వేసవి వేడి నుంచి తప్పించుకోవాలంటే పెరుగు వడ తినాల్సిందే, ఇదిగోండి రెసిపీ తప్పకుండా ట్రై చేయండి!

వేసవి తాపం నుంచి తక్షణ ఉపశమనం పొందాలని ఉందా? చల్లని, రుచికరమైన స్నాక్ కోసం చూస్తున్నారా? అయితే పెరుగు వడ రెసిపీ మీ కోసమే! మెత్తమెత్తగా, జ్యూసీగా ఉండే వడలను కమ్మటి పెరుగులో నానబెట్టి, తీపి, పులుపు, కారం కలగలిపిన చట్నీలతో నంచుకుని తిన్నారంటే.. ఆహా.. ఊహించుకుంటేనే నోరు ఊరిపోతుంది కదా. ఈ క్లాసిక్ భారతీయ స్నాక్ కేవలం కడుపు నింపడమే కాదు, మీ వేసవి సాయంత్రాలకు ఒక ప్రత్యేకమైన అనుభూతినిస్తుంది. ఆరోగ్యం విషయంలో కూడా తగ్గేలేదు అంటుంది. మరి ఆలస్యం ఎందుకు? ఈ రుచికరమైన పెరుగు వడను ఇంట్లోనే ఎలా తయారు చేసుకోవాలో తెలుసుకుందాం రండి.

పెరుగు వడ తయారు చేయడానికి కావలసిన పదార్థాలు:

• మినపప్పు - 1 కప్పు
• పచ్చిమిర్చి - 1 లేదా 2 (సన్నగా తరిగినవి)
• అల్లం - 1/2 అంగుళం
• ఉప్పు - రుచికి సరిపడా
• నూనె - డీప్ ఫ్రై చేయడానికి
• పెరుగు (చిక్కటిది) - 2 కప్పులు
• చక్కెర - 1-2 టేబుల్ స్పూన్లు (రుచికి తగినంత)
• నల్ల ఉప్పు - 1/2 టీస్పూన్
• నీరు - 1/2 కప్పు (పెరుగును పలుచన చేయడానికి)
• కారం చట్నీ-2 టేబుల్ స్పూన్లు(చిల్లీ సాస్)
• తీపి చట్నీ - 2 టేబుల్ స్పూన్లు(టమాటో సాస్)
• కారం పొడి - 1/2 టీస్పూన్
• జీలకర్ర పొడి - 1/2 టీస్పూన్ (వేయించినది)
• చాట్ మసాలా - 1/2 టీస్పూన్
• సన్నగా తరిగిన కొత్తిమీర - 2 టేబుల్ స్పూన్లు
• బూందీ లేదా సేవ్‌ (సన్నని కరకరలాడే శనగపిండి నూడిల్స్)
• దానిమ్మ గింజలు - కొద్దిగా (మీకు నచ్చితేనే)

పెరుగు వడ తయారు చేసే విధానం:

1. పెరుగు వడ తయారు చేయడం కోసం ముందుగా మినపప్పును 2-3 సార్లు బాగా కడిగి, కనీసం 4-5 గంటలు లేదా రాత్రంతా నీటిలో నానబెట్టండి.
2. నానబెట్టిన పప్పులోని నీటిని పూర్తిగా వడకట్టి ఒక మిక్సీ జార్‌లో వేయండి.
3. అవసరమైతే కొద్దిగా నీరు పోస్తూ మెత్తని పిండిలా రుబ్బుకోండి. పిండి మరీ పలుచగా కాకుండా చూసుకోండి.
4. రుబ్బిన పిండిని ఒక గిన్నెలోకి తీసుకుని అందులో సన్నగా తరిగిన పచ్చిమిర్చి, తురిమిన అల్లం, రుచికి సరిపడా ఉప్పు వేసి బాగా కలపండి.
5. ఇప్పుడు పిండిని చేత్తో 2 నుంచి 3 నిమిషాలు బాగా గిలకొట్టండి(కలపండి). ఇలా చేయడం వల్ల వడలు మెత్తగా వస్తాయి.
6. తరువాత ఒక ప్యాన్ తీసుకుని దాంట్లో డీప్ ఫ్రై చేయడానికి నూనెను పోసి వేడి చేయండి.
7. నూనె బాగా వేడెక్కిన తర్వాత మంటను తగ్గించి దాంట్లో ఒక చెంచా లేదా తడి చేసిన చేతితో కొద్ది కొద్దిగా పిండిని చిన్న చిన్న వడల్లాగా తీసుకుంటే నూనెలో వేయండి. ఒకేసారి ఎక్కువ వేయకుండా కొన్ని కొన్ని వేయాలి.
8. వడలు బంగారు రంగులోకి వచ్చే వరకు, బాగా కరకరలాడే వరకు వేయించండి.
9. వేయించిన వడలను నూనె నుండి తీసి ఒక టిష్యూ పేపర్ వేసిన ప్లేట్‌లో ఉంచండి. ఇలా అన్ని వడలను వేయించుకుని పక్కకు పెట్టుకోవాలి.
10. తరువాత ఒక గిన్నెలో చిక్కటి పెరుగు తీసుకోండి. అందులో చక్కెర, నల్ల ఉప్పు వేసి బాగా కలపండి.
11. పెరుగు మరీ గట్టిగా ఉంటే, కొద్దిగా నీరు పోసి బాగా కలుపుకోండి. పెరుగు మరీ పలుచగా కాకుండా కొంచెం చిక్కగా ఉండాలి.
12. ఇప్పుడు ఒక పెద్ద గిన్నెలో చల్లని నీరు తీసుకోండి. వేయించిన వడలను అందులో వేసి 10-15 నిమిషాలు నానబెట్టండి. ఇలా చేయడం వల్ల వడలు మెత్తగా, జ్యూసీగా తయారవుతాయి.
13. నానిన వడలను ఒక్కొక్కటిగా తీసుకుని రెండు అరచేతుల మధ్యలో పెట్టి మెల్లగా నొక్కి, అదనపు నీటిని తీసివేయండి. మరీ గట్టిగా నొక్కితే వడ విరిగిపోయే అవకాశం ఉంది.
14. ఇలా నొక్కిన వడలన్నింటినీ ఒక ప్లేటులో వేసి వాటి మీద తగినంత చల్లని పెరుగును పోయండి.
15. ఆపై మీకు కావల్సిన కారం చట్నీ, తీపి చట్నీలను వేయండి. అంటే కెచప్ సాస్ వంటివి అయినా పర్వాలేదు. తగినంత పచ్చి చట్నీ మరియు తీపి చట్నీ వేయండి.
16. పైన కారం పొడి, జీలకర్ర పొడి, చాట్ మసాలా చల్లండి.
17. ఆ తర్వాత సన్నగా తరిగిన కొత్తిమీర, బూందీ లేదా సేవ్‌ లతో పాటు మీకు కావాలంటే దానిమ్మ గింజలతో అలంకరించండి.
18. అంతే చల్లటి, కమ్మటి పెరుగు వడ రెడీ అయినట్టే సర్వ్ చేసుకుని తినేయడమే.

ఈ విధంగా మీరు ఇంట్లోనే రుచికరమైన పెరుగు వడను ఈజీగా తయారు చేసుకోవచ్చు.పిల్లల నుంచి పెద్దల వరకూ దీన్ని ఇష్టంగా తింటారు. వేసవిలో ఇది ఒక అద్భుతమైన స్నాక్.