Pawan Kalyan: పవన్ కళ్యాణ్ మూవీ హరిహర వీరమల్లు నుంచి ఇంట్రస్టింగ్ అప్‌డేట్.. ధర్మ పోరాటంలో ఆఖరి అధ్యాయం మొదలైందట
Hari Hara Veera Mallu Updates: రాజకీయాల్లో ఇటీవల బిజీ అయిపోయిన పవన్ కళ్యాణ్.. చాలా రోజుల తర్వాత మళ్లీ హరిహర వీరమల్లు సెట్స్‌లో అడుగు పెట్టారు. ఈ సినిమా ఎప్పుడు థియేటర్లలోకి రానుందంటే?
ఏపీ డిప్యూటీ సీఎం పవన్ కళ్యాణ్ ఎట్టకేలకు మళ్లీ హరిహర వీరమల్లు షూటింగ్‌కి హాజరయ్యారు. గత కొన్ని రోజులుగా రాజకీయాలతో బిజీ అయిపోయిన పవన్ కళ్యాణ్.. శనివారం హరిహర వీరమల్లు సెట్స్‌లో మళ్లీ అడుగుపెట్టినట్లు చిత్ర యూనిట్ తెలిపింది. పీరియాడికల్ బ్యాక్ డ్రాప్‌తో వస్తున్న ఈ సినిమాపై ఇప్పటికే అంచనాలు పతాక స్థాయికి చేరుకోగా.. చివరి షెడ్యూల్ ఈరోజు నుంచి ప్రారంభమైంది.
ఏపీలో సార్వత్రిక ఎన్నికల ప్రచారం.. ఆ తర్వాత డిప్యూటీ సీఎంగా బాధ్యతలు చేపట్టిన పవన్ కళ్యాణ్ ఈ మూవీ కోసం ఈ ఏడాది తగినంత సమయాన్ని కేటాయించలేకపోయారు. అయితే.. ఇటీవల విజయవాడ పరిసరాల్లో ఈ మూవీకి సంబంధించిన కీలక సన్నివేశాల్ని తెరకెక్కించిన చిత్ర బృందం.. విడుదలకి ఇక నాలుగు నెలలే సమయం ఉండటంతో శరవేగంగా షూటింగ్‌ను పూర్తి చేయాలని భావిస్తోంది.
మధ్యలోనే తప్పుకున్న క్రిష్
వాస్తవానికి హరిహర వీరమల్లుకి తొలుత క్రిష్ జాగర్లమూడి దర్శకుడిగా పనిచేశారు. కానీ.. స్పష్టమైన కారణాలు తెలియదుగానీ.. ఈ మూవీ నుంచి మధ్యలోనే క్రిష్ తప్పుకున్నారు. దాంతో.. దర్శకత్వ బాధ్యతలు జ్యోతి కృష్ణ చేతికి వచ్చాయి. కిరణ్ అబ్బవరం నటించిన రూల్స్ రంజన్ సినిమాకి ఈ జ్యోతి కృష్ణ దర్శకత్వం వహించారు.
వచ్చే ఏడాది మార్చి 28న హరిహర వీరమల్లు సినిమా రిలీజ్‌ కాబోతున్నట్లు ఇప్పటికే చిత్ర యూనిట్ ప్రకటించేసింది. ఈ మూవీలో పవన్ కళ్యాణ్ సరసన నిధి అగర్వాల్‌ నటిస్తుండగా..బాలీవుడ్ నటుడు అర్జున్ రాంపాల్ నెగటివ్ రోల్ చేస్తున్నారు. అలానే బాబీ డియోల్, నర్గీస్ ఫక్రీ కూడా కీలక పాత్రలు పోషిస్తున్నారు.
రెండు పార్ట్‌లుగా హరిహర వీరమల్లు
హరిహర వీరమల్లుని రెండు పార్ట్‌లుగా ప్రేక్షకుల ముందుకు తీసుకురాబోతున్నారు. పార్ట్-1కి ‘హరిహర వీరమల్లు పార్ట్ 1: స్వార్డ్ వర్సెస్ స్పిరిట్’ అని పేరు పెట్టారు. పవన్ కళ్యాణ్ ఈరోజు సెట్‌లోకి వచ్చినట్లు అభిమానులకి తెలియజేసిన చిత్ర బృందం.. ‘ధర్మ పోరాటంలో ఆఖరి అధ్యాయం మొదలు’ అంటూ రాసుకొచ్చి.. పవన్ కళ్యాణ్ స్టిల్‌ను షేర్ చేసింది.
