MS Dhoni in RC16: రామ్‍చరణ్ సినిమాలో ధోనీ క్యామియో రోల్? చక్కర్లు కొడుతున్న క్రేజీ రూమర్.. నిజమిదే!

మెగా పవర్ స్టార్ రామ్‍చరణ్‍కు ఈ ఏడాది గేమ్ ఛేంజర్ మూవీ నిరాశను మిగిల్చింది. ప్రస్తుతం ఉప్పెన ఫేమ్ డైరెక్టర్ బుచ్చిబాబు సానతో మూవీ (RC16) చేస్తున్నారు చరణ్. స్పోర్ట్స్ యాక్షన్ డ్రామాగా ఈ చిత్రం ఉండనుందని తెలుస్తోంది. ఈ సినిమాపై ఇప్పటికే భారీ హైప్ ఉంది. కండలు బాగా పెంచేశారు చెర్రీ. ఈ మూవీపై ప్రస్తుతం ఓ క్రేజీ రూమర్ చక్కర్లు కొడుతోంది. ఆ వివరాలు ఇవే..

క్యామియో రోల్‍లో ధోనీ అంటూ..

రామ్‍చరణ్ - బుచ్చిబాబు మూవీలో భారత దిగ్గజ మాజీ కెప్టెన్ మహేంద్ర సింగ్ ధోనీ క్యామియో రోల్‍లో కనిపించనున్నారంటూ తాజాగా ఓ రూమర్ చక్కర్లు కొడుతోంది. ఈ చిత్రంతో ధోనీ తెరంగేట్రం చేయనున్నాడంటూ సోషల్ మీడియాలో పుకార్లు వ్యాపిస్తున్నాయి. క్రికెట్ బ్యాక్‍డ్రాప్‍ ఉండే ఆర్‌సీ16లో రామ్‍చరణ్‍కు కోచ్‍గా కాసేపు ధోనీ కనిపిస్తారనే ఊహాగానాలు వినిపిస్తున్నాయి.

స్పందించిన టీమ్

ఆర్‌సీ16లో ధోనీ నటిస్తారనే రూమర్లు ఎక్కువవుతుండటంతో మూవీ టీమ్ స్పందించింది. ఈ చిత్రంలో ధోనీ నటించడం లేదని, ఆ దిశగా చర్చలు జరగలేదని వెల్లడించింది. దీంతో ఈ విషయంపై క్లారిటీ వచ్చేసింది.

ఇద్దరి మధ్య పరిచయం

రామ్‍చరణ్, ధోనీ మధ్య మంచి పరిచయాలే ఉన్నాయి. గతంలో ముంబైలో కలిసి ఓ యాడ్ షూట్ కూడా చేశారు. అప్పుడు కలిసి మాట్లాడుకున్నారు. అందుకు సంబంధించిన ఫొటోలు కూడా బయటికి వచ్చాయి.

ఆర్‌సీ16 మూవీ షూటింగ్ ప్రస్తుతం జోరుగా సాగుతోంది. ఈ చిత్రం కోసం భారీగా బాడీ పెంచారు చెర్రీ. గడ్డం, జుట్టు కూడా ఎక్కువగా పెంచారు. రగెడ్ లుక్‍లో ఈ మూవీలో కనిపించనున్నారు. ఈ చిత్రాన్ని ఏడాది చివర్లో.. లేకపోతే వచ్చే సంవత్సరం మొదట్లో విడుదల చేసేందుకు కూడా ప్లాన్ చేస్తున్నట్టు తెలుస్తోంది. ఈ మూవీకి ఎక్కువగా వీఎఫ్‍ఎక్స్ అవసరం లేకపోవటంతో ఇది సాధ్యమవుతుందని ఇండస్ట్రీ వర్గాల టాక్.

ఆర్‌సీ16 చిత్రానికి ఆస్కార్ విన్నర్ ఏఆర్ రహమాన్ సంగీతం అందిస్తున్నారు. ఈ మూవీలో రామ్‍చరణ్ సరసన జాన్వీ కపూర్ హీరోయిన్‍గా చేస్తున్నారు. కన్నడ సూపర్ స్టార్ శివ రాజ్‍కుమార్ ఓ కీలకపాత్ర పోషిస్తున్నారు. ఈ చిత్రానికి పెద్ది అనే టైటిల్‍ను పరిగణిస్తున్నట్టు చాలా కాలంగా రూమర్లు ఉన్నాయి. ఈ మూవీని మైత్రీ మూవీ మేకర్స్, వృద్ధి సినిమాస్ కలిసి ప్రొడ్యూజ్ చేస్తున్నాయి.

వార్నర్.. తెలుగు మూవీతోనే…

కాగా, తెలుగు మూవీ రాబిన్‍హుడ్‍తో తెరంగేట్రం చేస్తున్నారు ఆస్ట్రేలియా స్టార్ క్రికెటర్ డేవిడ్ వార్నర్. ఈ విషయంపై ఇప్పటికే అధికారిక ప్రకటన కూడా వచ్చింది. వార్నర్ ఫస్ట్ లుక్ రివీల్ అయింది.