Odela 2 OTT: తమన్నా ఓదెల 2 మూవీ వచ్చేది ఈ ఓటీటీలోకే.. ట్రైలర్‌తో పెరిగిన అంచనాలు.. ఓటీటీలోకి వచ్చేది ఎప్పుడంటే?

Odela 2 OTT: తమన్నా నటించిన ఓదెల 2 మూవీ వచ్చే వారమే థియేటర్లలో రిలీజ్ కానున్న విషయం తెలుసు కదా. తాజాగా ఈ సినిమా ఓటీటీ పార్ట్‌నర్ పై స్పష్టత వచ్చింది. ప్రముఖ దర్శకుడు సంపత్ నంది కథ అందించిన ఈ మూవీ హక్కులను అమెజాన్ ప్రైమ్ వీడియో సొంతం చేసుకుంది. ఈ సూపర్ నేచురల్ థ్రిల్లర్ మూవీ గతంలో వచ్చిన ఓదెల రైల్వే స్టేషన్ కు సీక్వెల్ గా వస్తోంది.

ఓదెల 2 ఓటీటీ

ఓదెల 2 మూవీ ఓటీటీ హక్కులను అమెజాన్ ప్రైమ్ వీడియో సొంతం చేసుకున్నట్లు ఓటీటీప్లే రిపోర్టు వెల్లడించింది. ఈ సినిమా హక్కుల కోసం రూ.11 కోట్లు చెల్లించినట్లు కూడా గతంలో వార్తలు వచ్చాయి. మూవీ టీజర్ ను మహాకుంభమేళాలో రిలీజ్ చేసిన మేకర్స్.. తాజాగా మంగళవారం (ఏప్రిల్ 8) ట్రైలర్ ను తీసుకొచ్చారు. ఈ సినిమా ఏప్రిల్ 17న థియేటర్లలో రిలీజ్ కానుంది.

2022లో వచ్చిన క్రైమ్ థ్రిల్లర్ మూవీ ఓదెల రైల్వే స్టేషన్ కు సీక్వెల్ గా ఈ ఓదెల 2 వస్తోంది. ఇందులో తమన్నా.. శివ శక్తి పాత్రలో నటిస్తోంది. ఓ అఘోరలాగా ఆమె లుక్ ఉంది. ఓదెల 2 థియేటర్లలో రిలీజైన తర్వాత కనీసం నాలుగు వారాలకు ఓటీటీలోకి అడుగుపెట్టనుంది. ఆ లెక్కన మే మూడో వారంలో ప్రైమ్ వీడియోలోకి ఈ సినిమా రావచ్చు.

ఓదెల 2 ట్రైలర్ ఎలా ఉందంటే?

ఓదెల 2 ట్రైలర్ మంగళవారం ప్రేక్షకుల ముందుకు వచ్చింది. ఈ ట్రైలర్ పవర్ ఫుల్ వాయిస్‌ఓవర్‌తో ప్రారంభమవుతుంది. ఇది ఓదెల గ్రామంపై పొంచి ఉన్న ముప్పును సూచిస్తూ.. ఒక దుష్ట శక్తి గురించి చెబుతుంది. ఈ చెడు శకునాలు కనిపించడం ప్రారంభించగానే, గ్రామస్తులు భయంతో వణికిపోతారు.

చీకటి నెమ్మదిగా తమ జీవితాలను ఆవహిస్తోందని గ్రహిస్తారు. అదే సమయంలో ఓ నాగ సాధువు వస్తుంది. అచంచలమైన దృఢ సంకల్పంతో ఆమె చెడును ఎదుర్కోవాలని ప్రతిజ్ఞ చేస్తుంది. నాగ సాధువుగా తమన్నా భాటియా అద్భుతమైన నటనతో ఆకట్టుకుంది.

ఈ చిత్రాన్ని గ్రాండ్ పాన్ ఇండియా స్థాయిలో రూపొందిస్తున్నారు. సంపత్ నంది కథ, స్క్రీన్‌ప్లే, డైలాగ్ రైటర్ గా మల్టిపుల్ రోల్స్ లో వర్క్ చేశారు. అలాగే డైరెక్షన్ సూపర్ విజన్ ని అందిస్తున్నారు. అశోక్ తేజ ఈ చిత్రానికి దర్శకత్వం వహిస్తున్నారు. మధు క్రియేషన్స్, సంపత్ నంది టీమ్‌వర్క్స్ బ్యానర్స్ పై డి. మధు నిర్మిస్తున్నారు.