Leftover Rice Dosa: మిగిలిన అన్నంతో టేస్టీగా, క్రిస్పీగా దోశలు.. చేసేయండిలా..

మిగిలిపోయిన అన్నంతో డిఫరెంట్‍గా ఏమైనా చేయాలనుకుంటున్నారా.. అయితే రుచికరంగా ఉండే దోశలు వేసుకోవచ్చు. చల్లటి అన్నం కొన్నిసార్లు తినాలని అనిపించదు. అలాంటప్పుడు అన్నంతో ఈ దోశలు తయారు చేసుకోవచ్చు. రాత్రి మిగిలిన అన్నంతోనూ ఉదయం వీటిని రెడీ చేయవచ్చు. క్రిస్పీగా ఈ దోశలు వస్తాయి. టేస్ట్ కూడా అదిరిపోతుంది. మిగిలిన అన్నంతో దోశలు ఎలా చేసుకోవాలో ఇక్కడ తెలుసుకోండి.

మిగిలిన అన్నంతో దోశలకు కావాల్సిన పదార్థాలు

• రెండు కప్పుల అన్నం
• ఒక కప్పు ఉప్మా రవ్వ
• ఓ కప్పు పుల్లటి పెరుగు
• అర కప్పు మైదాపిండి (లేదా గోధుమ పిండి)
• పిండి గ్రైండ్ చేసుకునేందుకు నీరు
• దోశ కాల్చుకునేందుకు నూనె
• టీ స్పూన్ వండ సోడా
• తగినంత ఉప్పు

మిగిలిన అన్నంతో దోశలు చేసుకునే విధానం

1. ముందుగా మిక్సీ జార్‌లో అన్నం, రవ్వ, మైదాపిండి, పెరుగు, నీరు వేసుకోవాలి. వాటిని మెత్తగా గ్రైండ్ చేసుకోవాలి.
2. వీటితో పిండి చేస్తే కాస్త బిగుసుగా ఉంటుంది. అందుకే కాస్తకాస్త నీళ్లు వేసుకుంటూ మిక్సీని ఆపిఆపి గ్రైండ్ చేసుకోవాల్సి ఉంటుంది. పిండిని మెత్తగా గ్రైండ్ చేసుకోవాలి.
3. ఆ తర్వాత గ్రైండ్ చేసుకున్న పిండిలో తగినంత ఉప్పు, వంటసోడా వేసి కలపాలి. దోశ పిండిలా జారుగా ఉండేందుకు అవసరమైతే కొన్ని నీరు పోసి కలపాలి.
4. పిండిని బాగా కలిపాక ఓ 15 నిమిషాలు పక్కన పెట్టాలి.
5. ఆ తర్వాత స్టవ్‍పై పెనం పెట్టి వేడి చేసుకోవాలి. కాస్త నూనె వేసుకొని సగం తరిగిన ఉల్లిపాయతో పెనంపై బాగా రాయాలి.
6. పెనం బాగా వేడెక్కాక తయారు చేసుకున్న దోశ పిండిని వేసుకోవాలి. దోశలా గుడ్రంగా గరిటెతో రుద్దాలి. కాస్త మందంగానే దోశ వేసుకోవాలి.
7. దోశ కాస్త కాలిన తర్వాత మధ్యలో, అంచుల వెంట నూనె వేసుకోవాలి.
8. దోశ ఓ వైపు కాలాక మరోవైపు కాసేపు కాల్చాలి. అంతే ఆ తర్వాత దోశను ప్లేట్‍లోకి తీసేసుకోవచ్చు. మిగిలిన అన్నంతో దోశ రెడీ అయిపోతుంది.

కొబ్బరి చట్నీ, అల్లం చట్నీని అంచుకొని ఈ దోశలను తినొచ్చు. మిగిలిన అన్నంతో ఏం చేయాలా అని ఆలోచించినప్పుడు ఈ దోశలు వేసుకోవచ్చు. రాత్రి చేసిన అన్నం ఎక్కువ మిగిలితే ఉదయం చేసుకునేందుకు ఈ దశలు మంచి బ్రేక్‍ఫాస్ట్ ఆప్షన్‍గా ఉంటుంది. 30 నిమిషాల్లోగానే ఈ దోశలను చేసేసుకోవచ్చు.