బ్రేక్‌ఫాస్ట్ విషయంలో చాలా మంది చేసే 5 తప్పులు ఇవే! మీరు కూడా ఇలాగే చేస్తుట్లయితే వెంటనే ఆపేయండి!

రోజు మొదలుపెట్టే ముందు మనం తీసుకునే మొదటి ఆహారమే బ్రేక్‌ఫాస్ట్. ఇది నిజంగానే రోజులో అత్యంత ముఖ్యమైన మీల్స్‌లో ఒకటి. శరీరం రాత్రంతా విశ్రాంతి తీసుకున్న తర్వాత, ఉదయం లేవగానే దానికి శక్తినిచ్చే ఆహారం చాలా అవసరం. అందుకే ఆరోగ్య నిపుణులు అల్పాహారం ఎప్పుడూ ఆరోగ్యకరంగా ఉండాలని సూచిస్తారు. కానీ, చాలా మంది ఉదయం తొందరలో లేదా సరైన అవగాహన లేకపోవడం వల్ల కొన్ని తప్పులు చేస్తుంటారు. ఈ తప్పులు మన ఆరోగ్యంపై తీవ్రమైన ప్రభావం చూపుతాయి.

అల్పాహార సమయంలో సాధారణంగా చేసే 5 తప్పులు..

1) తప్పుడు సమయంలో తినడం:

మనం ఏ భోజనం తిన్నా సరైన సమయానికి తినడం చాలా ముఖ్యం. ఇది కేవలం ఒక అలవాటు మాత్రమే కాదు, ఇలా చేయడం వల్ల మన శరీరం అనేక ప్రక్రియలను క్రమబద్ధీకరిస్తుంది. సరైన సమయానికి అల్పాహారం తీసుకోవడం వల్ల రక్తంలో చక్కెర స్థాయిలు స్థిరంగా ఉంటాయి. గుండె ఆరోగ్యం మెరుగుపడుతుంది. శరీరంలో వాపు తగ్గుతుంది. జీర్ణక్రియ సాఫీగా జరుగుతుంది. ముఖ్యంగా అల్పాహారం మన నిద్రా విధానాన్ని, హార్మోన్ల విడుదలను, జీవక్రియను (మెటబాలిజం) నియంత్రిస్తుంది.

ఉదయం నిద్ర లేచిన గంట లేదా రెండు గంటల్లోపు అల్పాహారం తీసుకోవడం ఉత్తమం. చాలా ఆలస్యంగా లేదా సమయం తప్పించి తినడం వల్ల శరీరంలోని సహజమైన లయ దెబ్బతింటుంది. ఇది బరువు పెరగడానికి, ఇతర ఆరోగ్య సమస్యలకు దారితీయవచ్చు. కాబట్టి, ఉదయం వేళల్లో అల్పాహారం తినడానికి ఒక నిర్దిష్ట సమయాన్ని కేటాయించుకోవడం చాలా ముఖ్యం.

2) ప్రోటీన్‌ను విస్మరించడం:

చాలా మంది ఉదయం అల్పాహారంలో పిండి పదార్థాలు (కార్బోహైడ్రేట్స్) ఎక్కువగా తీసుకుంటారు. ప్రోటీన్‌ను పూర్తిగా విస్మరిస్తారు. ప్రోటీన్ కలిగిన అల్పాహారం రక్తంలో చక్కెర స్థాయిని అదుపులో ఉంచడానికి సహాయపడుతుంది, ముఖ్యంగా మీరు ఆరోగ్యకరమైన కొవ్వులతో కలిపి ప్రోటీన్ తీసుకుంటే మరింత మంచిది.

ప్రోటీన్ జీర్ణం కావడానికి ఎక్కువ సమయం పడుతుంది, కాబట్టి ఇది ఎక్కువసేపు కడుపు నిండిన భావనను కలిగిస్తుంది. మీరు రోజంతా మూడుసార్లు భోజనం చేస్తే, మీ శరీరానికి అవసరమైన ప్రోటీన్ మొత్తాన్ని ఆ మూడు భోజనాల్లో సమానంగా విభజించుకోవడం చాలా ముఖ్యం. గుడ్లు, పెరుగు, పనీర్, గింజలు, విత్తనాలు అల్పాహారానికి మంచి ప్రోటీన్ వనరులు.

