ఓటీటీలో తమన్నా సినిమాకు మరింత బూస్ట్.. స్ట్రీమింగ్ వివరాలివే

స్టార్ హీరోయిన్ తమన్నా భాటియా ప్రధాన పాత్ర పోషించిన ఓదెల 2 సినిమా ఓటీటీలో అదరగొడుతోంది. థియేట్రికల్ రన్‍లో ప్లాఫ్ అయినా.. ఓటీటీలో సత్తాచాటుతోంది. అశోక్ తేజ దర్శకత్వం వహించిన ఈ సూపర్ నేచురల్ థ్రిల్లర్ సినిమా ఏప్రిల్ 17వ తేదీన థియేటర్లలో రిలీజైంది. సంపత్ నంది కథ, పర్యవేక్షణలో తెరకెక్కిన ఈ మూవీ కలెక్షన్లలో నిరాశపరిచింది. అయితే, గత వారం ఓటీటీలోకి వచ్చిన ఓదెల 2 మంచి వ్యూస్ సాధిస్తోంది. ఇప్పుడు ఓటీటీలో ఈ చిత్రానికి మరింత బూస్ట్ దక్కింది. అదేంటంటే..

మరో రెండు భాషల్లో..

ఓదెల 2 సినిమా నేడు (మే 17) కన్నడ, మలయాళం వెర్షన్లు కూడా అమెజాన్ ప్రైమ్ వీడియో ఓటీటీలో స్ట్రీమింగ్‍కు వచ్చేశాయి. ఈ సినిమా గత వారం మే 8వ తేదీన ఆ ఓటీటీలో స్ట్రీమింగ్‍కు వచ్చింది. ముందు ఐదు భాషలు అని ప్రకటించినా.. ఆరోజున తెలుగుతో పాటు తమిళం, హిందీలోనే స్ట్రీమింగ్‍కు తెచ్చింది ప్రైమ్ వీడియో. దీంతో కన్నడ, మలయాళ వెర్షన్లపై సందిగ్ధత నెలకొంది. అయితే, ఎట్టకేలకు నేడు ఆ రెండు భాషల వెర్షన్లు కూడా వచ్చేశాయి. మొత్తంగా ప్రస్తుతం అమెజాన్ ప్రైమ్ వీడియోలో ఐదు భాషల్లో స్ట్రీమ్ అవుతోంది.

మరింత జోరు చూపిస్తుందా!

ప్రైమ్ వీడియో ఓటీటీలో ఓదెల 2 సినిమా సత్తాచాటుతోంది. ఇప్పటికే నేషనల్ వైడ్‍ సినిమాల ట్రెండింగ్‍లో టాప్‍కు దూసుకొచ్చింది. భారీ వ్యూస్ సాధిస్తోంది. తెలుగు, తమిళం, హిందీకి తోడు ఇప్పుడు కన్నడ, మలయాళం వెర్షన్లు కూడా వచ్చేశాయి. దీంతో ఈ మూవీకి మరింత బూస్ట్ దక్కింది. మరిన్ని రోజులు జోరు చూపేందుకు అవకాశాలు పెరిగాయి.

బాక్సాఫీస్ డిజాస్టర్

ఓదెల 2 సినిమా చాలా అంచనాలతో థియేటర్లలో గత నెల విడుదలైంది. సీక్వెల్ హైప్, సంపత్ నంది కథ, తమన్నా లీడ్ రోల్ చేయడంతో అంచనాలు భారీగా నెలకొన్నాయి. అయితే, ఈ చిత్రం బాక్సాఫీస్ వద్ద బోల్తా కొట్టింది. మిక్స్డ్ టాక్ తెచ్చుకొని కమర్షియల్ డిజాస్టర్ అయింది. సుమారు రూ.25కోట్ల బడ్జెట్‍తో రూపొందిన ఈ మూవీ సుమారు రూ.9కోట్ల వసూళ్లనే సాధించింది. ప్లాఫ్‍గా నిలిచింది.

ఓదెల 2 చిత్రంలో భైరవి అనే నాగసాధువుగా తమన్నా నటించారు. దుష్టశక్తి నుంచి ఓదెల గ్రామాన్ని కాపాడే రోల్ చేశారు. ఈ సినిమాలో వశిష్ట ఎన్ సింహా, హెబ్బా పటేల్, వంశీ, నాగ మహేశ్, గగన్ విహారి, సురేందర్ రెడ్డి కీలకపాత్రలు చేశారు. మధు క్రియేషన్స్, సంపత్ నంది టీమ్ వర్క్స్ ప్రొడ్యూజ్ చేసిన ఈ సినిమాకు అజ్నీశ్ లోకనాథ్ మ్యూజిక్ ఇచ్చారు.