venkatesh- raviteja: టాలీవుడ్ లో మరో మల్టీస్టారర్...వెంకీ, రవితేజ కలయికలో సినిమా రానుందా...

సౌత్ ఇండస్ట్రీలో మల్టీస్టారర్ సినిమాల ట్రెండ్ పెరుగుతోంది. కథ నచ్చితే స్టార్ హీరోలు కూడా కలిసి నటించడానికి రెడీ అవుతున్నారు. ప్రస్తుతం తెలుగులో పలు మల్టీస్టారర్ సినిమాలు సెట్స్ పై ఉన్నాయి. తాజాగా మరో చిత్రానికి రంగం సిద్ధమవుతున్నట్లు తెలిసింది. వెంకటేష్, రవితేజ కలిసి ఓ సినిమా చేయబోతున్నట్లుగా టాలీవుడ్ లో జోరుగా ప్రచారం జరుగుతోంది. ఈ మల్టీస్టారర్ సినిమాకు శ్రీకాంత్ అడ్దాల దర్శకత్వం వహించనున్నట్లు వార్తలు వినిపిస్తున్నాయి.

వెంకటేష్, రవితేజ కలిసి సినిమా చేయడం ఇదే మొదటిసారి. ఇటీవలే వీరిద్దరు గ్రీన్ సిగ్నల్ ఇచ్చినట్లు తెలిసింది. త్వరలోనే ఈ సినిమాకు సంబంధించిన అధికారిక ప్రకటన వెలువడనున్నట్లు తెలిసింది. కొత్త బంగారులోకం, సీతమ్మవాకిట్లో సిరిమల్లె చెట్టు సినిమాలతో దర్శకుడిగా కమర్షియల్ సక్సెస్ లను అందుకున్నారు శ్రీకాంత్ అడ్దాల. మహేష్ బాబుతో బ్ర‌హ్మోత్స‌వం చేశాడు. ఫ్యామిలీ ఎంట‌ర్‌టైన‌ర్‌గా రూపొందిన ఈ చిత్రం నిర్మాత‌ల‌కు భారీగా న‌ష్టాల‌ను మిగిల్చింది. చాలా గ్యాప్ త‌ర్వాత ఇటీవ‌లే వెంక‌టేష్ నారప్ప సినిమాతో ప్రేక్షకుల ముందుకొచ్చాడు శ్రీకాంత్ అడ్డాల‌.

క‌రోనా కార‌ణంగా ఈ సినిమా నేరుగా ఓటీటీలో విడుద‌లైంది. తాజాగా ఇద్దరు అగ్ర హీరోలతో మ‌ల్టీస్టార‌ర్ సినిమా చేసే అవకాశాన్ని అతడు అందుకోవ‌డం టాలీవుడ్‌లో ఆస‌క్తిక‌రంగా మారింది. కాగా మే నెలలో ఎఫ్‌-3 సినిమాతో ప్రేక్ష‌కుల్ని ప‌ల‌క‌రించారు వెంక‌టేష్‌. ఫ‌న్ ఎంట‌ర్‌టైన‌ర్‌గా రూపొందిన ఈ చిత్రం చ‌క్క‌టి కలెక్షన్స్ రాబడుతోంది. మ‌రోవైపు రామారావు ఆన్ డ్యూటీ, ధ‌మాకా, రావ‌ణాసూర సినిమా షూటింగ్‌ల‌తో ర‌వితేజ బిజీగా ఉన్నారు. చిరంజీవి హీరోగా నటిస్తున్న వాల్తేర్ వీరయ్యలో రవితేజ ఓ కీలక పాత్రలో నటించనున్నట్లు వార్తలు వినిపిస్తున్నాయి.