Beerakaya roti pachadi: బీరకాయ టమాటా రోటి పచ్చడి ఈ కొలతలతో చేసేయండి, రుచి అదిరిపోతుంది

రోటి పచ్చళ్లంటే రోట్లో దంచి చేసేవి. ఇప్పుడు ఆ వీలు చాలా కొద్దిమందికే ఉంటుంది. కానీ వాటి రుచే వేరు. మిక్సీలోనూ అదే రుచిలో రోటి పచ్చళ్లు చేసేయొచ్చు. ఒకసారి బీరకాయ, టమాటా కలిపి ఇలా పచ్చడి చేసి చూడండి. ఇంకేం కూర అక్కర్లేకుండా దీంతోనే తినేస్తారు. రోలు ఉంటే మాత్రం ఈ పచ్చడి తయారీ కోసం దాన్నే వాడండి.

బీరకాయ టమాటా రోటి పచ్చడికి కావాల్సిన పదార్థాలు:

పావు కేజీ బీరకాయలు

2 చెంచాల నూనె

పావు చెంచా పసుపు

అరచెంచా ఉప్పు

2 పెద్ద టమాటాలు

1 చింతపండు రెమ్మ

2 చెంచాల నువ్వులు

అర టీస్పూన్ మెంతులు

ఏడెనిమిది వెల్లుల్లి రెబ్బలు

1 టీస్పూన్ శనగపప్పు

1 టీస్పూన్ మినప్పప్పు

1 చెంచా జీలకర్ర

10 పచ్చిమిర్చి

అరకట్ట కొత్తిమీర తరుగు

తాలింపు కోసం:

1 టీస్పూన్ శనగపప్పు

1 టీస్పూన్ మినప్పప్పు

కరివేపాకు రెమ్మ

2 ఎండుమిర్చి

పావు చెంచా ఇంగువ

బీరకాయ టమాటా రోటి పచ్చడి తయారీ విధానం:

1. ముందుగా బీరకాయ శుభ్రంగా కడుక్కుని తొక్కతీసుకుని చిన్న ముక్కలుగా కట్ చేసుకోవాలి. టమాటాలు కూడా ముక్కల్లాగా కట్ చేసుకోవాలి.
2. ఒక ప్యాన్ పెట్టుకుని అందులో రెండు చెంచాల నూనె వేసుకోవాలి. శనగపప్పు, మినప్పప్పు, జీలకర్ర, మెంతులు, నువ్వులు, ఎండుమిర్చి వేసుకుని రంగు మారేదాకా వేయించుకోవాలి.
3. అందులోనే వెల్లుల్లి రెబ్బలు, పచ్చిమిర్చి కూడా వేసి మరో నిమిషం వేయించాలి.
4. ఈ తాలింపును ఒక గిన్నెలోకి తీసుకుని పెట్టుకోవాలి. చల్లారనివ్వాలి.
5. మిగిలిన నూనెలో బీరకాయ ముక్కలు, పసుపు వేసి మూత పెట్టుకోవాలి. అవి సగం కన్నా కాస్త ఎక్కువగా ఉడికిపోయాయి అనుకుంటే టమాటాలు కూడా వేసి మూత పెట్టేయాలి.
6. అన్నీ మెత్తబడ్డాక స్టవ్ కట్టేయాలి.
7. రోటి పచ్చడి రోలులో దంచుకుంటే రుచి బాగుంటుంది. రోలు లేకపోతే మిక్సీ జార్ వాడటమే . రోట్లో చేస్తే ముందు తాలింపు వేసుకుని కాస్త కచ్చాపచ్చాగ దంచి బీరకాయ, టమాటా ముక్కలు, కొత్తిమీర, వెల్లుల్లి వేసుకుని దంచుకుంటే చాలు.
8. మిక్సీ జార్ వాడితే ముందు చల్లార్చుకున్న తాలింపు వేసుకోవాలి. అది ఒకసారి బరకగా మిక్సీ పట్టి బీరకాయ, టమాటా ముక్కలు, చింతపండు, కొత్తిమీర వేసి బరకగా మిక్సీ పట్టాలి.
9. ఈ పచ్చడి ఇలాగే తినేయొచ్చు. దీని రుచి మరింత పెంచడానికి తాలింపు కూడా పెట్టొచ్చు.
10. తాలింపు కోసం రెండు చెంచాల నూనె ప్యాన్‌లో వేడి చేసుకుని మినప్పప్పు, శనగపప్పు, కరివేపాకు, ఎండుమిర్చి, ఇంగువ వేసి వేయించాలి. ఆ తాలింపును పచ్చడిలో కలిపేసుకుంటే రుచి బాగుంటుంది.

వేడి వేడి అన్నంలో నూనె చుక్క వేసుకుని ఈ పచ్చడి తిన్నారంటే కడుపు నిండిపోతుంది చూడండి.