ప్రారంభించిన ఈ D-DAD ప్రాజెక్ట్, దేశంలోనే ఈ తరహాలో తొలి కార్యక్రమం కావడం విశేషం.

ప్రస్తుతం, తిరువనంతపురం, కొల్లం, కొచ్చి, త్రిస్సూర్, కోజికోడ్, కన్నూర్ జిల్లాలలో ఆరు D-DAD కేంద్రాలు పనిచేస్తున్నాయి. తల్లిదండ్రులు, పాఠశాలలు, బాలల హక్కుల కార్యకర్తల నుంచి వస్తున్న మంచి స్పందనతో.. 2025-26 ఆర్థిక సంవత్సరం ముగిసేలోపు ఈ కార్యక్రమాన్ని పతనంతిట్ట, ఆలప్పుళ, కొట్టాయం, పాలక్కాడ్, మలప్పురం, వాయనాడ్, ఇడుక్కి, కాసరగోడ్ జిల్లాలకు విస్తరించాలని పోలీసులు యోచిస్తున్నారు.

అధికారిక డేటా ప్రకారం, మార్చి 2023 నుంచి జూలై 2025 మధ్యకాలంలో, D-DAD కేంద్రాలు డిజిటల్ వ్యసనానికి సంబంధించిన 1,992 కేసులను పరిష్కరించాయి. వీటిలో 571 కేసులు ప్రత్యేకంగా ఆన్‌లైన్ గేమ్‌లకు బానిసలైన పిల్లలకు సంబంధించినవి.

బాలురు ఆన్‌లైన్ గేమ్‌లకు, బాలికలు సోషల్ మీడియాకు అడిక్ట్

ఎర్నాకులం స్టూడెంట్ పోలీస్ క్యాడెట్ ప్రాజెక్ట్ నోడల్ ఆఫీసర్, జిల్లా D-DAD కేంద్రం కో-ఆర్డినేటర్ అయిన సూరజ్ కుమార్ ఎం బి మాట్లాడుతూ, ఈ కార్యక్రమం వందలాది మంది పిల్లలకు సరైన సమయంలో సహాయం అందించిందని తెలిపారు.

"మా పరిశీలనలో ఒక అంశం స్పష్టంగా కనిపిస్తోంది. బాలురు ఎక్కువగా ఆన్‌లైన్ గేమ్‌లకు బానిసలు అవుతుండగా, బాలికలు మాత్రం సోషల్ మీడియా ప్లాట్‌ఫామ్‌లకు ఎక్కువగా ఆకర్షితులవుతున్నారు. మా కౌన్సెలర్లు ఈ అలవాట్ల నుంచి బయటపడటానికి ఆచరణాత్మక మార్గాలను సూచించడంతో పాటు, ఈ ప్రక్రియలో తల్లిదండ్రులను కూడా భాగస్వాములను చేస్తున్నారు" అని ఆయన 'పీటీఐ' వార్తా సంస్థకు వివరించారు.

మారుతున్న తల్లిదండ్రుల వైఖరి

ఈ ప్రాజెక్ట్ సాధించిన ప్రధాన విజయాలలో ఒకటి.. తల్లిదండ్రుల వైఖరిలో మార్పు తీసుకురావడం అని సూరజ్ పేర్కొన్నారు. "గతంలో చాలా కుటుంబాలు.. మద్యం లేదా మాదకద్రవ్యాల మాదిరిగా మొబైల్ ఫోన్ వాడకాన్ని ఒక వ్యసనంగా అంగీకరించడానికి నిరాకరించాయి. కానీ, ఇప్పుడు కేసులు ఎక్కువగా నమోదవుతుండటంతో, డిజిటల్ వ్యసనం అనేది నిజం అని తల్లిదండ్రులు గుర్తించారు. తమ పిల్లలు దాని నుంచి బయటపడాలని కోరుకుంటున్నారు" అని ఆయన అన్నారు.

ఈ ఏడాది జూలైలో గడువు ముగిసిన కేంద్రాల కౌన్సెలర్ల ఒప్పందాలను రాష్ట్ర ప్రభుత్వం ఇటీవల పునరుద్ధరించింది. పెరుగుతున్న డిమాండ్‌ను తీర్చడానికి అదనపు సిబ్బందిని నియమించే ప్రక్రియ కొనసాగుతోంది.

డిజిటల్ దుర్వినియోగంతో 41 మంది చిన్నారుల ఆత్మహత్య

పిల్లలలో అధిక మొబైల్, ఇంటర్నెట్ వినియోగంపై ఇటీవల రాష్ట్ర అసెంబ్లీ సమావేశంలో కూడా ఆందోళన వ్యక్తం అయింది. ఎమ్మెల్యే కె జె మాక్సీ అడిగిన ప్రశ్నకు ముఖ్యమంత్రి పినరయి విజయన్ సమాధానమిస్తూ.. జనవరి 2021 నుంచి సెప్టెంబర్ 9, 2025 మధ్యకాలంలో, మొబైల్ ఫోన్‌లు, ఇంటర్నెట్‌ల దుర్వినియోగం కారణంగా 41 మంది చిన్నారులు ఆత్మహత్య చేసుకున్నట్లు వెల్లడించారు.

అదే సమయంలో, డిజిటల్ ప్లాట్‌ఫామ్‌ల దుర్వినియోగంతో ముడిపడి ఉన్న లైంగిక లేదా మాదకద్రవ్యాల సంబంధిత నేరాలలో 30 మంది పిల్లలు చిక్కుకున్నారని, వారిని గుర్తించి చట్టపరమైన చర్యలు తీసుకున్నట్లు కూడా ఆయన తెలిపారు.

