వేసవి తాపాన్ని తగ్గించే చల్లని జల్జీరా! స్ట్రీట్ స్టైల్ టేస్ట్ రావాలంటే ఈ చిట్కాలతో ట్రై చేయాల్సిందే!
జల్జీరా వేసవిలో బయట దొరికే ఆరోగ్యకరమైన పానీయాలతో ముందుండే పానీయం. ఇది వేడి నుంచి తక్షణ ఉపశమనం అందించడంతో పాటు జీర్ణవ్యవస్థను కాపాడుతోంది. అయితే దీన్ని ఇంట్లో చేయడం కష్టమని, బయట దొరికే రుచి రాదని చాలా మంది ఫీలవుతుంటారు. ఈసారి ఈ చిట్కాలతో ట్రై చేయండి. స్ట్రీట్ స్టైల్ జల్జీరాను ఇంట్లోనే ఆస్వాదించండి.
వేసవిలో ఎండ, వేడి కారణంగా బాగా దాహం వేస్తుంటుంది. ఎన్ని నీళ్లు తాగినా దప్పిక తీరినట్టు ఉండదు. అలాంటప్పుడు చల్లని, రుచికరమైన పానీయాలకే మొగ్తు చూపుతారు ప్రజలు. అలాంటి ఒక అద్భుతమైన పానీయం, ఈ సీజన్‌లో అన్ని వయసుల వారు ఇష్టపడే ఒక రుచికరమైన పానీయం జల్జీరా. నీరు, జీలకర్ర, పుదీనా వంటి ఆరోగ్యరమైన పదార్థాలతో తయారయ్యే ఈ పానీయం ఎక్కువగా బయట బండ్ల మీద కనిపిస్తుంది. వేసవిలో బయట దొరికే ఆరోగ్యకరమైన పానీయం ఏదైనా ఉందా అంటే ఇదే అంటారు ఆరోగ్యప్రియులు.
ఎందుకంటే.. జల్జీరాలో ఉండే పుదీనా ఆకులు వేసవిలో శరీరాన్ని చల్లగా ఉంచుతాయి, ఇందులోని నల్ల ఉప్పు జీర్ణక్రియకు సహాయపడుతుంది. దీని రుచి ఆకలిని పెంచుతుంది అలాగే శరీరాన్ని హైడ్రేటెడ్‌గా ఉంచి వేసవిలో వచ్చే డీహైడ్రేషన్ సమస్యలను తగ్గిస్తుంది. అయితే దీన్ని ప్రతిసారి బయటే కొనాలా ఇంట్లో తయారు చేసుకుంటే బాగుంటుంది కదా అనుకునేవారు కొందరైతే, ఎన్ని సార్లు ప్రయత్నించినా స్ట్రీట్ స్టైల్ రుచి రావడం లేదని ఫీలయ్యే వారు మరి కొందరు. మీరు కూడా ఇలాగే ఫీలవుతుంటే ఇది మీ కోసమే. ఈ చిట్కాలతో ట్రై చేశారంటే మీరు ఇంట్లోనే ఈజీగా రుచికరమైన జల్జీరాను తయారు చేసుకోవచ్చు. ఎలాగో చూసేద్దాం రండి.
జల్జీరా తయారీకి కావలసిన పదార్థాలు:
- ½ కప్పు పుదీనా ఆకులు
- ½ కప్పు కొత్తిమీర
- ½ అంగుళం అల్లం ముక్క (తొక్క తీసి ముక్కలుగా కోసినది)
- 2 పెద్ద స్పూన్లు తాజా నిమ్మరసం
- ½ స్పూన్ వేయించిన జీలకర్ర పొడి
- ¼ స్పూన్ ఇంగువ
- 2 స్పూన్లు నల్ల ఉప్పు
- ½ స్పూన్ సాధారణ ఉప్పు
- ¼ స్పూన్ మిరియాల పొడి
- 1 స్పూన్ పంచదార
- 2 స్పూన్లు ఆమ్ చూర్ పౌడర్
- 1 పెద్ద స్పూన్ చింతపండు గుజ్జు
- 4 కప్పులు చల్లటి నీరు
జల్జీరా తయారీ విధానం..
- జల్జీరా తయారు చేయడానికి ముందుగా ఒక మిక్సీ జార్ తీసుకుని దాంట్లో శుభ్రం కడుక్కున్న పుదీనా ఆకులు, కొద్దిగా కొత్తిమీర ఆకులను వేయాలి.
- తరువాత దీంట్లోనే చిన్న ముక్కులుగా కట్ చేసుకున్న అల్లం, అరకప్పు వరకూ నీటిని పోసి బ్లెండ్ చేయాలి.
- ఈ మిశ్రమాన్ని మెత్తటి పేస్టులా తయరు చేసుకుని ఒక గాజు పాత్రలోకి తీసుకోవాలి.
- దాంట్లో నిమ్మరసం, వేయించిన జీలకర్ర పొడి, ఇంగువ, నల్ల ఉప్పు, సాధారణ ఉప్పు, మిరియాల పొడి, పంచదార, ఆమ్ చూర్ పొడితో పాటు నానబెట్టిన చింతపండు గుజ్జు వేసి బాగా కలపాలి.
- తరువాత మిగిలిన 4 కప్పుల నీటిని కూడా ఇందులో పోసి బాగా కలపాలి.
- ఈ సమయంలో రుచి చూసుకుని ఉప్పు, నిమ్మరసం, చింతపండు గుజ్జు వంటివి అవసరమైతే కలుపుకోవాలి.
- అన్నీ కలిపిన తర్వాత ఈ మిశ్రమాన్ని కనీసం 3 నుంచి 4 గంటల పాటు ఫ్రిజ్‌లో చల్లబరచాలి. ఇలా ఉంచడం వల్ల మనం కలిపిన అన్ని పదార్థాలు నీటిలో కలిసిపోయి రుచి మెరుగవుతుంది.
- నాలుగు గంటలు దాటాక ఫ్రిజ్ నుంచి బయటికి తీసారంటే చల్ల చల్లని స్ట్రీట్ స్టైల్ జల్జీరా సిద్ధం అయినట్టే. దీన్ని సర్వింగ్ గ్లాసులో కొన్ని ఐస్ ముక్కలతో కలిపుకుని తాగేయడమే.
