కిడ్నీలో రాళ్లు రాకుండా జాగ్రత్త పడండి: ఈ ఆహారాలే మీ శత్రువులు
కడుపు నొప్పి వచ్చి హాస్పిటల్కి వెళ్తే, కిడ్నీలో రాళ్లున్నాయని తెలిసి షాకయ్యేవాళ్ళు చాలా మందే ఉంటారు. కిడ్నీలో రాళ్లు పడటానికి మనం తీసుకునే ఆహారం కూడా ఒక కారణం. కొన్ని ఆహారాలు కిడ్నీలో రాళ్లకు దారితీయవచ్చు. మరి కిడ్నీలో రాళ్లు ఎలా ఏర్పడతాయి? ఎలాంటి ఆహారాలు తీసుకోకూడదో ఇప్పుడు చూద్దాం.
కిడ్నీలో రాళ్లను వైద్య పరిభాషలో 'రీనల్ క్యాల్కులస్' అంటారు. ఇవి కిడ్నీ లోపల లేదా రెండు కిడ్నీలలో గట్టిగా, రాయిలాగా ఏర్పడతాయి. మూత్రంలో కొన్ని ఖనిజాలు ఎక్కువగా ఉన్నప్పుడు ఇవి తయారవుతాయి.
ఈ అలవాట్లు కిడ్నీలో రాళ్లకు దారి తీస్తాయి
బెంగళూరులోని అపోలో స్పెక్ట్రా హాస్పిటల్లో యూరాలజిస్ట్ డాక్టర్ దిలీప్ ధన్పాల్ (MBBS, MS - జనరల్ సర్జరీ, MCh - యూరాలజీ) HT లైఫ్స్టైల్తో మాట్లాడుతూ, "కిడ్నీలో రాళ్లు రకరకాల పరిమాణాల్లో ఉంటాయి. చిన్న ధాన్యం పరిమాణం నుంచి బఠానీ లేదా గోల్ఫ్ బాల్ పరిమాణం వరకు ఉండొచ్చు. కొన్ని తీవ్రమైన కేసుల్లో ఇవి గోధుమ లేదా పసుపు రంగులో ఉంటాయి. సరైన వైద్య సహాయం తీసుకుంటే శాశ్వత నష్టం నుంచి తప్పించుకోవచ్చు" అని చెప్పారు.
రాళ్ల పరిమాణం, రంగులతో పాటు వాటి ఆకృతి కూడా మారవచ్చు. "కొన్ని రాళ్లు పదునుగా ఉంటే, మరికొన్ని నునుపుగా ఉంటాయి. చిన్న రాయి మూత్రనాళం గుండా నొప్పి లేకుండానే వెళ్ళిపోవచ్చు. కానీ పెద్ద కిడ్నీ రాయి మూత్రనాళంలో ఇరుక్కుని, మూత్ర ప్రవాహానికి అడ్డుపడి తీవ్రమైన నొప్పికి, రక్తస్రావానికి కారణమవుతుంది. సరిపడా ద్రవాలు తీసుకోకపోతే మూత్రం చిక్కబడుతుంది. దీనివల్ల ఖనిజాలు కిడ్నీలలోనే ఉండిపోయి గట్టి పదార్థాలుగా ఏర్పడతాయి" అని డాక్టర్ దిలీప్ వివరించారు.
"వేసవిలో డీహైడ్రేషన్ వల్ల కిడ్నీలో రాళ్లు రాకుండా ఉండాలంటే తగినంత ద్రవాలు తీసుకోవాలి. నీటికి అత్యధిక ప్రాధాన్యత ఇవ్వాలి. సిట్రేట్ ఉండే పండ్ల రసాలను కూడా చేర్చుకోవాలి. ఎందుకంటే ఇది రాళ్లు ఏర్పడకుండా సహాయపడుతుంది" అని డాక్టర్ దిలీప్ ధన్పాల్ సలహా ఇచ్చారు.
వేటిని మానుకోవాలి?
ఉప్పు ఎక్కువగా తినడం తగ్గించాలని డాక్టర్ సలహా ఇచ్చారు. ఎందుకంటే ఇది మూత్రంలో కాల్షియం స్థాయిని పెంచుతుంది. అలాగే పాలకూర, నట్స్ (గింజలు) వంటి ఆక్సలేట్ ఎక్కువగా ఉండే ఆహారాలకు దూరంగా ఉండాలి.
(పాఠకులకు గమనిక: ఈ వ్యాసం కేవలం సమాచారం కోసమే. ఇది వృత్తిపరమైన వైద్య సలహాకు ప్రత్యామ్నాయం కాదు. ఏదైనా ఆరోగ్య సమస్యలపై మీకు ప్రశ్నలు ఉంటే ఎల్లప్పుడూ మీ డాక్టర్ను సంప్రదించండి.)
