Hitchcock Book: హిచ్‌కాక్ ఓ బ్రాండ్ - మాస్ట‌ర్ ఆఫ్ స‌స్పెన్స్ హిచ్‌కాక్ బుక్‌పై సీనియ‌ర్ రైట‌ర్ మ‌ల్లాది ప్ర‌శంస‌లు

Alfred Hitchcock Book మాస్ట‌ర్ ఆఫ్ స‌స్పెన్స్‌గా పేరుతెచ్చుకున్న హాలీవుడ్ దిగ్గ‌జ ద‌ర్శ‌కుడు ఆల్ఫ్రెడ్ హిచ్‌కాక్ పేరు తెలియ‌ని సినీ అభిమాని ఉండ‌డంటే అతిశ‌యోక్తి కాదేమో. క్రైమ్‌, స‌స్పెన్స్‌, సైక‌లాజిక‌ల్ సినిమాల‌కు ఆద్యుడిగా హిచ్‌కాక్ పేరు తెచ్చుకున్నారు. ఆయ‌న అందించిన స్ఫూర్తితోనే హాలీవుడ్‌తో వివిధ భాష‌ల్లో ఎన్నో సూప‌ర్ హిట్ సినిమాలొచ్చాయి.

ఆల్ఫెడ్‌ హిచ్‌కాక్ 125వ జయంతితో పాటు... ఆయన తొలి సినిమా విడుదలై వందేళ్లు పూర్త‌యిన‌ సందర్భంగా దిగ్గ‌జ ద‌ర్శ‌కుడి సినీ జీవితంపై మాస్టర్ ఆఫ్ సస్పెన్స్ హిచ్‌కాక్ పేరుతో సీనియర్ సినీ రచయిత పులగం చిన్నారాయణ, ఐఆర్ఎస్ అధికారి రవి పాడి కలిసి పుస్తకం తీసుకొచ్చారు.

45 మంది ద‌ర్శ‌కులు...

మాస్టర్ ఆఫ్ సస్పెన్స్ హిచ్‌కాక్ బుక్‌లో 45 మంది దర్శకులు, ఏడు మంది రచయితలు, పది మంది జర్నలిస్టులు రాసిన మొత్తం 62 వ్యాసాలు ఉన్నాయి. ఇటీవల సీనియ‌ర్ డైరెక్ట‌ర్ వంశీ చేతుల మీదుగా మాస్టర్ ఆఫ్ సస్పెన్స్ హిచ్‌కాక్ పుస్తకావిష్కరణ కార్యక్రమం జరిగింది. ఈ బుక్ తొలి ప్రతిని హరీష్ శంకర్ అందుకున్నారు.

మ‌ల్లాది వెంక‌ట‌కృష్ణ‌మూర్తి ముందు మాట‌...

ఇటీవ‌ల విడుద‌లైన మాస్టర్ ఆఫ్ సస్పెన్స్ హిచ్‌కాక్ బుక్ సీనియ‌ర్ రైట‌ర్‌ మల్లాది వెంకట కృష్ణమూర్తిని మెప్పించింది. మాస్టర్ ఆఫ్ సస్పెన్స్ హిచ్‌కాక్ బుక్‌కు

ముందుమాట రాయడమే కాకుండా ఈ పుస్తకాన్ని అభినందిస్తూ మల్లాది వెంకట కృష్ణమూర్తి ఒక ప్రశంసా పూర్వక ఆడియో విడుదల చేశారు.

