కాఫీ తాగడానికే కాదు తలస్నానం చేయడానికి కూడా పనికొస్తుందట! దీని వల్ల కలిగే ప్రయోజనాలేంటో చూడండి
కాఫీ ప్రియులారా.. ఇది తాగడానికి మాత్రమే కాకుండా తలస్నానం చేయడానికి కూడా పనికొస్తుందని మీకు తెలుసా? దీంతో తెల్ల జుట్టును నల్లగా మార్చుకోవంటే నమ్ముతారా? అవును కాఫీతో తలస్నానం ఎలా చేయాలో, దీని వల్ల కలిగే ఇతర ప్రయోజనాలేంటో తెలుసుకుందాం రండి.
తెల్లారితే చాలు వేడి వేడిగా కాఫీ తాగందే చాలా మందికి రోజు గడవదు. సాయంత్రం పని ఒత్తిడిని వదిలించుకోవాలన్నా కాఫీ పడాల్సిందే. ఇలా మిమ్మల్ని ఎప్పటికప్పుడు రిఫ్రెషింగ్ మార్చే కాఫీ కేవలం తాగడానికే కాదు, మీ జుట్టును మెరిపించడానికి కూడా పనికొస్తుందని మీకు తెలుసా? ముఖ్యంగా తెల్లగా, నిర్జీవంగా మారిన మీ వెంట్రుకలను నల్లగా, ఆకర్షణీయంగా మారుస్తుందంటే నమ్ముతారా? ఈ విషయం తెలుసుకున్నాక నమ్మాల్సిందే. కాఫీతో తలస్నానం చేస్తే మీ జుట్టుకు ఎలాంటి లాభాలు కలుగుతాయో, ఎలా చేయాలో వివరంగా తెలుసుకుందాం రండి.
కాఫీతో తలస్నానం చేయడం ఎలా?
- ముందుగా ఒక పాత్రలో నీరు పోసి బాగా మరిగించండి.
- నీరు మరుగుతున్నప్పుడు అందులో కాఫీ పొడి వేసి కలపండి. సుమారు 5 నుండి 10 నిమిషాల పాటు చిన్న మంటపై మరిగించండి. దీనివల్ల కాఫీలోని రంగు, పోషకాలు పూర్తిగా నీటిలో కలుస్తాయి.
- తర్వాత స్టవ్ ఆఫ్ చేసి కాఫీ ద్రావణాన్ని పూర్తిగా చల్లారనివ్వండి. ఇది చల్లారిన తర్వాత ఒక పలుచని వస్త్రంతో లేదా కాఫీ ఫిల్టర్‌తో వడకట్టండి. ఇలా చేయడం వల్ల కాఫీ పొడి రేణువులు మీ జుట్టుకు అంటుకోకుండా ఉంటాయి.
ఉపయోగించే పద్ధతి:
- మీరు రోజూ తలస్నానం చేసే విధంగానే ముందుగా మీ జుట్టు షాంపూతో కడగండి.
- ఇప్పుడు పూర్తిగా చల్లారిన తర్వాత వడకట్టిన కాఫీ ద్రావణాన్ని నెమ్మదిగా మీ తలపై పోయాలి. జుట్టు కుదుళ్ల నుండి చివర్ల వరకు మొత్తం కాఫీతో బాగా తడిసిపోయేలా అప్లై చేయండి.
- కాఫీ అప్లై చేసిన తర్వాత మీ జుట్టును నెమ్మదిగా మసాజ్ చేయండి.
- ఇలా కాఫీని జుట్టుకు పట్టించిన తర్వాత 15 నుండి 20 నిమిషాల పాటు అలాగే వదిలేయండి.
- తర్వాత గోరువెచ్చని లేదా చల్లని నీటితో శుభ్రంగా కడుక్కోవాలి. మళ్లీ షాంపూ ఉపయోగించాల్సిన అవసరం లేదు.
- ఇలా మీరు షాంపూతో తలస్నానం చేసిన ప్రతిసారి కాఫీతో కూడా తలస్నానం చేయాలి. ఉత్తమ ఫలితాల కోసం వారానికి ఒకటి లేదా రెండుసార్లు చేశారంటే మీ వెంట్రుకల్లో వచ్చే మార్పును మీరే గమనిస్తారు.
కాఫీతో తలస్నానం చేయడం వల్ల కలిగే లాభాలు:
- కాఫీతో తలస్నానం చేయడం వల్ల మీ తెల్ల కురులు క్రమంగా ముదురు రంగులోకి మారతాయి. అంతేకాదు, మీ జుట్టుకు ఒక అందమైన, సహజమైన గోధుమ రంగు ఛాయను అందిస్తుంది.
- రసాయనాలతో వచ్చే రంగులా కాకుండా ఇది మీ జుట్టుకు ఒక ప్రత్యేకమైన సహజత్వాన్ని ఇస్తుంది. దీనిలోని సహజ లక్షణాల వల్ల మీ జుట్టు మరింత తేజస్సుతో మెరిసిపోతుంది, ఆరోగ్యంగా కనిపిస్తుంది.
- రంగు మారడంతో పాటు, మీ వెంట్రుకలకు ఒక కొత్త మెరుపు, మృదుత్వం కూడా లభిస్తాయి. ఇది మీ జుట్టును మరింత ఆకర్షణీయంగా, యవ్వనంగా కనిపించేలా చేస్తుంది.
ఏ కాఫీని ఉపయోగించాలి?
కాఫీతో తలస్నానం చేయడానికి ఇన్స్టంట్ కాఫీ కంటే ఆర్గానిక్ కాఫీ పొడిని ఉపయోగించడం ఉత్తమం. ఇది మీ జుట్టుపై మరింత ప్రభావవంతంగా పనిచేస్తుంది, మీ హెయిర్ కలర్‌ను సహజంగా ముదురుగా మార్చుతుంది. ఆరోగ్యంగా మెరిసేలా చేయడంలో సహాయపడుతుంది.
మెహందీలో కలిపి ఉపయోగించవచ్చు:
చాలా మంది తెల్ల జుట్టును నల్లగా మార్చడానికి మెహందీ (హెన్నా)లో కాఫీ పొడిని కలుపుతారు. ఇది రసాయనాలు లేకుండా జుట్టు రంగును మార్చడానికి సహాయపడుతుంది. అయితే హెన్నా సాధారణంగా జుట్టుకు నారింజ రంగును ఇస్తుంది, కాఫీని కలపడం వల్ల ఆ రంగును తగ్గించి నలుపు రంగు వచ్చే అవకాశం ఉంటుంది.
ఇది ఎంతవరకూ ఆరోగ్యకరం?
కాఫీ పొడితో తలస్నానం చేయడం వల్ల జుట్టు చిట్లడం తగ్గుతుంది. జుట్టు పొడిబారకుండా ఉండటమే కాకుండా పెరుగుదలకు కూడా సహాయపడుతుంది. కాబట్టి మీరు మీ జుట్టును మృదువుగా, మెరిసేలా, సహజమైన నలుపు రంగులోకి మార్చాలంటే ఈ కాఫీ ఐడియాను తప్పక ట్రై చేయండి.
