Chanakya Niti : ఈ విషయాలు పాటించకపోతే మీ దగ్గర డబ్బు ఉండదు-7 things makes persons financially poor according to chanakya niti ,లైఫ్‌స్టైల్ న్యూస్
తెలుగు న్యూస్  /  Lifestyle  /  7 Things Makes Persons Financially Poor According To Chanakya Niti

Chanakya Niti : ఈ విషయాలు పాటించకపోతే మీ దగ్గర డబ్బు ఉండదు

Anand Sai HT Telugu
Mar 07, 2024 08:00 AM IST

Chanakya Niti On Money : ఆచార్య చాణక్యుడు తన చాణక్య నీతిలో డబ్బు గురించి చాలా విషయాలు చెప్పాడు. ఎలాంటి విషయాలు మనిషిని పేదవాడిని చేస్తాయో వివరించాడు.

చాణక్య నీతి
చాణక్య నీతి

మనిషి సంతోషంగా జీవించాలంటే డబ్బు కచ్చితంగా కావాలి. చాణక్యుడు తెలివైన ఆర్థికవేత్త. ఆయన చెప్పిన మాటలు ఫాలో అయితే జీవితంలో సంతోషంగా ఉండవచ్చు. చాణక్య నీతిలో డబ్బు గురించి చాలా ముఖ్యమైన విషయాలను తెలిపాడు. చాణక్యుడు ప్రకారం మీరు కొన్ని విషయాలపై శ్రద్ధ చూపకపోతే ధనవంతుల నుండి పేదలుగా మారడానికి ఎక్కువ సమయం పట్టదు. చాణక్యుడు ప్రకారం ఒక వ్యక్తిని పేదరికం వైపు నడిపించే అనేక కారణాలు ఉన్నాయి.

చాణక్య నీతిలో వ్యక్తి ఆర్థిక నాశనానికి దారితీసే కొన్ని అంశాలు ప్రస్తావించారు. డబ్బును సక్రమంగా ఎలా ఉపయోగించాలో కూడా చాణక్యుడు చెప్పుకొచ్చాడు. డబ్బుకు సంబంధించిన ముఖ్యమైన విషయాలను చాణక్యుడు ప్రస్తావించాడు.

డబ్బును దాచకూడదు

చాణక్యుడు ప్రకారం ధనవంతుడు తన డబ్బును ఎప్పుడూ దాచకూడదు. అలా కాకుండా సరైన స్థలంలో పెట్టుబడి పెట్టాలి. సంపదను కూడబెట్టుకునే వ్యక్తుల దగ్గర, దాని విలువ ఎక్కువ కాలం నిలవదు. ఆ డబ్బు విలువ క్రమంగా అంతరించిపోతుంది. మరోవైపు డబ్బును పెట్టుబడి పెడితే అది పెరుగుతూనే ఉంటుంది. అయితే పెట్టుబడి పెట్టే సమయంలోనూ ఆలోచించాలి. తిరిగి ఎక్కువ అయ్యే దాని గురించి తెలుసుకోవాలి.

వీరితో డబ్బు ఉంటే సమస్యలు

చాణక్యుడు చెప్పిన ప్రకారం, అన్యాయాన్ని అనుసరించే వ్యక్తికి ఎప్పుడూ డబ్బు ఉండదు. దుష్టులు విపరీతమైన ధనాన్ని సంపాదించడం ప్రారంభిస్తే వారి నాశనము ఖాయమని తెలుసుకోండి. ఎందుకంటే వీరు డబ్బును సరైన మార్గంలో ఉపయోగించరు.

అతిగా దానం చేయకూడదు

దానం చేయడం చాలా మంచి విషయం. అయితే చాణక్యుడు చెప్పేదేమిటంటే, వ్యక్తి తన సామర్థ్యాన్ని బట్టి మాత్రమే దానం చేయాలి. మీ ఆదాయం కంటే ఎక్కువ విరాళం ఇవ్వడం మిమ్మల్ని పేదలుగా మారుస్తుంది. అందువల్ల, ఎల్లప్పుడూ మీ ఆదాయాన్ని దృష్టిలో ఉంచుకుని ఖర్చు చేయండి. మీరు సంపాదించినంత డబ్బు ఆదా చేసుకోండి. అదే నిష్పత్తిలో ఇతరులకు సహాయం చేయండి.

ఖర్చులు అదుపు చేసుకోవాలి

ఖర్చులు అదుపు చేసుకోకపోతే ఎంత డబ్బు సంపాదించినా పొదుపు ఉండదు. ఎక్కువ డబ్బు సంపాదించడం ద్వారా మీరు ధనవంతులు కాలేరు. మీరు మీ ఖర్చులు, పొదుపులపై సమాన నియంత్రణను కలిగి ఉండాలి. అప్పుడే డబ్బు మీ దగ్గర ఉంటుంది. కూడబెట్టిన డబ్బును సరైన సమయంలో, సరైన స్థలంలో ఉపయోగించడం చాలా ముఖ్యం అని కూడా చాణక్యుడు చెప్పాడు.

డబ్బు చూసి గర్వపడకూడదు

చాణక్యుడి ప్రకారం ఒక వ్యక్తి తన డబ్బు గురించి గర్వపడకూడదని, ఎల్లప్పుడూ డబ్బుపై గౌరవం ఉండాలని చాణక్యుడు చెప్పాడు. మీకు డబ్బు వచ్చిన వెంటనే మీ మనస్సులోకి అహం రానివ్వకండి. అహం మీ తెలివితేటలను పాడు చేస్తుంది. దీని కారణంగా ఒక వ్యక్తి సంపద త్వరగా నాశనం అవుతుంది. అహంకారానికి దూరంగా ఉండండి. మీ ప్రవర్తన వినయంగా ఉండాలి.

లక్ష్యం స్పష్టంగా ఉండాలి

చాణక్య నీతి ప్రకారం మీ డబ్బుతో లక్ష్యాలను స్పష్టంగా తెలుసుకోండి. వాటిని సాధించడానికి కచ్చితమైన ప్రణాళికను రూపొందించండి. ఇది మీకు ప్రయోజనకరంగా ఉంటుంది. డబ్బు ద్వారా మీరు చేసే పనులు ఇతరులకు హాని కలిగించకూడదు. మీరు మీ లక్ష్యాలను దృష్టిలో ఉంచుకుని ముందుకు సాగాలి.

మీతో ఉండే వ్యక్తులు కూడా ముఖ్యమే

డబ్బు నిజమైన విలువను తెలుసుకోవడానికి, మిమ్మల్ని ప్రేరేపించే, ప్రోత్సహించే వ్యక్తులతో మీరు స్నేహం చేయడం మంచిది. ఒకే విధమైన విలువలు, లక్ష్యాలను పంచుకునే వ్యక్తులతో సమయాన్ని వెచ్చించండి. మీరు ప్రతికూల వ్యక్తుల నుండి దూరంగా ఉండటానికి ప్రయత్నించాలి.

WhatsApp channel