ఇలాంటి పనులు చేస్తే మీరు మీ పిల్లలను చెడగొడుతున్నట్టే, జాగ్రత్త పడండి

తల్లిదండ్రులు కావడం ఒక ప్రత్యేకమైన అనుభూతి మాత్రమే కాదు పెద్ద బాధ్యత కూడా. పిల్లలను సంతోషంగా ఉంచడానికే పేరెంట్స్ ఎన్నో నిర్ణయాలు తీసుకుంటారు. కానీ వారు చేసే కొన్ని పనులు పిల్లల్ని చెడగొట్టడం ప్రారంభిస్తాయి.

పిల్లలు అడిగే ప్రతిదీ అంగీకరించడం, వారు తప్పులను చూసి కూడా మౌనంగా ఉండటం లేదా వారికి అతిగా ప్రేమను అందించడం వంటివన్నీ కూడా పిల్లల అభివృద్ధిపై చెడు ప్రభావాన్ని చూపుతాయి. అటువంటి పరిస్థితిలో మీరు పేరెంటింగ్ శైలిని మార్చుకోవాల్సి వస్తుంది. మీ పిల్లలను మీ ప్రేమతో చెడు మార్గంలోకి తీసుకెళ్లడం మంచిది కాదు. సంతాన శైలి అలా ఉంటే వెంటనే మీరు మార్చుకోవాల్సిన అవసరం ఉంది.

పిల్లల ప్రతి కోరికను తీర్చడం

పిల్లలను పోషించడం, వారి అవసరాలను తీర్చడం, ప్రేమను అందించడం తల్లిదండ్రుల బాధ్యత. కానీ దీని అర్థం మీరు మీ పిల్లల ప్రతి కోరికను నెరవేర్చమని కాదు. ఇలా పిల్లల ప్రతి కోరికను నెరవేర్చడం ద్వారా, మీరు వారిని చెడగొట్టే అవకాశాలే ఎక్కువ. దీని వల్ల పిల్లవాడు మొండిగా మారతాడు. దీని వల్ల అతని ప్రవర్తన మారిపోతుంది. అతను పెద్దయ్యాక సామాజికంగా జీవించేందుకు కష్టపడతాడు.

క్రమశిక్షణ లోపించడం

మీరు మీ పిల్లలను తప్పులను ప్రశ్నంచి మందలించకపోతే అది వారి ప్రవర్తననే మార్చేస్తుంది. ప్రతిసారీ సాకులు చెప్పి వారిని కాపాడితే, అది నిర్లక్ష్యపు పెంపకానికి సంకేతం. పిల్లలకు క్రమశిక్షణ నేర్పడం ఎంత ముఖ్యమో వారికి ప్రేమను ఇవ్వడం కూడా అంతే ముఖ్యం. పిల్లలకి మంచి చెడుల మధ్య వ్యత్యాసాన్ని వివరించడం తల్లిదండ్రుల ప్రాథమిక బాధ్యత. పిల్లల తప్పులను విస్మరించే బదులు, వారు తమ తప్పును గ్రహించేలా చేయండి. అవసరమైతే వారికి శిక్ష విధించండి.

అతి సంరక్షణ వద్దు

కొంతమంది తల్లిదండ్రులు తమ పిల్లలను అతిగా సంరక్షించే అలవాటు కలిగి ఉంటారు. ఎప్పుడూ పిల్లల వెనుకే ఉండటం, ప్రతి పని తామే చేయడం, చిన్నా పెద్ద సమస్యలనూ కూడా తామే పట్టించుకోవడం వంటి పనులు చేస్తే పిల్లలు ధీమాగా ఉంటారు. ఏ తప్పు చేసినా తమ పేరెంట్స్ చూసుకుంటారనే భావన వారిలో వచ్చేస్తుంది. దీనివల్ల పిల్లలు స్వయం సమృద్ధి సాధించలేకపోతారు. ఈ కారణంగా, పిల్లల్లో ఆత్మవిశ్వాసం లోపిస్తుంది. అతను జీవితంలో ఎదురయ్యే సవాళ్లను ఎదుర్కోలేడు.

తమ పిల్లల తప్పులను ఎవరైనా ఎత్తిచూపితే … మొత్తం విషయం వినకుండా లేదా అర్థం చేసుకోకుండా ఆ వ్యక్తిని నిందించడం చాలా మంది తల్లిదండ్రులకు అలవాటు. మీకు అదే అలవాటు ఉంటే, మీరు పిల్లలను చెడగొడుతున్నారని మరొక సంకేతం. దీని ద్వారా పిల్లవాడు తాను ఏం చేసినా, అది తప్పు అయినా తన తల్లిదండ్రులు తనకు అండగా నిలుస్తారని తెలుసుకుంటాడు. అటువంటి పరిస్థితిలో, పిల్లలు చెడిపోయే అవకాశం ఎక్కువ.

మీరు మీ పిల్లల తప్పులను చూసి చూడనట్టు వదిలేస్తే అది చాలా ప్రమాదం. అది చెడు పెంపకానికి సంకేతం. పిల్లవాడు అనుచితంగా మాట్లాడటం, వస్తువులను పగలగొట్టడం, అబద్ధం చెప్పడం లేదా దొంగతనం చేయడం వంటి ప్రవర్తన ఉంటే మీరు వెంటనే వారిని సరిదిద్దాలి. ఇలాంటి సందర్భాల్లో మౌనంగా ఉండటం వల్ల అంతా సవ్యంగానే ఉందనే సందేశాన్ని పిల్లలకు పంపుతుంది.