బ్లడ్ క్యాన్సర్: ప్రారంభ లక్షణాలు - బోన్ మ్యారో ట్రాన్స్‌ప్లాంట్ ఫిజీషియన్ చెప్పిన ముఖ్యమైన విషయాలు ఇవీ

రక్త క్యాన్సర్‌కు సంబంధించిన వ్యాధులు ముఖ్యంగా ల్యూకేమియా, లింఫోమా, మల్టిపుల్ మైలోమా వంటి వాటిని ముందే గుర్తించడం చాలా కీలకమని విజయవాడ మణిపాల్ హాస్పిటల్స్ మెడికల్ ఆంకాలజీ, బోన్ మ్యారో ట్రాన్స్‌ప్లాంట్ ఫిజీషియన్ డాక్టర్ శ్రావణ్ కుమార్ వివరించారు.

‘ఎందుకంటే, ఈ వ్యాధులు మొదట్లో స్పష్టమైన లక్షణాలను చూపించవు. కొన్నిసార్లు అవి సాధారణ ఆరోగ్య సమస్యల్లాగే అనిపిస్తాయి, నిదానంగా శరీరం లోపల విస్తరిస్తుంటాయి. మనం గుర్తించడంలో ఆలస్యం జరిగితే, చికిత్స అందించడం, ప్రాణాలను కాపాడటం మరింత కష్టమవుతుంది..’ అని డాక్టర్ శ్రావణ్ తెలిపారు.

అందుకే, మన శరీరంలో కనిపించే చిన్న మార్పులను కూడా అస్సలు తేలికగా తీసుకోకూడదని, కొన్ని హెచ్చరిక సంకేతాలను మనం సకాలంలో గుర్తించగలిగితే, ప్రాణాలను కాపాడుకోవచ్చునని వివరించారు.

ప్రధాన లక్షణాలు, గమనించాల్సినవి:

తీవ్రమైన, అంతులేని అలసట:

ఇది మామూలు అలసట కాదు. ఎంత విశ్రాంతి తీసుకున్నా, ఏ పని చేయకపోయినా విపరీతమైన నీరసంగా అనిపిస్తుంది.

ఇది తరచుగా రక్తహీనత వల్ల వస్తుంది. ఎముక మజ్జ (బోన్ మ్యారో) లోని క్యాన్సర్ కణాలు ఆరోగ్యవంతమైన రక్తకణాలతో పోటీ పడతాయి. దీనివల్ల ఎర్ర రక్తకణాల ఉత్పత్తి తగ్గిపోతుంది. దాంతో శరీరంలోని కణజాలాలకు ఆక్సిజన్ సరఫరా సరిగా అందక విపరీతమైన నీరసం వస్తుంది.

తరచుగా వచ్చే ఇన్‌ఫెక్షన్లు:

సాధారణంగా వచ్చే జలుబు, దగ్గు లాంటి ఇన్‌ఫెక్షన్లు తరచుగా రావడం, లేదా వచ్చిన జబ్బు ఎంతకీ తగ్గకపోవడం గమనించవచ్చు.

రోగనిరోధక శక్తి సక్రమంగా ఉంటేనే శరీరం ఇన్‌ఫెక్షన్లతో పోరాడగలదు. కానీ, రక్త క్యాన్సర్‌లో ఆరోగ్యకరమైన తెల్ల రక్తకణాలు తగ్గిపోవడం వల్ల, రోగనిరోధక వ్యవస్థ బలహీనపడుతుంది. అప్పుడు సాధారణ వైరస్‌లు, బ్యాక్టీరియాలు కూడా శరీరానికి పెద్ద సమస్యగా మారతాయి.

అసాధారణ రక్తస్రావం, గాయాలు:

ముక్కు నుంచి రక్తం కారడం, చిగుళ్ళ నుంచి రక్తం రావడం, అలాగే చిన్న చిన్న దెబ్బలకే గాయాలు (బ్రూయిసింగ్) అవ్వడం వంటివి అస్సలు నిర్లక్ష్యం చేయకూడదు.

ఇది ప్లేట్‌లెట్ల సంఖ్య తగ్గడం వల్ల రక్తం త్వరగా గడ్డకట్టకపోవడానికి సంకేతం. ఒంటిపై ఎర్రటి లేదా గోధుమ రంగు దద్దుర్లు (పిటెకియా) కూడా కనిపించవచ్చు. ఇవి శరీరం లోపల రక్తస్రావానికి సూచన కావచ్చు.

శరీరంపై గడ్డలు లేదా వాపులు:

చంకల్లో, మెడలో లేదా గజ్జల్లో చర్మం కింద గడ్డలు ఏర్పడటం గమనించాలి. ఇవి ముఖ్యంగా వాచిన లింఫ్ నోడ్స్. ఈ గడ్డలు సాధారణంగా నొప్పి పెట్టవు.

సాధారణ ఇన్‌ఫెక్షన్ల సమయంలో లింఫ్ నోడ్స్ వాచడం సహజమే. కానీ, అవి తగ్గకుండా, ఇంకా పెద్దవి అవుతున్నట్లయితే, అది లింఫోమా లేదా ఇతర రక్త సంబంధిత వ్యాధులకు సూచన కావచ్చు.

ఇతర లక్షణాలు:

అకారణంగా బరువు తగ్గడం: ఎలాంటి డైట్ చేయకపోయినా, కారణం లేకుండా బరువు కోల్పోవడం.

రాత్రిళ్లు చెమటలు పట్టడం: నిద్రలో విపరీతంగా చెమటలు పట్టడం.

ఎముకలు లేదా కీళ్ల నొప్పులు: ఎముకల్లో లేదా కీళ్లలో నిరంతరంగా నొప్పి ఉండటం.

పొట్ట నిండినట్లు అనిపించడం: లివర్ లేదా ప్లీహము (స్ప్లీన్) పెద్దది అవ్వడం వల్ల పొట్ట నిండిపోయినట్లు అనిపిస్తుంది.

ఈ సంకేతాలను గుర్తించి, ఏ మాత్రం అనుమానం వచ్చినా వెంటనే డాక్టర్‌ను సంప్రదించడం చాలా ముఖ్యం. ముఖ్యంగా, పైన చెప్పిన లక్షణాల్లో ఏ ఒక్కటి దీర్ఘకాలంగా ఉన్నా, లేదా కొన్ని లక్షణాలు కలిపి కనిపించినా నిర్లక్ష్యం చేయవద్దు.

సరైన సమయంలో గుర్తించి, కీమోథెరపీ, ఇమ్యునోథెరపీ, స్టెమ్ సెల్ ట్రాన్స్‌ప్లాంట్ వంటి చికిత్సల ద్వారా బ్లడ్ క్యాన్సర్‌ను సమర్థవంతంగా నయం చేయవచ్చు. బ్లడ్ క్యాన్సర్ విషయంలో, వ్యాధిపై అవగాహన, తక్షణ చికిత్సే రోగి కోలుకోవడానికి అత్యవసరం అని డాక్టర్ శ్రావణ్ కుమార్ వివరించారు.