Alu khichdi: ఉపవాసం రోజు తక్షణశక్తి ఇచ్చే ఆలూ కిచిడీ తినండి.. 10 నిమిషాల్లో చేసేయొచ్చు

ఉపవాసం రోజు తక్షణ శక్తినిచ్చే ఆహారాలు తినాల్సిందే. ఉపవాసం రోజున ఒక పూట తిన్నాకూడా రోజంతా నీరసం లేకుండా చేసే ఆహారం తీసుకోవాలి. దానికోసం ఆ రోజు ఎక్కువగా బంగాళదుంపలు, సాబుదానా, చిలగడ దుంపలు, వేరుశనగల్లాంటివి ఆహారంలో ఎక్కువగా తీసుకుంటారు. వాటితోనే రకరకాల వంటలు చేసి తింటారు. ఎప్పుడూ చేసుకునే సాబుదానా కిచిడీ, వడలు కాకుండా ఈ సారి ఉపవాసం రోజున ఆలూతో చేసే కిచిడీ రుచి చూడండి. కిచిడీ కదాని దీంట్లో బియ్యం ఏమీ వాడము. కేవలం ఆలూను తురిమేసి చేస్తాం. దీంతో కడుపు నిండడంతో పాటూ మంచి రుచితో ఉంటుంది. దీని తయారీ విధానం, కావాల్సిన పదార్థాలు చూసేయండి. 

ఆలూ కిచిడీ తయారీకి కావాల్సిన పదార్థాలు:

2 పెద్ద బంగాళదుంపలు

పావు టీస్పూన్ జీలకర్ర

2 చెంచాల వంటనూనె లేదా నెయ్యి

సగం చెంచా సైంధవ లవణం (ఉపవాసం లేకపోతే ఉప్పు వాడుకోవచ్చు)

1 కరివేపాకు రెమ్మ

సగం చెంచా నిమ్మరసం

పావు కప్పు పల్లీలు

2 పచ్చిమిర్చి, ముద్ద

సగం చెంచా పంచదార

ఆలూ కిచిడీ తయారీ విధానం:

1. ముందుగా బంగాళదుంపల్ని తొక్క తీసి పక్కన పెట్టుకోవాలి. సాధారణంగా కన్నా కాస్త మందంగా ఉండేలా ఆలూ తురుముకోవాలి. సన్నగా ఉంటే రుచి అంత బాగుండదు. కిచిడీ చేసేటప్పుడు ముద్దలాగా అయిపోతుంది.

2. ఈ తరుమును నీళ్లలో వేసి ఒకసారి కడిగి నీళ్లు వంచేయాలి. 

3. ఇప్పుడు ఒక అడుగు మందంగా ఉన్న కడాయి పెట్టుకుని అందులో నూనె లేదా నెయ్యి వేసుకోవాలి. వేడెక్కాక జీలకర్ర, కరివేపాకు వేసుకోవాలి. 

4. అవి కాస్త వేగాక తురుముకున్న బంగాళదుంపను కూడా వేసుకోవాలి. కాస్త ఉప్పు వేసి సన్నం మంట మీద ఈ మిశ్రమాన్ని కలుపుతూ ఉండాలి. 

5. పది నిమిషాలు మూత పెట్టి మగ్గిస్తే బాగా ఉడికిపోతుంది. ఆలూ ఉడికాక పారదర్శకంగా కనిపిస్తుంది. అప్పుడు కాస్త కచ్చాపచ్చాగా దంచుకున్న పల్లీల పొడి, పచ్చిమిర్చి ముద్ద, కొత్తిమీర తరుగు, నిమ్మరసం వేసుకోవాలి. 

6. అన్నీ కలిసేలా బాగా కలియబెట్టుకోవాలి. ఇప్పుడు మూత మూసి మరో రెండు నమిషాలు మగ్గించుకోవాలి. 

7. ఆలూ మిశ్రమం పచ్చివాసన పోయి మెత్తబడ్డాక కాస్త పంచదార కూడా వేసుకుని మరి కాసేపు ఉడికించుకోవాలి. వేడివేడిగా సర్వ్ చేసుకుంటే చాలు. చాలా సింపుల్‌గా ఆలూ కిచిడీ రెడీ.