బాడీ ట్యాపింగ్ అనేది నిజంగానే పనిచేస్తుందా? దీని వల్ల శరీరానికి కలిగే ప్రయోజనాలేంటి?

ఆరోగ్యంగా ఉండాలంటే పోషకాలతో కూడిన ఆహారం, మానసిక, శారీరక వ్యాయామం, ఒత్తిడి లేని జీవితం వంటివి తప్పనిసరి. ఆహారం సంగతి పక్కన పెడితే వ్యాయామం, వాకింగ్ వంటివి చేయడానికి సమయం, ఓపిక రెండూ కావాలి. ఈ రోజుల్లో ఇవి దొరకడం చాలా కష్టం. ఎందుకంటే చదువులు, ఉద్యోగాలు, వ్యాపారాలు అంటూ రోజంతా ఉరుకులు పరుగుల మీద గడుస్తుంది జీవితం. ఇలాంటి వారు శారీరక మానసిక ఆరోగ్యం కోసం పెద్దగా కష్టపడకుండా, ఎక్కువ సమయం పట్టకుండా బాడీ ట్యాపింగ్ టెక్నిక్ ను ఉపయోగించవచ్చని సోషల మీడియలో చాలా మంది చెబుతున్నారు. బాడీ ట్యాపింగ్ అనేది నిజంగానే ఆరోగ్యానికి మేలు చేస్తుందా? దీని వల్ల కలిగే ప్రయోజనాలేంటో తెలుసుకుందాం రండి.

బాడీ ట్యాపింగ్ అంటే ఏమిటి?

బాడీ ట్యాపింగ్ అనేది మీ రోజువారీ బాధలకు సమాధానం లాంటి ఒక పురాతన ప్రత్యామ్నాయ వైద్యం. ఇది శరీరంలోని శక్తి ప్రవాహాన్ని సమతుల్యం చేసి శరీరం తాజాగా ఉండటానికి సహాయపడుతుంది. శరీరంలోని అన్ని భాగాలలో ట్యాపింగ్ చేయడం ద్వారా నిలిచిపోయిన శక్తులను విడుదల చేస్తుంది.మీ శారీరక మానసిక స్థితిని పెంచడానికి, మీ రోజును మరింత చురుగ్గా మార్చడానికి మీ దినచర్యలో తప్పక చేర్చుకోవాల్సిన గొప్ప హ్యాక్ ఇది.

బాడీ ట్యాపింగ్ ఎలా పని చేస్తుంది?

ట్యాపింగ్ అనేది ఒక రకమైన ఆక్యుప్రెషర్. ఇది శరీరంలోని అనేక మెరిడియన్ పాయింట్లను ఉత్తేజితం చేసేందుకు పనిచేస్తుంది. ఆయా పాయింట్లలో ట్యాప్ చేయడం వల్ల నిలిచిపోయిన శక్తి ప్రవాహం పెరిగి శరీర సమతుల్యత మెరుగవుతుంది. శరీరం స్తబ్దత నుంచి బయటపడి స్వేచ్ఛగా, ఉత్సాహంగా పని చేసేందుకు సహాయపడుతుంది. ఇది కేవలం శారీరక ఆరోగ్యాన్ని మాత్రమే కాకుండా మానసిక ఆరోగ్యాన్ని కూడా మెరుగుపరుస్తుంది. మానసిక, భావోద్వేగ సమతుల్యతను పెంచి మనసు మరింత శ్రద్ధగా, ప్రశాంతంగా ఉండటానికి సహాయపడుతుంది. ఒత్తిడి ఆందోళన వంటి వాటిని తగ్గించి మంచి నిద్రను పెంచుతుంది. రోగనిరోధక శక్తిని కూడా బలపరచుతుంది.

టాపింగ్ థెరపీ ఎలా చేయాలి?

