Ponniyin Selvan 2 OTT Release: పొన్నియిన్ సెల్వన్ 2 ఓటీటీ స్ట్రీమింగ్‌పై బజ్.. ఎప్పుడు? ఎందులో వస్తుందంటే?

Ponniyin Selvan 2 OTT Release: మణిరత్నం ప్రతిష్టాత్మక చిత్రం పొన్నియిన్ సెల్వన్. రెండు భాగాలుగా విడుదలవుతున్న ఈ మూవీ ఫస్ట్ పార్ట్ గతేడాది విడుదలై మంచి టాక్ తెచ్చుకుంది. ప్రస్తుతం రెండో భాగం విడుదలకు సిద్ధమవుతోంది. ఏప్రిల్ 28న ప్రపంచ వ్యాప్తంగా ప్రేక్షకుల ముందుకు రానుంది. ఈ పాన్ ఇండియా ప్రాజెక్టులో విక్రమ్, కార్తి, జయం రవి, త్రిష, ఐశ్వర్య రాయ్ తదితరులు కీలక పాత్రలు పోషించారు. థియేటర్లలో మరికొన్ని గంటల్లో విడుదల కానున్న తరుణంలో ఓటీటీలో ఎప్పుడు స్ట్రీమింగ్ గురించి ఆసక్తికర అప్డేట్ బయటకొచ్చింది.

పొన్నియిన్ సెల్వన్ 2 చిత్రాన్ని డిజిటల్ రైట్స్‌ను ప్రముఖ ఓటీటీ సంస్థ అమెజాన్ ప్రైమ్ వీడియో సొంతం చేసుకుంది. దీంతో ఈ ఓటీటీలోనే స్ట్రీమింగ్ కానుంది. అయితే ఈ మూవీని డిజిటల్ మాధ్యమంలో విడుదల చేసేందుకు కాస్త సమయం పట్టే అవకాశముంది. ఫిల్మ్ వర్గాల సమాచారం ప్రకారం ఈ సినిమాను జూన్ ప్రారంభంలో స్ట్రీమింగ్ చేయనున్నారని తెలుస్తోంది. అది కూడా సినిమా రిజల్ట్‌పై ఆధారపడి ఉంటుంది.

పొన్నియిన్ సెల్వన్ సినిమా మణిరత్నం కెరీర్‌లోనే అత్యంత ప్రతిష్టాత్మకమైన చిత్రం. ఓ రకంగా చెప్పాలంటే ఇది ఆయన కలల ప్రాజెక్టు. ప్రముఖ తమిళ రచయిత కల్కీ రాసిన పొన్నియిన్ సెల్వన్ నవల ఆధారంగా ఈ మూవీ తెరకెక్కింది. 1980వ దశకం నుంచి ఈ చిత్రాన్ని వెండితెరపై ఆవిష్కరించాలనకున్న ఆయన.. ఆ కలను దాదాపు 40 ఏళ్ల తర్వాత నెరవేర్చుకున్నారు. ఈ సమయంలో సినిమాను పట్టాలెక్కించడానికి ప్రయత్నించనప్పటికీ ఫిల్మ్ మేకింగ్ టెక్నాలజీలో లోపాల కారణంగా ఆయన ప్రయత్నం కార్యరూపం దాల్చలేదు.

ఈ సినిమాను రూపొందించడానికి తనకు రాజమౌళినే కారణమని మణిరత్నం తెలిపారు. బాహుబలి, బాహుబలి 2 కారణంగానే పొన్నియిన్ సెల్వన్ తెరకెక్కించాలనే ఆలోచన వచ్చినట్లు ఆయన తెలిపారు. అంతేకాకుండా మూవీ రెండు భాగాలుగా తెరకెక్కించాలనే ఐడియా అక్కడ నుంచే వచ్చిందని స్పష్టం చేశారు.

మణిరత్నం దర్శకత్వం వహించిన ఈ సినిమాను లైకా ప్రొడక్షన్స్ నిర్మించింది. విక్రమ్, కార్తి, జయం రవి, ఐశ్వర్య రాయ్, త్రిష, ఐశ్వర్య లక్ష్మీ, శోభితా ధూళిపాల, ప్రకాష్ రాజ్, శరత్ కుమార్ లాంటి భారీ తారాగణం ఇందులో నటించింది. ఈ సినిమాకు ఆస్కార్ విన్నర్ ఏఆర్ రెహమాన్ సంగీతాన్ని సమకూర్చారు. ఏప్రిల్ 28న ప్రపంచ వ్యాప్తంగా ప్రేక్షకుల ముందుకు రానుందీ చిత్రం. మాతృక తమిళంతో పాటు తెలుగు, హిందీ, కన్నడ, మలయాళ భాషల్లో ఇది విడుదల కానుంది.