పండ్లను పెరుగుతో కలిపి తింటున్నారా? డైటీషియన్ చెప్పిన 6 నష్టాలు, 4 సురక్షితమైన ప్రత్యామ్నాయాలు

సామాజిక మాధ్యమాల్లో ట్రెండీ బ్రేక్‌ఫాస్ట్ బౌల్స్, స్మూతీలలో పండ్లు, పెరుగు (లేదా యోగర్ట్) తరచుగా కలిసి కనిపిస్తాయి కాబట్టి, ఇవి ఒక మంచి కాంబినేషన్‌గా అనిపించవచ్చు. ఆరోగ్యకరమైన కలయికగా కనిపించినా, నిజానికి మీ జీర్ణ ఆరోగ్యం విషయంలో పండ్లు-పెరుగు జోడీ అంతగా సరిపడదు.

డైటీషియన్, వెయిట్ మేనేజ్‌మెంట్ నిపుణుడు డాక్టర్ ప్రతేక్ష భరద్వాజ్ HT లైఫ్‌స్టైల్‌కు ఇచ్చిన ఇంటర్వ్యూలో మాట్లాడుతూ స్నాక్‌గా లేదా బ్రేక్‌ఫాస్ట్‌గా తీసుకునే ఈ ఇష్టమైన కాంబినేషన్‌కు తరచుగా పట్టించుకోని ఒక ప్రతికూల కోణం ఉందని వివరించారు.

వాటిలోని పోషకాలు, కారణాలను విడమరిచి చెప్పారు. "ప్రోబయోటిక్ సూపర్ ఫుడ్‌గా పెరుగు లేదా యోగర్ట్ జీర్ణవ్యవస్థకు మంచిదని విస్తృతంగా భావిస్తారు. ఎందుకంటే ఇది చలువ చేస్తుంది. పోషణను అందిస్తుంది. మరోవైపు, పండ్లు ఫైబర్, విటమిన్లు, యాంటీఆక్సిడెంట్లు, సహజ చక్కెరలతో నిండిన అద్భుతమైన ఆహారాలు. అయితే, ఈ రెండింటినీ కలిపి తినే సమయం జీర్ణక్రియకు అంత మంచిది కాకపోవచ్చు. కాబట్టి పండ్లతో పెరుగు తినే ఆరోగ్యకరమైన అలవాటును జాగ్రత్తగా పరిశీలించాలి." అని సూచించారు.

పండ్లను సాధారణ ప్రోబయోటిక్‌తో కలిపినప్పుడు ఎందుకు హానికరం అని డాక్టర్ భరద్వాజ్ ఆరు కారణాలను, అలాగే నాలుగు సురక్షితమైన ప్రత్యామ్నాయాలను షేర్ చేశారు.

పండ్లు-పెరుగు కాంబినేషన్ ఎందుకు మంచిది కాదు?

1. జీర్ణక్రియకు భంగం

పెరుగు ప్రాథమికంగా పులియబెట్టిన పాల ఉత్పత్తి. కాబట్టి దీనికి జీర్ణం కావడానికి ఎక్కువ సమయం పడుతుంది. అయితే, చాలా పండ్ల రసాలు, నీటి శాతం ఎక్కువగా ఉండే పండ్లు, ముఖ్యంగా పుచ్చకాయ, సిట్రస్ పండ్లు చాలా త్వరగా జీర్ణం అవుతాయి. కలిపి తిన్నప్పుడు, పెరుగు జీర్ణం అవ్వడానికి వేచి చూస్తూ, పండ్లు కడుపులో సాధారణం కంటే ఎక్కువ సేపు ఉంటాయి. ఇలా కడుపులో ఆహారం నిలిచిపోవడం వల్ల ప్రేగులలో పండ్లు పులిసిపోయి. కడుపు ఉబ్బరం, గ్యాస్, అసౌకర్యానికి దారితీస్తుంది.

2. అసిడిటీ, శ్లేష్మం వచ్చే ప్రమాదం

పెరుగు స్వభావరీత్యా ఆమ్ల గుణం కలిగి ఉంటుంది. నారింజ, పైనాపిల్, స్ట్రాబెర్రీలు వంటి సిట్రస్ లేదా ఆమ్ల పండ్లతో కలిపినప్పుడు, అది కడుపులో యాసిడ్ భారాన్ని పెంచుతుంది. తద్వారా అసిడిటీని ప్రోత్సహిస్తుంది. ఇది అదనపు శ్లేష్మం ఉత్పత్తిని ప్రేరేపిస్తుంది. ఇది సైనసైటిస్, జలుబుతో కూడిన శ్వాసనాళ సమస్యలను మరింత తీవ్రతరం చేస్తుంది.

