ఎండు చేపల్లో పోషకాలెన్నో: డైటీషియన్ చెబుతున్న 5 ముఖ్యమైన ఆరోగ్య ప్రయోజనాలు

ఎండు చేపలు... కొందరికి వాటి ఘాటైన వాసన అస్సలు నచ్చదు. మరికొందరికి మాత్రం అది లేనిదే ముద్ద దిగదు. ఈ వాసన సంగతి పక్కన పెడితే, ఎండు చేపలు నిజంగా ఆరోగ్యకరమైనవా? ఈ ప్రశ్నకు నిపుణులు అవుననే సమాధానం ఇస్తున్నారు. ప్రోటీన్ నుంచి ఐరన్, విటమిన్ డి వరకు ఎన్నో పోషకాలతో ఎండిన చేపలు నిండి ఉన్నాయని వారు చెబుతున్నారు.

జూలై 23న డాక్టర్ సౌమ్య స్వామినాథన్ తన X పోస్టులో ఎండు చేపల ఫోటోను పంచుకుంటూ, "ఎండిన చేపలు ప్రొటీన్‌కు గొప్ప వనరు. ముఖ్యంగా తీరప్రాంతాల్లో చేపలు తినే కమ్యూనిటీలలో అంగన్‌వాడీ, మధ్యాహ్న భోజన పథకాలకు ఇది మంచి అనుబంధంగా ఉండగలదు" అని రాశారు. ఇది ఎండు చేపల పోషక విలువలు, అవి శరీరానికి ఎలా సహాయపడతాయో అనే విషయాన్ని మన దృష్టికి తీసుకొస్తుంది.

హెచ్‌టి లైఫ్‌స్టైల్‌కు ఇచ్చిన ఇంటర్వ్యూలో గురుగ్రామ్‌లోని ఫోర్టిస్ మెమోరియల్ రీసెర్చ్ ఇన్‌స్టిట్యూట్‌కు చెందిన క్లినికల్ డైటీషియన్ శిఖా సింగ్ మాట్లాడుతూ, "ఎండిన చేపలు అత్యవసర పోషకాలకు ఉత్తమ వనరు. పోషకాహార ఫలితాలను మెరుగుపరచడంలో, ముఖ్యంగా తీరప్రాంతాలు, చేపలు తినే ప్రజలలో ఇది చాలా శక్తివంతమైన పాత్ర పోషిస్తుంది. వీటి సుదీర్ఘ నిల్వ జీవితం, అధిక ప్రోటీన్ సాంద్రత, మైక్రోన్యూట్రియెంట్ల సమృద్ధి కారణంగా అంగన్‌వాడీ కేంద్రాలు, మధ్యాహ్న భోజన పథకాలు వంటి సామాజిక పోషణ కార్యక్రమాలలో ఉపయోగించడానికి ఇది ఆదర్శవంతమైనది" అని అన్నారు.

ఎండిన చేపలలో ఉండే 5 ముఖ్యమైన పోషకాలు:

అధిక-నాణ్యత గల ప్రోటీన్:

పరిమాణం: 100 గ్రాములకు 60–80 గ్రాములు (చేప రకాన్ని బట్టి మారుతుంది).

పాత్ర: పిల్లల పెరుగుదలకు, కండరాల మరమ్మత్తుకు, రోగనిరోధక శక్తికి, పోషకాహార లోపం ఉన్న వారికి మేలు చేస్తుంది.

ప్రభావం: క్రమం తప్పకుండా ఆహారంలో చేర్చుకోవడం వల్ల పిల్లలలో ప్రోటీన్ శక్తి పోషకాహార లోపాన్ని తగ్గించడంలో సహాయపడుతుంది.

కాల్షియం:

పరిమాణం: 100 గ్రాములకు 2000 mg వరకు (ముఖ్యంగా అంచోవీలు లేదా సార్డినెస్‌లు వంటి చిన్న చేపలను ఎముకలతో సహా పూర్తిగా తీసుకున్నప్పుడు).

పాత్ర: ఎముకలు, దంతాల అభివృద్ధికి అవసరం, రికెట్స్, బోలు ఎముకల వ్యాధిని నివారిస్తుంది.

ప్రభావం: పాలు, పాల ఉత్పత్తులు తక్కువగా లభించే ప్రాంతాల వారికి సహజమైన, లాక్టోస్-రహిత కాల్షియం వనరు.

ఒమేగా-3 కొవ్వు ఆమ్లాలు (EPA, DHA):

పరిమాణం: ఎండబెట్టిన తర్వాత కూడా సముద్రపు చేప జాతులలో ఒమెగా 3 కొవ్వు ఆమ్లాలు సమృద్ధిగా ఉంటాయి.

పాత్ర: పిల్లలలో మెదడు అభివృద్ధికి, అభిజ్ఞా పనితీరుకు, గుండె ఆరోగ్యానికి మద్దతు ఇస్తుంది. వాపును తగ్గిస్తుంది.

ప్రభావం: పుట్టిన మొదటి 1000 రోజులలో నరాల అభివృద్ధికి చాలా కీలకం.

ఐరన్ (ఇనుము):

పరిమాణం: 100 గ్రాములకు 4–6 mg వరకు.

పాత్ర: ఐరన్ లోపం వల్ల వచ్చే రక్తహీనతను నివారిస్తుంది, ఆక్సిజన్ రవాణాకు, అభిజ్ఞా అభివృద్ధికి మద్దతు ఇస్తుంది.

ప్రభావం: పరిమిత వనరులున్న ప్రాంతాల్లోని కౌమార బాలికలు, గర్భిణీ స్త్రీలు, చిన్న పిల్లలకు చాలా ముఖ్యం.

విటమిన్ డి:

పరిమాణం: నూనె గల ఎండు చేపలలో (ఉదా: మాకెరెల్, సార్డిన్) సహజంగా ఉంటుంది.

పాత్ర: కాల్షియం శోషణకు సహాయపడుతుంది. రోగనిరోధక శక్తిని పెంచుతుంది. రికెట్స్ (ఎముకల బలహీనత)ను నివారిస్తుంది.

ప్రభావం: సూర్యరశ్మి తక్కువగా లభించే లేదా ఆహార వైవిధ్యం తక్కువగా ఉన్న ప్రజలలో ఇది చాలా కీలకమైనది.

(గమనిక: ఈ కథనం కేవలం సమాచార ప్రయోజనాల కోసం మాత్రమే. ఇది వృత్తిపరమైన వైద్య సలహాకు ప్రత్యామ్నాయం కాదు. ఏదైనా ఆరోగ్య సమస్యలకు సంబంధించి మీకు ఏవైనా సందేహాలు ఉంటే మీ వైద్యుడిని సంప్రదించండి.)