ఓటీటీల్లోకి మేలో రానున్న 5 ముఖ్యమైన తెలుగు సినిమాలు.. ప్లాఫ్ చిత్రాలే ఎక్కువ!

మేలో వివిధ ఓటీటీ ప్లాట్‍ఫామ్‍ల్లో మరిన్ని తెలుగు చిత్రాలు రానున్నాయి. ఏప్రిల్‍లో థియేటర్లలోకి వచ్చి నిరాశపరిచిన కొన్ని సినిమాలు కూడా ఎంట్రీ ఇవ్వనున్నాయి. జాక్, ఓదెల 2తో పాటు మరిన్ని సినిమాలు స్ట్రీమింగ్‍కు ఎంట్రీ ఇవ్వనున్నాయి. మేలో ఓటీటీల్లోకి రానున్న 5 ముఖ్యమైన తెలుగు చిత్రాలు ఏవో ఇక్కడ తెలుసుకోండి.

రాబిన్‍హుడ్

నితిన్, శ్రీలీల హీరోహీరోయిన్లుగా నటించిన రాబిన్‍హుడ్ సినిమా మార్చి 28వ తేదీన థియేటర్లలో విడుదలైంది. వెంకీ కుడుముల దర్శకత్వంలో మంచి అంచనాలతో వచ్చిన ఈ చిత్రం మిక్స్డ్ టాక్ తెచ్చుకొని ప్లాఫ్ అయింది. ఈ సినిమా డిజిటల్ స్ట్రీమింగ్ హక్కులు జీ5 ఓటీటీ ప్లాట్‍ఫామ్ దగ్గర ఉన్నాయి. మే తొలివారంలోనే ఈ సినిమా జీ5లో స్ట్రీమింగ్‍కు రానుంది. డేట్‍ను త్వరలోనే జీ5 వెల్లడించనుంది. మే 2వ తేదీ లేకపోతే మే 5న జీ ఓటీటీలో రాబిన్‍హుడ్ స్ట్రీమింగ్‍కు వస్తుందనే అంచనాలు ఉన్నాయి. ఈ మూవీలో ఆస్ట్రేలియన్ క్రికెటర్ డేవిడ్ వార్నర్ క్యామియో రోల్ చేశారు.

జాక్

స్టార్ బాయ్ సిద్ధు జొన్నలగడ్డ హీరోగా నటించిన జాక్ సినిమా కూాడా బాక్సాఫీస్ వద్ద తీవ్రంగా నిరాశపరిచింది. బొమ్మరిల్లు భాస్కర్ దర్శకత్వం వహించిన ఈ స్పై యాక్షన్ మూవీ ఏప్రిల్ 10న థియేటర్లలోకి వచ్చింది. ఈ సినిమా స్ట్రీమింగ్ రైట్స్ నెట్‍ఫ్లిక్స్ సొంతం చేసుకుంది. మే తొలివారం లేకపోతే రెండో వారం ఈ చిత్రం నెట్‍ఫ్లిక్స్ ఓటీటీలోకి వస్తుంది. జాక్ చిత్రంలో సిద్ధుకు జోడీగా హీరోయిన్‍గా నటించారు వైష్ణవి చైతన్య.

ఓదెల 2

స్టార్ హీరోయిన్ తమన్నా భాటియా లీడ్ రోల్ చేసిన ఓదెల 2 చాలా హైప్‍తో విడుదలై బాక్సాఫీస్ వద్ద చతికిలపడింది. ఈ చిత్రం ఏప్రిల్ 17న విడుదలైంది. సంపత్ నంది కథ, స్క్రీన్‍ప్లే, దర్శకత్వం పర్యవేక్షణ చేసిన ఈ సూపర్ నేచురల్ థ్రిల్లర్ చిత్రానికి అశోక్ తేజ డైరెక్షన్ చేశారు. ఈ సీక్వెల్ సినిమా ప్లాఫ్‍గా నిలిచింది. ఓదెల 2 మూవీ అమెజాన్ ప్రైమ్ వీడియో ఓటీటీలో మేలోనే స్ట్రీమింగ్‍కు వస్తుంది. డేట్ ఖరారు కావాల్సి ఉంది.

అర్జున్ సన్నాఫ్ వైజయంతి

భారీ అంచనాలతో వచ్చిన అర్జున్ సన్నాఫ్ వైజయంతి చిత్రం కూడా కమర్షియల్‍గా డిజాస్టర్ అయింది. కల్యాణ్ రామ్ హీరోగా నటించిన ఈ సినిమా ఏప్రిల్ 18న థియేటర్లలో విడుదలైంది. సీనియర్ నటి విజయశాంతి కూడా ఈ చిత్రంలో మరో లీడ్ రోల్ చేశారు. యాక్షన్, తల్లీకొడుకుల సెంటిమెంట్‍తో సాగే ఈ సినిమాకు ప్రదీప్ చిలుకూరి దర్శకత్వం వహించారు. అర్జున్ సన్నాఫ్ వైజయంతి చిత్రం కూడా మేలోనే ఓటీటీలోకి వచ్చే అవకాశాలు అధికంగా ఉన్నాయి. అయితే, ఇంకా సినిమా స్ట్రీమింగ్ హక్కులను ఏ ఓటీటీ తీసుకుందో సమాచారం బయటికి రాలేదు. త్వరలోనే సమాచారం వెల్లడి కావొచ్చు.

దిల్‍రూబా

కిరణ్ అబ్బవరం హీరోగా నటించిన దిల్‍రూబా చిత్రం థియేటర్లలో డిజాస్టర్ అయింది. ఈ రొమాంటిక్ యాక్షన్ మూవీ ఈ ఏడాది మార్చి 14న విడుదలైంది. ఈ సినిమాకు విశ్వ కరణ్ దర్శకత్వం వహించారు. ఈ మూవీ స్ట్రీమింగ్ హక్కులు ఆహా ఓటీటీ దగ్గర ఉన్నట్టు సమాచారం. మేలో ఈ చిత్రం స్ట్రీమింగ్‍‍కు వచ్చే అవకాశాలు ఎక్కువగా ఉన్నాయి.