3. సూక్ష్మజీవుల అసమతుల్యత

పెరుగులో ఆరోగ్యకరమైన ప్రోబయోటిక్స్ పుష్కలంగా ఉంటాయి. పండ్లలో సహజ చక్కెరలు ఉంటాయి. ఇవి సూక్ష్మజీవులకు పోషకాలుగా మారుతాయి. పండ్లను పెరుగుతో కలపడం వల్ల మైక్రోబయోమ్ యొక్క సున్నితమైన సమతుల్యత దెబ్బతింటుంది. ఇది దీర్ఘకాలంలో జీర్ణవ్యవస్థలో మంట, పోషకాల శోషణ తగ్గడం, రోగనిరోధక శక్తి బలహీనపడటానికి దారితీస్తుంది.

4. పోషకాల శోషణను పరిమితం చేస్తుంది

పెరుగు, పండ్లు రెండూ విడిగా పోషకమైనవి అయినప్పటికీ, కలిపి తీసుకుంటే, అవి ఒకదానికొకటి శోషణకు కొంతవరకు ఆటంకం కలిగించవచ్చు. ఉదాహరణకు, పెరుగులోని కాల్షియం, పండ్లలోని ఐరన్ ఒకదానికొకటి శోషించబడటానికి పోటీపడతాయి. దీని వల్ల ఏదో ఒకదాని బయోఅవైలబిలిటీ తగ్గుతుంది. పండ్ల ఆమ్ల స్వభావం పెరుగులోని ప్రోటీన్‌ను విచ్ఛిన్నం చేసి, శరీరం ప్రోటీన్‌ను సమర్థవంతంగా గ్రహించడాన్ని కష్టతరం చేస్తుంది.

5. చలువ చేసే ప్రభావం

పండ్లు, పెరుగు రెండూ చలువ చేసే స్వభావం కలిగి ఉంటాయి. కలిపి తీసుకున్నప్పుడు, ముఖ్యంగా శీతాకాలంలో లేదా బలహీనమైన రోగనిరోధక వ్యవస్థ ఉన్న వ్యక్తికి, అవి శరీర ఉష్ణోగ్రతను తగ్గించి, శ్వాస సమస్యలను కలిగించవచ్చు. ఈ కారణం చేత రాత్రిపూట లేదా శీతాకాలంలో పెరుగు తినవద్దని ఆయుర్వేదం ప్రత్యేకంగా సలహా ఇస్తుంది. పండ్లతో తినడం వల్ల శరీరానికి ప్రతికూల ప్రతిచర్యలు పెరుగుతాయి.

6. సరిపడని ఆహార కలయిక

ఆయుర్వేదంలో విరుద్ధ ఆహారం అనే ప్రముఖ సిద్ధాంతం ఉంది, అంటే సరిపడని ఆహార కలయిక. ఆయుర్వేదంలో ఇచ్చిన ఒక అలాంటి కలయిక పెరుగు, పండ్లు. ఎందుకంటే అవి వేర్వేరు సమయాల్లో జీర్ణం అవుతాయి. వేర్వేరు ఉష్ణ విలువలను కలిగి ఉంటాయి. కలిపి తీసుకున్నప్పుడు, అవి జీర్ణ అగ్నికి వ్యతిరేకంగా పనిచేసి, జీవక్రియ విషాలను ఏర్పరుస్తాయి. ఇది కడుపు ఉబ్బరం, అజీర్ణం, చర్మ సమస్యలకు దారితీస్తుంది.

సురక్షితమైన ప్రత్యామ్నాయాలు, సూచనలు:

• పాలతో పండ్లను సురక్షితంగా తినాలంటే, స్మూతీలలో గది ఉష్ణోగ్రత వద్ద ఉన్న పాలు లేదా బాదం లేదా కొబ్బరి పాలు వంటి మొక్కల ఆధారిత ప్రత్యామ్నాయాలను ఉపయోగించడాన్ని పరిగణించండి.
• పండ్లను, పెరుగును విడివిడిగా, కనీసం 30 నిమిషాల వ్యవధితో తినండి.
• మీరు పండ్లను పెరుగుతో తప్పనిసరిగా కలిపినట్లయితే, బాగా పండిన అరటిపండ్లు లేదా మామిడిపండ్లు (అప్పుడప్పుడు) వంటి తటస్థ పండ్లను ఎంచుకోండి. పెరుగు పుల్లగా లేకుండా చూసుకోండి.
• పండ్లతో నిండిన యోగర్ట్ బౌల్స్‌కు బదులుగా భోజనం తర్వాత మసాలా మజ్జిగ లేదా సాదా పెరుగును ఎంచుకోండి.

(పాఠకులకు గమనిక: ఈ వ్యాసం కేవలం సమాచారం కోసం మాత్రమే, వృత్తిపరమైన వైద్య సలహాకు ప్రత్యామ్నాయం కాదు. ఏదైనా ఆరోగ్య సమస్య గురించి సందేహాలు ఉంటే ఎల్లప్పుడూ మీ వైద్యుడిని సంప్రదించండి.)