మైనర్ల వలలో డేటింగ్ యాప్‌లు: నిపుణుల హెచ్చరిక

సైబర్ చట్టాల నిపుణుడు, 'సైబర్ సురక్ష ఫౌండేషన్' వ్యవస్థాపకుడు అడ్వకేట్ జియాస్ జమాల్, D-DAD కార్యక్రమాన్ని ఇతర రాష్ట్రాలు తప్పనిసరిగా అనుసరించవలసిన ఒక ఆదర్శప్రాయమైన నమూనాగా అభివర్ణించారు. అయితే, మైనర్లలో డేటింగ్ యాప్‌ల దుర్వినియోగం పెరుగుతున్న తీరు తీవ్రమైన సవాలు విసురుతోందని ఆయన హెచ్చరించారు.

"డేటింగ్ యాప్‌లు 18 ఏళ్లు పైబడిన పెద్దల కోసం మాత్రమే ఉద్దేశించినప్పటికీ, అవి టీనేజర్లలో ప్రజాదరణ పొందుతున్నాయి. బలహీనమైన ధృవీకరణ చర్యల కారణంగా మైనర్ వినియోగదారులు కూడా సులభంగా లోపలికి ప్రవేశిస్తున్నారు. ఈ యాప్‌లు త్వరగా అక్రమ కార్యకలాపాలు, బాలల దోపిడీకి అడ్డాగా మారుతున్నాయి" అని ఆయన వివరించారు.

చాలా డేటింగ్ యాప్‌లు విదేశీ సర్వర్‌ల నుంచి అక్రమంగా పనిచేస్తున్నాయని, సోషల్ మీడియాలో టార్గెటెడ్ ప్రకటనల ద్వారా తమను తాము దూకుడుగా ప్రచారం చేసుకుంటున్నాయని జమాల్ ఎత్తిచూపారు. "ఈ ప్రకటనలను ప్రసారం చేసే ప్లాట్‌ఫామ్‌లు కూడా జవాబుదారీగా ఉండాలి. ఆన్‌లైన్ గేమింగ్‌ను నియంత్రించడానికి కేంద్ర ప్రభుత్వం ఎలాగైతే నిబంధనలు తీసుకొచ్చిందో, సోషల్ మీడియా, డేటింగ్ యాప్‌లకు కూడా అలాంటి కఠిన నిబంధనలు అవసరం" అని ఆయన అభిప్రాయపడ్డారు.

పిల్లలు తరచుగా ఈ డేటింగ్ యాప్‌ల ద్వారా ట్రాప్‌లలో చిక్కుకుపోతున్నారని, డబ్బు కోసం బ్లాక్‌మెయిల్ చేయబడుతున్నారని లేదా అక్రమ కార్యకలాపాలలోకి బలవంతంగా నెట్టబడుతున్నారని జమాల్ తెలిపారు. "తమ పిల్లలు డబ్బు పోగొట్టుకున్న తర్వాత మాత్రమే ట్రాప్‌లో పడ్డారని గ్రహించిన తల్లిదండ్రుల నుంచి నేను చాలా కేసులు అందుకున్నాను. కొంతమంది లైంగిక కార్యకలాపాలు, పోర్నోగ్రఫీ, మాదక ద్రవ్యాల వ్యాపారం కోసం పిల్లలను దోపిడీ చేస్తున్నారు" అని ఆయన ఆవేదన వ్యక్తం చేశారు.

తల్లిదండ్రుల బాధ్యత

పోలీసులతో పాటు, మహిళా శిశు అభివృద్ధి శాఖ (WCD), విద్యా శాఖ కూడా పిల్లలు, తల్లిదండ్రులు డిజిటల్ వ్యసనాలను అధిగమించడానికి అనేక కార్యక్రమాలను నిర్వహిస్తున్నాయి.

WCD అధికారులు మాట్లాడుతూ, విద్యార్థులలో డిజిటల్ వ్యసనంతో సహా పిల్లలు ఎదుర్కొంటున్న సమస్యలపై అవగాహన కార్యక్రమాలు నిర్వహించడానికి రాష్ట్రవ్యాప్తంగా 1,227 పాఠశాలల్లో 'పిల్లల పట్ల మా బాధ్యత' (Our Responsibility to Children) అనే కార్యక్రమాన్ని ప్రవేశపెట్టినట్లు చెప్పారు.

విద్యా శాఖ సమన్వయంతో, అవసరమైన పిల్లలకు వృత్తిపరమైన సహాయం అందించడానికి 1,012 పాఠశాలల్లో సైకో-సోషల్ కౌన్సెలర్లను నియమించినట్లు వారు తెలిపారు.

"ఇది కాకుండా, మేము బ్లాక్ పంచాయతీ స్థాయిలో 'పేరెంటింగ్ క్లినిక్‌లు' కూడా ప్రారంభించాం. 'వల్నరబిలిటీ మ్యాపింగ్' అనే మరొక కార్యక్రమాన్ని తిరువనంతపురం జిల్లాలోని ఒక పంచాయతీలో అమలు చేస్తున్నారు. దీని ద్వారా ప్రమాదంలో ఉన్న పిల్లలను గుర్తించి, అవసరమైన చర్యలు తీసుకుంటాం" అని ఒక WCD అధికారి వివరించారు.