హీరోలను ఆరాధిస్తాం.. అది ఒక్కరి తప్పు కాదు.. విజయ్ ర్యాలీలో 41 మంది మరణించడంపై కాంతార హీరో రిషబ్ శెట్టి వైరల్ కామెంట్లు

కాంతార చాప్టర్ 1 సక్సెస్ తో జోష్ మీదున్నారు రిషబ్ శెట్టి. అతను తాజాగా తమిళనాడులోని కరూర్లో నటుడు, రాజకీయ నాయకుడు విజయ్ ర్యాలీలో జరిగిన విషాదకర తొక్కిసలాట గురించి స్పందించారు. ఇది ఒక వ్యక్తి వైఫల్యం కాదని, 'సమష్టి తప్పిదం' అని అభివర్ణించారు. ఎన్డీటీవీతో మాట్లాడుతూ భారతీయ సినిమాలో హీరో ఆరాధన సంస్కృతి గురించి రిషబ్ శెట్టి కామెంట్ చేశారు. ఇలాంటి విషాదాలు తరచుగా అభిమానం, సామూహిక ఉన్మాదం మధ్య ఉన్న సరిహద్దులను హైలైట్ చేస్తాయని అన్నారు.

హీరోలను ఆరాధిస్తాం

“ఇది సమష్టి తప్పిదం” అని విజయ్ పార్టీ తమిళగ వెట్రి కజగం (టీవీకే) రాజకీయ ర్యాలీలో జరిగిన తొక్కిసలాటలో 41 మంది మరణించిన ఘటన గురించి అడిగిన ప్రశ్నకు రిషబ్ శెట్టి స్పందించారు. “మనకు ఒక హీరో లేదా అతని పాత్ర నచ్చితే ఆ హీరోను మనం ఆరాధిస్తాం. దానిపై నేను ఎలా కామెంట్ చేయగలను? ఇలాంటి ప్రమాదాలు జరిగినప్పుడు అది దురదృష్టకరం. అక్కడ దాదాపు 40 మంది మరణించారు” అని అన్నారు.

సమష్టి వైఫల్యం

ఇది ఒక వ్యక్తి చేసిన తప్పు అని తాను నమ్మడం లేదని, ఈ విషాదం ఒక సమష్టి వైఫల్యం అని రిషబ్ శెట్టి అన్నారు. “ఇది ఒక వ్యక్తి చేసిన తప్పు అని నేను అనుకోను. బహుశా ఇది చాలా మంది చేసిన సమష్టి తప్పిదం కావచ్చు. బహుశా దీనిని నియంత్రించి ఉండవచ్చు. అందుకే దీనిని మనం ప్రమాదం అంటాము. ఇది ఉద్దేశపూర్వకంగా జరగలేదు” అని ఆయన అన్నారు.

చట్టాన్ని అమలు చేసే అధికారులు, నిర్వాహకులకు గుంపులను నియంత్రించే బాధ్యత ఉందని, అయితే పెద్ద ఎత్తున జరిగే సమావేశాలను నియంత్రించడం కష్టమని శెట్టి పేర్కొన్నారు. “మనం పోలీసులను లేదా ప్రభుత్వాన్ని సులభంగా నిందించవచ్చు. వారికి బాధ్యత ఉంది. కానీ కొన్నిసార్లు వారు గుంపును నియంత్రించడంలో ఇబ్బందులు ఎదుర్కొంటారు” అని ఆయన వివరించారు.

41 మంది

2026 తమిళనాడు అసెంబ్లీ ఎన్నికల సందర్భంగా రాష్ట్రవ్యాప్తంగా రాజకీయ ప్రచారం కోసం విజయ్ పర్యటనలో భాగంగా సెప్టెంబర్ 27న కరూర్ తొక్కిసలాట జరిగింది. అధికారులు తెలిపిన వివరాల ప్రకారం 10,000 మందికి ఉద్దేశించిన వేదికకు దాదాపు 30,000 మంది చేరుకోవడంతో తొక్కిసలాట, గందరగోళం ఏర్పడింది. ఈ విషాదంలో 41 మంది మరణించగా, 60 మందికి పైగా గాయపడ్డారు.

ఈ ఘటన తర్వాత విజయ్ ఒక్కో బాధిత కుటుంబానికి రూ.20 లక్షలు, గాయపడిన వారికి రూ.2 లక్షల పరిహారం ప్రకటించారు. వీడియో కాల్ ద్వారా బాధిత కుటుంబాలతో మాట్లాడి, తన ప్రగాఢ సానుభూతిని తెలియజేశారు.

కాంతార చాప్టర్ 1 బాక్సాఫీస్

రిషబ్ శెట్టి సినిమా కాంతార చాప్టర్ 1 బాక్సాఫీస్ వద్ద సంచలనం సృష్టిస్తోంది. సోమవారం నాడు 50 శాతం వసూళ్లు తగ్గినప్పటికీ ఈ చిత్రం రూ. 250 కోట్ల మార్కును దాటి, ఇప్పుడు మరో మైలురాయిని చేరుకునే దిశగా సాగుతోంది. ప్రపంచవ్యాప్తంగా రూ.400 కోట్లు ఖాతాలో వేసుకుంది. ఈ చిత్రం రికార్డు బ్రేకింగ్ ఓపెనింగ్ వీకెండ్ ను మాత్రమే కాకుండా, కర్ణాటకలో బాహుబలి 2ను అధిగమించి ఆల్ టైమ్ బిగ్గెస్ట్ ఫస్ట్ మండేను కూడా సొంతం చేసుకుంది. యష్ నటించిన కేజీఎఫ్ చాప్టర్ 2ను కూడా ఓపెనింగ్ వీకెండ్లో అధిగమించింది.