నిద్రించేటప్పుడు ఫోన్ పక్కన ఉందా? క్యాన్సర్ ప్రమాదం పెంచుతుందంటున్న కాలిఫోర్నియా డాక్టర్
నిద్రించేటప్పుడు సెల్ఫోన్ను పక్కన పెట్టుకోవడం వల్ల రేడియేషన్ ప్రభావం ద్వారా నిద్రకు ఆటంకం, తలనొప్పి, దీర్ఘకాలంలో క్యాన్సర్ ముప్పు పెరిగే ప్రమాదం ఉందని కాలిఫోర్నియాకు చెందిన అనస్థీషియాలజిస్ట్ డాక్టర్ మైరో ఫిగురా హెచ్చరించారు.
సాధారణంగా మనలో చాలామంది రాత్రి పడుకునే ముందు సెల్ఫోన్ను చూస్తూ గడపడం, లేదా ఫోన్ను బెడ్సైడ్ టేబుల్పైనే పెట్టుకోవడం చేస్తుంటారు. చాలా నిరపాయకరమైనదిగా కనిపించే ఈ అలవాటు మన ఆరోగ్యంపై తీవ్ర ప్రభావం చూపవచ్చని కాలిఫోర్నియాకు చెందిన అనస్థీషియాలజిస్ట్ డాక్టర్ మైరో ఫిగురా హెచ్చరించారు.
నిద్రించేటప్పుడు మీ ఫోన్ను తలకు దగ్గరగా ఉంచితే, ఆ అలవాటును తక్షణమే మానుకోవాలని డాక్టర్ మైరో ఫిగురా సూచిస్తున్నారు. అక్టోబర్ 2న ఇన్స్టాగ్రామ్లో ఆయన పోస్ట్ చేసిన వీడియోలో ఈ విషయంపై వివరంగా తెలిపారు.
ఫోన్ నిజంగా రేడియేషన్ విడుదల చేస్తుందా?
"మీరు ఫోన్ను ఉపయోగించకపోయినా, అది రేడియేషన్ను విడుదల చేస్తూనే ఉంటుంది. ఇది మీ నిద్రకు ఆటంకం కలిగిస్తుంది. తలనొప్పికి దారితీస్తుంది. అంతేకాదు, కాలక్రమేణా ఇది మీకు క్యాన్సర్ ముప్పును పెంచవచ్చు" అని డాక్టర్ మైరో విశ్లేషించారు.
అయితే, ఫోన్ విడుదల చేసే రేడియేషన్ ఎలాంటిది అనే సందేహం చాలామందికి ఉంటుంది. ఈ విషయంపై డాక్టర్ ఫిగురా మరింత స్పష్టత ఇచ్చారు.
"అవును. ఫోన్లు 'నాన్-అయోనైజింగ్ రేడియేషన్'ను విడుదల చేస్తాయి. సూర్యుడి నుంచి, రేడియోధార్మిక మూలాల నుంచి లేదా మెడికల్ ఇమేజింగ్ నుంచి వచ్చే అయోనైజింగ్ రేడియేషన్లా కాకుండా, ఈ నాన్-అయోనైజింగ్ రేడియేషన్కు కణాలు లేదా డీఎన్ఏను దెబ్బతీసే శక్తి లేదు" అని ఆయన వివరించారు.
"అయినప్పటికీ, ఇది రేడియేషన్ కిందకే వస్తుంది. అందుకే ప్రపంచ ఆరోగ్య సంస్థ (WHO) దీనిని 'మానవులకు క్యాన్సర్ కలిగించే అవకాశం ఉన్న' (possibly carcinogenic to humans) వర్గంలో చేర్చింది. ఇదే వర్గంలో మనం రోజూ తాగే కాఫీ, ఊరగాయలు (పికిల్డ్ వెజిటబుల్స్) కూడా ఉన్నాయి" అని డాక్టర్ పేర్కొన్నారు.
ముప్పును ఎలా తగ్గించాలి?
ఫోన్ల వల్ల వచ్చే ప్రమాదాలు రేడియేషన్తోనే ఆగడం లేదని డాక్టర్ ఫిగురా హెచ్చరించారు. "కొన్నిసార్లు ఫోన్లు ఛార్జింగ్ అవుతున్నప్పుడు వేడెక్కి మంటలు చెలరేగి, నిద్రిస్తున్న వారికి ప్రమాదాలు జరిగిన సందర్భాలు కూడా ఉన్నాయి. ఇది ఏమాత్రం మంచిది కాదు" అని ఆయన తెలిపారు.
పరిష్కారం చాలా సులువు!
మరి ఈ ప్రమాదాలను తగ్గించుకోవడానికి పరిష్కారం ఏమిటి? అది చాలా సులభమని డాక్టర్ అంటున్నారు. మీ ఫోన్ను మంచానికి దూరంగా పెట్టడమే ఆ పరిష్కారం.
"మీ ఫోన్ను గదిలో వేరే మూలగా పెట్టండి. అంతే! దీనివల్ల మీరు మరింత హాయిగా నిద్రపోతారు. బహుశా ఎక్కువ కాలం జీవించవచ్చు కూడా" అని డాక్టర్ ఫిగురా సూచించారు.
