కోల్డ్ కాఫీని కెఫే స్టైల్‌లో చేయాలనుకుంటే ఈ టిప్స్ తప్పక పాటించండి!
వేసవిలో ఉదయం అయినా, సాయంత్రం అయినా హాట్ కాఫీకి బదులు కోల్డ్ కాఫీకే మొగ్గుచూపుతారు చాలా మంది. మీరు కూడా కాఫీ ప్రేమికులైతే, ఇంట్లోనే కెఫే లాంటి రుచికరమైన కోల్డ్ కాఫీని తయారు చేయసుకోండి. తయారు చేసేటప్పుడు ఈ చిట్కాలు ఫాలో అవడం మర్చిపోకండి. ఇవే మీ కాఫీకి కెఫే స్టైల్ టేస్ట్‌ను అందిస్తాయి.
వేసవి కాలంలో చల్లని పానీయాలకు గిరాకీ ఎక్కువగానే ఉంటుంది. ఈ సీజన్‌లో చాలామంది తమ దాహాన్ని తీర్చుకోవడానికి శరబత్, పన్నీర్ సోడా, ఐస్ టీ వంటివి అధికంగా తాగుతుంటారు. అయితే, కాఫీ ప్రియులకు మాత్రం చల్లని కోల్డ్ కాఫీ ఒక ప్రత్యేకమైన అనుభూతినిస్తుంది. ఐస్, పాలు, కాఫీతో తయారు చేసుకునే ఈ పానీయం ఎంతో రుచికరంగా ఉంటుంది. ఐస్డ్ కాఫీ, కోల్డ్ బ్రూ, చాక్లెట్ కోల్డ్ కాఫీ ఇలా అనేక రకాలుగా దీన్ని తయారు చేసుకోవచ్చు.
అయితే చాలా మంది బాధపడే విషయం ఏంటంటే.. కోల్డ్ కాఫీని ఎన్ని సార్లు ట్రై చేసినా కెఫె స్టైల్ రుచి రాదు. మీరు కూడా ఇదే ఫీలింగ్ తో ఉన్నట్లయితే ఇకపై మీకా బాధ ఉండదు. ఈ సారి కోల్డ్ కాఫీని తయారు చేసటప్పుడు ఇక్కడున్న చిట్కాలను పాటించారంటే.. కెఫే లాంటి కోల్డ్ కాఫీ టేస్ట్ దిగిపోతుందంతే. ఇందుకోసం మీ పాటించాల్సిన సీక్రెట్ టిప్స్ ఏంటో చూసేద్దాం రండి.
కెఫై స్టైల్ కోల్డ్ కాఫీ కోసం పాటించాల్సిన చిట్కాలు:
1. సరిగ్గా బ్లెండ్ చేయండి:
కోల్డ్ కాఫీ రుచిగా ఉండాలంటే, దానిని బాగా బ్లెండ్ చేయడం చాలా అవసరం. మీ దగ్గర కాఫీ బ్లెండర్ లేకపోతే, షేకర్ లేదా హ్యాండ్ విస్క్‌ను ఉపయోగించవచ్చు. పాలు, కాఫీ మిశ్రమం నుంచి నురుగు వచ్చే వరకు బాగా కలపాలి.
2. రుచి కోసం వీటిని కలపండి:
సాధారణంగా కోల్డ్ కాఫీని పాలు, ఐస్, కాఫీ పొడితోనే తయారు చేస్తారు. కానీ కెఫే లాంటి రుచి కోసం, కొద్దిగా చాక్లెట్ సిరప్‌ను కలపాలి. ఇదే కెఫై స్టైల్ సీక్రెట్.
3. చిక్కదనం కోసం ఇలా చేయండి:
కెఫేలో కోల్డ్ కాఫీ చాలా చిక్కగా ఉంటుంది. ఇంట్లో చేసినప్పుడు పలుచగా వస్తుంది. ఎందుకంటే వాళ్లు బ్లెండ్ చేసేటప్పుడు కొద్దిగా వెనీలా ఐస్ క్రీమ్‌ను కలపుతారు. మీరు కూడా ఇలాగే ట్రై చేయండి.
4. పాలను ఇలా కలపండి:
కోల్డ్ కాఫీకి మరింత మంచి రుచి రావాలంటే, పాలను ముందుగా కాసేపు ఫ్రిజ్‌లో ఉంచండి. అవి కొద్దిగా గడ్డకట్టిన తర్వాత కాఫీ కోసం ఉపయోగించండి. బ్లెండ్ చేసేటప్పుడు కొన్ని ఐస్ ముక్కలను కూడా యాడ్ చేసుకోండి.
కెఫై స్టైల్ కోల్డ్ కాఫీ కావలసిన పదార్థాలు (ఇద్దరి కోసం):
- 1 టేబుల్ స్పూన్ కాఫీ పొడి
- 1 1/2 కప్పుల పాలు
- 2 టేబుల్ స్పూన్ల వేడి నీరు
- 1 టేబుల్ స్పూన్ చక్కెర (రుచికి తగినంత)
- 2 టేబుల్ స్పూన్ల వెనీలా ఐస్ క్రీం
- 4-5 ఐస్ క్యూబ్స్
- చాక్లెట్ సిరప్
కోల్డ్ కాఫీ తయారుచేసే విధానం:
- ముందుగా ఒక గిన్నెలో కాఫీ పొడి వేసి, దాంట్లో వేడి నీరు పోసి బాగా కలపండి.
- ఇప్పుడు ఈ కాఫీ మిశ్రమాన్ని బ్లెండర్‌లోకి తీసుకుని దాంట్లో పాలు, చక్కెర, ఐస్ క్యూబ్స్ వేసి బాగా మిక్స్ చేయండి.
- నురగ వచ్చేంత వరకూ బ్లెండ్ చేసి పక్కకు పెట్టుకోండి.
- ఇప్పుడు రెండు పొడవాటి గాజు గ్లాసులు తీసుకుని వాటి అడుగు భాగాన్ని చాక్లెట్ సిరప్‌తో అలంకరించండి. సిరప్ గ్లాసు అంచులకు తాకేలా వేస్తే తాగడానికి, చూడటానికి కూడా ఆకర్షణీయంగా ఉంటుంది.
- తరువాత కొద్దిగా వెనీలా ఐస్ క్రీం ను వేయండి.
- ఇప్పుడు బ్లెండర్ లో ఉన్న కాఫీ మిశ్రమాన్ని ఈ గ్లాసులో పోసి పైన కొద్దిగా కాఫీ పొడి, మరి కొద్దిగా చాక్లెట్ పొడి, వెనీలా ఐస్ క్రీం వేసుకున్నారంటే కెఫై స్టైల్ కోల్డ్ కాఫీ రెడీ అయినట్టే.
- కావాలంటే మరోసారి దీంట్లో ఐస్ క్యూబ్స్ వేసుకోవచ్చు. ఇది వేసవి సాయంత్రాన్ని మరింత చల్లగా, రుచిగా మార్చుతుంది. మంచి అనుభూతినిస్తుంది.
