ఎవరైనా రివ్యూస్ రాసేటప్పుడు అది ఆలోచించాలి.. నితిన్ తమ్ముడు నిర్మాత దిల్ రాజు కామెంట్స్

టాలీవుడ్ అగ్ర నిర్మాతల్లో ఒకరైన దిల్ రాజు ప్రొడ్యూస్ చేసిన సరికొత్త తెలుగు మూవీ తమ్ముడు. నితిన్ హీరోగా, వేణు శ్రీరామ్ దర్శకత్వంలో తెరకెక్కిన తమ్ముడు సినిమా ఇవాళ (జూలై 4) థియేటర్లలో విడుదల కానుంది. ఈ నేపథ్యంలో ఇటీవల ఇచ్చిన ప్రమోషనల్ ఇంటర్వ్యూలో మూవీ రివ్యూస్‌పై నిర్మాత దిల్ రాజు చేసిన కామెంట్స్ వైరల్ అవుతున్నాయి.

సూపర్ హిట్ దక్కినట్లే

-తమ్ముడు మూవీకి అజనీష్ మంచి సౌండింగ్ డిజైన్ చేశాడు. మనమంతా కొత్త సినిమా కావాలనుకుంటాం. శ్రీరామ్ కూడా కొత్తగా ప్రయత్నిస్తా అన్నాడు. మేము ఫుల్ ఫ్రీడమ్ ఇచ్చి చేయించాం. శుక్రవారం మార్నింగ్ షో చూసిన మీ అందరికీ మా సినిమా నచ్చితే సూపర్ హిట్ దక్కినట్లే.

సింపుల్ స్టోరీనే

-కథగా చూస్తే ఇది సింపుల్ స్టోరీ. అక్కా, తమ్ముడి మధ్య ఓ సమస్య రావడం, ఆ సమస్యను సాల్వ్ చేసుకోవడానికి ఎలాంటి ప్రయత్నం చేశారు అనేది మూవీలో చూస్తారు. ఈ కథను స్క్రీన్ ప్లే పరంగా కొత్తగా చూపిస్తూ, యాక్షన్ సీక్వెన్స్‌తో వెళ్తూ ఆసక్తికరంగా దర్శకుడు తెరకెక్కించారు.

యాటిట్యూడ్ వచ్చిందంటారు

-పైరసీ అయినా, ఈ నెగిటివ్ ప్రచారాన్ని అయినా క్రమంగా ఒక్కో స్టెప్‌తో ఎదుర్కొంటూ వెళ్లాల్సిందే. ఎవరైనా రివ్యూస్ రాసేప్పుడు నిర్మాత గురించి ఒక్క నిమిషం ఆలోచించాలి. హీరో, డైరెక్టర్‌కు కూడా ఎఫెక్ట్ అయినా, ఎక్కువ నష్టం జరిగేది ప్రొడ్యూసర్‌కే. నేను వీటిపైన గట్టిగా మాట్లాడితే దిల్ రాజుకు యాటిట్యూడ్ వచ్చింది అంటారు.

అనిల్ బాగా ప్లాన్ చేసి

-నిర్మాతగా సినిమాను బాగా రెడీ చేసి ప్రాపర్‌గా రిలీజ్ చేసి ప్రేక్షకుల ముందుకు తీసుకొస్తాం. వారికి నచ్చితే సూపర్ హిట్ అవుతుంది. సంక్రాంతికి వస్తున్నాం సినిమాకు డైరెక్టర్ అనిల్ బాగా ప్లాన్ చేసి ప్రేక్షకులకు మూవీ రీచ్ అయ్యేలా చేశాడు. ఆ సినిమా మేము అనుకున్నదానికంటే ఎక్కువ సక్సెస్ అయ్యింది.

ముందే ఓటీటీ ప్రకటించడం

-తమ్ముడు రిజల్ట్ మీద కాన్ఫిడెంట్‌గా ఉన్నాం. అయితే ఎంత రేంజ్ హిట్ అవుతుంది అనేది మాత్రం రిలీజ్ రోజునే తెలుస్తుంది. ఫలానా ఓటీటీ సినిమాను తీసుకుంది అని ముందే ప్రకటించడం ఆపేస్తే మంచిది. ఓటీటీలు కూడా ఈ విషయంలో సపోర్ట్ చేస్తున్నాయి. తమ్ముడు మూవీ కంటెంట్‌కు వస్తున్న వ్యూస్ విషయంలో జెన్యూన్‌గా ఉంటున్నాం.