క్రైమ్, మిస్టరీ, సస్పెన్స్ డ్రామాల‌కు హిచ్‌కాక్ పేరును ఒక బ్రాండ్ అని మ‌ల్లాది వెంక‌ట కృష్ణ‌మూర్తి ఈ ఆడియోలో పేర్కొన్నారు. మాస్టర్ ఆఫ్ సస్పెన్స్ హిచ్‌కాక్ గురించి మల్లాది వెంకట కృష్ణమూర్తి మాట్లాడుతూ... ''ఇంగ్లీష్ సినిమాలు చూడని వారికి కూడా దర్శకుడు ఆల్ఫ్రెడ్ హిచ్‌కాక్ పేరు సుపరిచితం. కారణం ఆయన సినిమాల్లోని విశిష్టత. దాన్ని చూసిన వారు చూడని వారికి ఆ సినిమాల గురించి చెప్పేంత విశిష్టమైనవి.

కొన్ని మినహాయిస్తే... హిచ్‌కాక్ తీసినవి క్రైమ్, మిస్టరీ, సస్పెన్స్ డ్రామాలు. ఆయన తన పేరును ఒక బ్రాండ్ గా ఎస్టాబ్లిష్ చేసుకున్నారు. అందుకు ఆయన తన ఫోటోలను, చతురోక్తులను బాగా ఉపయోగించుకున్నారు. 'నేను సిండ్రెల్లా సినిమా తీస్తే... ప్రేక్షకులు శవం కోసం ఎదురు చూస్తారు' అని ఒక ఇంటర్వ్యూలో చెప్పారు హిచ్‌కాక్ అని మ‌ల్లాది వెంక‌ట కృష్ణ‌మూర్తి అన్నారు.

సైకో విడుద‌ల త‌ర్వాత‌...

'సైకో' విడుదలయ్యాక ఒక భర్త నుంచి వచ్చిన ఉత్తరాన్ని హిచ్‌కాక్ కు స్టూడియో హెడ్ అందించారు. 'సైకో' సినిమాలోని బాత్ టబ్ హత్య సన్నివేశం చూశాక తన భార్య స్నానం చేయడం మానేసిందని, ఏం చేయాలో చెప్పమని సలహా కోరతాడు భర్త. అందుకు హిచ్‌కాక్ ఇచ్చిన సమాధానం ఏమిటో తెలుసా? ‘మీ ఆవిడను లాండ్రీకి పంపించండి’ అని…

సస్పెన్స్ గురించి హిచ్‌కాక్ చెప్పింది అక్షర సత్యం. ఆతృతగా ఎదురు చూడటంలోనే ఉత్కంఠ ఉంటుంది. సస్పెన్స్ మహిళ వంటిదని, ఊహకు ఎంత వదిలేస్తే అంత ఉత్కంఠ పెరుగుతుందని హిచ్‌కాక్ చెప్పారు. సినిమా నిడివి ప్రేక్షకుడు బాత్ రూంకు వెళ్లకుండా భరించేంత కాలం మాత్రమే ఉండాలని చెప్పింది కూడా హిచ్‌కాక్ అని మ‌ల్లాది వెంక‌ట కృష్ణ‌మూర్తి ఈ ఆడియోలో పేర్కొన్నారు.

రెండు వారాల్లో...

పులగం చిన్నారాయణ, రవి పాడి సంపాదకత్వంలో వెలువడ్డ మాస్టర్ ఆఫ్ సస్పెన్స్ హిచ్‌కాక్ పుస్తకంలో ఆయన తీసిన సినిమాల గురించి వ్యాసాలు ఉన్నాయి. ఈ పుస్తకం మొదటి ఎడిషన్ రెండు వారాల్లో అమ్ముడు కావడం తెలుగు వారికి హిచ్‌కాక్ మీద ఉన్న అభిమానానికి నిదర్శనం. పులగం చిన్నారాయణ, రవి పాడి కి అభినందనలు. ఈ పుస్తకంలో ముందుమాట రాసే అవకాశం రాకపోతే నేనూ హిచ్‌కాక్ ఫ్యాన్ అని తెలియజేసే అవకాశం ఉండేది కాదు'' అని మ‌ల్లాది వెంక‌ట కృష్ణ‌మూర్తి ఆడియోలో పేర్కొన్నారు.