3) అన్ని పండ్లతో స్మూతీ తాగడం:

తాజా పండ్లలో ఫైబర్, విటమిన్లు, ఖనిజాలు, యాంటీఆక్సిడెంట్లు పుష్కలంగా ఉంటాయి అనడంలో సందేహం లేదు. పండ్లు ఆరోగ్యానికి చాలా మంచివే. కానీ, చాలా మంది ఉదయం అల్పాహారంగా అన్ని రకాల పండ్లను కలిపి స్మూతీ చేసుకుని తాగుతారు. ఇలా చేయడం వల్ల మీరు పండ్లలోని పోషకాలను పొందుతారు, కానీ ఈ స్మూతీలో ప్రోటీన్, ఫైబర్ చాలా తక్కువగా ఉంటాయి.

కేవలం పండ్ల స్మూతీ తాగడం వల్ల రక్తంలో చక్కెర స్థాయిలు త్వరగా పెరుగుతాయి, త్వరగా తగ్గిపోతాయి. స్మూతీ ఆరోగ్యకరంగా ఉండాలంటే, అందులో కొన్ని ప్రోటీన్ అధికంగా ఉండే పదార్థాలు పెరుగు, పీనట్ బటర్, ఫైబర్ అధికంగా ఉండే పదార్థాలు ఓట్స్, కొన్ని రకాల ఆకులు కూడా కలపాలి.

4) అల్పాహారంలో తీపి తినడం :

చాలా మంది ఉదయం అల్పాహారంలో కేకులు, పేస్ట్రీలు, డోనట్స్ లేదా చక్కెర కలిపిన తృణధాన్యాలు వంటి తీపి పదార్థాలు తినడానికి ఇష్టపడతారు. ఇలాంటి ఆహారాలు మీ రక్తంలో చక్కెర స్థాయిని చాలా త్వరగా పెంచుతాయి. దీనివల్ల మీకు మొదట్లో శక్తి వచ్చినట్లు అనిపించినా, కొద్దిసేపటికే రక్తంలో చక్కెర స్థాయిలు పడిపోతాయి, అప్పుడు మీరు చాలా అలసిపోయినట్లు, మళ్లీ ఆకలిగా అనిపిస్తుంది.

5) కేవలం జ్యూస్ లేదా కాఫీ తాగడం:

చాలా మంది ఉదయం లేవగానే సమయం లేకపోవడం వల్ల లేదా అది అలవాటుగా మారిపోవడం వల్ల కేవలం ఒక గ్లాసు జ్యూస్ లేదా ఒక కప్పు కాఫీ మాత్రమే తాగుతారు. ఇది వారికి త్వరగా పూర్తయ్యే అల్పాహారంగా అనిపించవచ్చు. కానీ నిజానికి ఈ పానీయాలలో మన శరీరానికి అవసరమైన ముఖ్యమైన పోషకాలు, ప్రోటీన్లు చాలా తక్కువగా ఉంటాయి. జ్యూస్‌ చేసుకోవడం వల్ల పండ్లలో ఉండే ఫైబర్ తొలగిపోయి కేవలం చక్కెర మాత్రమే ఉంటుంది. కాఫీ కొంత శక్తినిచ్చినా, అది పోషకాలను అందించదు.

మీ శరీరానికి రోజంతా శక్తినివ్వడానికి, ఆరోగ్యంగా ఉండటానికి, జ్యూస్‌కు బదులుగా తృణధాన్యాలు (ఓట్స్, గోధుమలు), పండ్లు (తొక్కతో సహా), ప్రోటీన్ (గుడ్లు, పెరుగు), ఆరోగ్యకరమైన కొవ్వులు (గింజలు) కలిగిన పూర్తిస్థాయి అల్పాహారం తీసుకోవడం చాలా ముఖ్యం.

ఈ ఐదు తప్పులను గుర్తించి, వాటిని సరిదిద్దుకోవడం ద్వారా మీరు మీ ఆరోగ్యాన్ని గణనీయంగా మెరుగుపరచుకోవచ్చు.