Nippattu: నోరూరించే నిప్పట్టుని మీ ఇంట్లోనే ఇలా సులువుగా తయారు చేసుకోవచ్చు, సాయంత్రం వేళ బెస్ట్ స్నాక్స్

సాయంత్రం వేళ చాలా మందికి స్నాక్స్ తినడం అలవాటు. ఆరోగ్యానికి హానికరమైన, మన బరువుని పెంచే స్నాక్స్ తినడం కంటే.. మన ఇంట్లో తయారు చేసే నిప్పట్టుని ఓసారి ట్రై చేయండి. కరకరలాడే నిప్పట్టుని ఒకసారి తిన్నారంటే.. మళ్లీ మళ్లీ కావాలని అడుగుతారు. పిల్లలే కాదు.. పెద్దలు కూడా స్నాక్స్‌గా ఈ నిప్పట్టుని తినవచ్చు.

నిప్పట్టు తయారీకి కావాల్సిన పదార్థాలు

• బియ్యం పిండి - 2 కప్పులు
• శనగ పప్పు - 1 కప్పు (కనీసం 30 నిమిషాలు నానబెట్టాలి)
• వెన్న - 1 టీ స్పూన్‌
• జీలకర్ర - 1 స్పూన్
• కారం పొడి - 1 స్పూన్
• ఉప్పు- తగినంత
• కరివేపాకు - రుచికి సరిపడా (కట్ చేసుకోవాలి)
• పచ్చి మిర్చీలు - 3
• అల్లం - 3 (మీడియం సైజ్ ముక్కలు)
• వెల్లుల్లి - 1

నిప్పట్టు తయారీ విధానం

• స్టౌ వెలిగించి కడాయిలో తొలుత 1 1/2 కప్పు నీరు పోయాలి
• నీరు వేడి అయ్యేలోపు.. పచ్చిమిర్చి, అల్లం, వెల్లుల్లి, జీలకర్రని మిక్సీలో వేసుకుని పేస్ట్‌గా చేసుకోవాలి
• వేడి అయిన నీటిలో తగినంత ఉప్పు వేయాలి
• ఆ తర్వాత మిక్సీలో కొట్టిన పచ్చిమిర్చి, అల్లం, వెల్లుల్లి, జీలకర్ర పేస్ట్‌ని ఆ నీటిలో వేయాలి
• నిమిషం ఆగిన తర్వాత అప్పటికే కనీసం అరగంట నానబెట్టిన శనగ పప్పుని కూడా వేయాలి
• ఆ తర్వాత వెన్న కూడా వేసి బాగా కలపాలి
• చివర్లో చిన్నగా కట్ చేసిన కరివేపాతో పాటు కారంపొడిని వేసి బాగా కలియతిప్పాలి.
• కనీసం ఓ 2 నిమిషాలు ఈ మిశ్రమం బాగా ఉడికిన తర్వాత బియ్యం పిండిని వేయాలి
• పిండిని వేసిన వెంటనే స్టౌ ఆఫ్ చేసి.. కడాయిని దించేయాలి
• ఆ తర్వాత పిండిని గరిటెతో బాగా మిక్స్ చేసి.. ఓ 2 నిమిషాలు మూత పెట్టి పక్కన పెట్టాలి
• వేడి తగ్గిన తర్వాత చల్లని నీళ్లు కొద్ది కొద్దిగా వేస్తూ పిండిని చపాతీ పిండి ముద్ద తరహాలో పెద్దదిగా కలుపుకోవాలి
• ఆ తర్వాత ఆ పెద్ద ముద్ద నుంచి కొద్ది కొద్దిగా తీసుకుంటూ చిన్న ఉండల్లా చేసుకోవాలి
• ఆ ఉండల్ని నిప్పట్టు షేప్ తీసుకురావడానికి ఉండ కింద, పైభాగాన కవర్ ఉంచి ఒక మీడియం సైజ్ స్టీల్ బాక్స్‌తో ఆ ఉండని ఒత్తాలి. కవర్ లేకపోతే స్టీల్ బాక్స్‌కి పిండి అతుక్కుపోతుంది.
• ఇలా అన్ని ఉండల్ని ఒత్తుకున్న తర్వాత మళ్లీ స్టౌ వెలిగించి కడాయి పెట్టుకుని నిప్పట్టుని వేయించేందుకు తగినంత నూనె పోయాలి
• నూనె బాగా వేడెక్కిన తర్వాత ఒక్కోక్కటికి అందులో నిప్పట్టు వేయాలి. మీ కడాయి పరిమాణాన్ని బట్టి ఓ 4-5 వరకు ఏకకాలంలో వేయించొచ్చు
• కానీ.. నూనెలో వేసిన ఒక నిమిషం వరకు ఆ నిప్పట్టుని కదపకూడదు. ఒకవేళ కదిపితే అవి విరిగిపోయే ప్రమాదం ఉంది.
• ఒక నిమిషం తర్వాత అటు ఇటు కదుపుతూ వేయించాలి
• ఆ తర్వాత నిప్పట్టుని తిప్పి రెండో వైపు కూడా వేయించాలి
• నిప్పట్టు గోల్డ్ కలర్ వచ్చే వరకూ వేయించి.. ఆ తర్వాత నూనెలో నుంచి తీసేసి ప్లేట్‌లో వేసుకోవాలి

సాయంత్రం వేళలలో కరకరలాడే నిప్పట్టు తింటే ఆ రుచే వేరు.. మరి ఇంకెందుకు ఆలస్యం ఈరోజే నిప్పట్టుని మీ ఇంట్లో తయారు చేసుకోండి.