1. మెరిడియన్ టాపింగ్ ప్రారంభించడానికి ముందు మీరు ప్రశాంతమైన, సౌకర్యవంతమైన స్థలాన్ని ఎంచుకోండి. ఆ చోటు సైలెంట్ గా ఉండేది, మీరు ఇన్‌టెరప్ట్ కాకుండా ఉండేలా చూసుకోండి. ఎందుకంటే మీరు టాపింగ్ చేస్తూ కూర్చునే లేదా పడుకునే సమయంలో నిశ్చలంగా ఉండ గలగాలి.
2. తరువాత మీ శరీరంలోని మెరిడీయన్ పాయంట్లను గుర్తించి వాటిని వేళ్లతో బలంగా ట్యాప్ చేయాలి.
3. ఇందుకోసం మీరు మీ చేతి వేళ్లను లేదా బాడీ టాపర్‌ను ఉపయోగించవచ్చు. మార్కెట్లో చాలా రకాల బాడీ ట్యాపర్లు దొరుకుతాయి.శరీరం గాయపడకుండా అంటే ట్యాపింగ్ ప్రక్రియ శరీరానికి గాయం కాకుండా అంటే దెబ్బ తగలకుండా చేయాలి. ప్రతి పాయింట్‌ను సుమారు 10 సార్లు టాప్ చేయాలి.
4. పని చేసే చోట, డెస్క్ దగ్గర కూడా బాడీ ట్యాపింగ్ చేయచ్చు. మధ్యాహ్నం నీరసం వచ్చినప్పుడు,ఒత్తిడిగా ఫీలయినప్పుడు, తలపై, శరీరంపై టాపింగ్ చేస్తే మళ్లీ ఎనర్జీ వస్తుంది.
5. టాపింగ్ పూర్తయిన తర్వాత కాసేపు నెమ్మదిగా గాఢమైన శ్వాస తీసుకోండి. ఇలా చేయడం వల్ల వెంటనే రిలాక్స్ అవుతారు.

శరీరంలోని ముఖ్యమైన ట్యాపింగ్ పాయింట్లు ఏవి?

• కాలర్‌బోన్ పాయింట్ – కాలర్ బోన్ మొదలైన చోట ఉండే పాయింట్ ఇది – ఆందోళన లేదా భయంగా ఉన్న సమయంలో ఉపయోగించవచ్చు.
• అండర్ ఆర్మ్ పాయింట్ – బాహువులోకి, భుజానికి 10 సెం.మీ దిగువన ఉండే పాయింట్ – అలసటకు, నీరసం ఉన్నప్పుడు ఉపయోగపడుతుంది.
• కన్నుబొమ్మ పాయింట్ – కనుబొమ్మలు మొదలైన చోట ఇరువైపులా రెండు ఉండే పాయింట్ – కోపం లేదా విసుగు ఉన్నప్పుడు టాప్ చేయవచ్చు.
• కన్ను పక్క పాయింట్ – కంటి పక్క భాగంలో అంటే కనుబొమ్మ చివరి వైపున ఉండే పాయింట్ – బాధ, మూడ్ లాస్ ఉన్నప్పుడు ఉపయోగించవచ్చు.
• కన్ను క్రింద పాయింట్ – కంటి క్రింద ఉండే ఎముకపై ఉండే పాయింట్ – అలసట లేదా నిద్రగా ఉన్నప్పుడు ఉపయోగించవచ్చు.
• ముక్కు క్రింద పాయింట్ – సరిగ్గా ముక్కు కింద భాగంలో ఉండే పాయింట్ ఇది – ఆందోళన లేదా ఒత్తిడి ఉన్నప్పుడు టాప్ చేయవచ్చు.
• గడ్డం కింద పాయింట్ – దిగువ పెదవికి కింద గడ్డం భాగంలో ఉండే పాయింట్ ఇది – కోపం లేదా డిప్రెషన్ ఉన్నప్పుడు ఉపయోగించవచ్చు.
• కరాటే చాప్ పాయింట్ – అరచేతికి కింద మణికట్టు భాగంలో ఉండే పాయింట్ ఇది – ఒత్తిడి లేదా ఆందోళనతో ఉన్నప్పుడు ఉపయోగించవచ్చు.