OTT Movie: ఓటీటీలోకి వచ్చేసిన రూ.2800 కోట్ల వసూళ్ల బ్లాక్‌బస్టర్ మూవీ.. వీళ్లు ఫ్రీగా చూడొచ్చు

OTT Movie: ఓటీటీలో యానిమేటెడ్ మూవీస్ ఇష్టపడేవారి కోసం మరో సినిమా వచ్చేసింది. రూ.670 కోట్ల బడ్జెట్ తో తెరకెక్కిన ఈ సినిమా బాక్సాఫీస్ దగ్గర ఏకంగా రూ.2800 కోట్లు వసూలు చేసింది. ఈ సినిమా పేరు ది వైల్డ్ రోబో(The Wild Robot). గతేడాది థియేటర్లలో రిలీజై సంచలన విజయం సాధించిన ఈ మూవీ.. కొన్నాళ్లుగా అమెజాన్ ప్రైమ్ వీడియో, జీ5 ఓటీటీ ప్లాట్‌ఫామ్స్ లో రెంట్ విధానంలో అందుబాటులో ఉంది.

ది వైల్డ్ రోబో ఓటీటీ స్ట్రీమింగ్

ది వైల్డ్ రోబో మూవీ ఇప్పుడు జియోహాట్‌స్టార్ లోకి స్ట్రీమింగ్ కు రావడం విశేషం. ఇప్పటికే ఈ ఓటీటీ సబ్‌స్క్రిప్షన్ ఉన్న వాళ్లు ఫ్రీగా ఈ సినిమాను చూడొచ్చు. 2016లో పీటర్ బ్రౌన్ రాసిన ది వైల్డ్ రోబో నవల ఆధారంగా ఈ సినిమాను తెరకెక్కించారు. క్రిస్ సాండర్స్ డైరెక్ట్ చేయగా.. లుపితా న్యోంగో, పెడ్రో పాస్కల్, కిట్ కానర్, బిల్ నిగీ, స్టెఫానీ సులాంటి వాళ్లు నటించారు. డ్రీమ్‌వర్క్స్ యానిమినేషన్ మూవీని నిర్మించింది.

ది వైల్డ్ రోబో మూవీ గురించి..

ది వైల్డ్ రోబో మూవీ రోజ్ (న్యోంగో) అనే సర్వీస్ రోబో చుట్టూ తిరిగే స్టోరీ. ఆ రోబో ఓ ఓడ ధ్వంసం కావడంతో ఎక్కడో ఓ మారుమూల దీవిలో చిక్కుకుపోతుంది. అక్కడి కఠినమైన పరిస్థితులకు అలవాటు పడటంతోపాటు ఆ దీవిలో ఉన్న జంతువులతో మమేకమై ఆ రోబో ఎలా మనుగడ సాగించిందన్నది ఈ సినిమాలో చూడొచ్చు. కొన్నిసార్లు మనుగడ సాగించాలంటే ప్రోగ్రామ్ చేసిన దాని కంటే ఎక్కువ పనే చేయాల్సి ఉంటుందనే కాన్సెప్ట్ తో ఈ సినిమా తెరకెక్కింది.

ది వైల్డ్ రోబో బాక్సాఫీస్ కలెక్షన్లు

ది వైల్డ్ రోబో మూవీ ప్రపంచవ్యాప్తంగా ప్రేక్షకులను బాగా ఆకట్టుకుంది. సుమారు రూ.670 కోట్ల బడ్జెట్ తో ఈ సినిమాను తెరకెక్కించారు. అయితే బాక్సాఫీస్ దగ్గర మాత్రం ఏకంగా రూ.2800 కోట్లు వసూలు చేసింది. 2024లో వచ్చిన యానిమేటెడ్ మూవీస్ లో ది వైల్డ్ రోబో ఆరో స్థానంలో నిలిచింది.

అంతేకాదు 9 యానీ అవార్డులను కూడా సొంతం చేసుకుంది. 97వ అకాడెమీ అవార్డుల్లో బెస్ట్ యానిమేటెడ్ ఫీచర్ ఫిల్మ్ కేటగిరీలోనూ నామినేట్ అయింది. ఈ మూవీ పెద్ద సక్సెస్ కావడంతో ఇప్పుడు మేకర్స్ సీక్వెల్ కూడా ప్లాన్ చేస్తున్నారు.