OTT Romantic Comedy: ఓటీటీలోకి మూడున్నర నెలల తర్వాత వచ్చిన కన్నడ సూపర్ హిట్ రొమాంటిక్ కామెడీ మూవీ

OTT Romantic Comedy: థియేటర్లలో రిలీజైన నెల, రెండు నెలలలోపే ఓటీటీలోకి వచ్చేస్తున్నాయి చాలా సినిమాలు. కానీ చాలా అరుదుగా థియేటర్లలో వంద రోజులు పూర్తి చేసుకున్న తర్వాతగానీ వచ్చే సినిమాలు ఉండవు. ఇప్పుడు శుక్రవారం (నవంబర్ 29) నుంచి ఓటీటీలోకి వచ్చిన కన్నడ రొమాంటిక్ కామెడీ మూవీ అలాంటిదే. ఈ సినిమా పేరు కృష్ణం ప్రణయ సఖి.

కృష్ణం ప్రణయ సఖి ఓటీటీ స్ట్రీమింగ్

కన్నడ సినిమా ఇండస్ట్రీలో గోల్డెన్ స్టార్ గా పేరుగాంచిన గణేష్ నటించిన మూవీ ఈ కృష్ణం ప్రణయ సఖి. ఈ సినిమా ఆగస్ట్ 15న థియేటర్లలో రిలీజ్ కాగా.. ఇప్పుడు 100 రోజుల తర్వాత సన్ నెక్ట్స్ (Sun NXT) ఓటీటీలోకి స్ట్రీమింగ్ కు వచ్చింది. దండుపాళ్య మూవీ సిరీస్ తీసిన శ్రీనివాస రాజు ఈ సినిమాను డైరెక్ట్ చేశాడు. అలాంటి దర్శకుడు ఓ రొమాంటిక్ కామెడీ సినిమా చేయడం నిజంగా విశేషమే.

ఈ కృష్ణం ప్రణయ సఖి మూవీ బాక్సాఫీస్ దగ్గర రూ.25 కోట్లు వసూలు చేసి మంచి సక్సెస్ సాధించింది. ఈ సినిమా రిలీజైన సమయంలో కన్నడ ఇండస్ట్రీ ఓ మంచి హిట్ కోసం ఎదురు చూస్తుండగా.. ఈ ఫ్యామిలీ ఎంటర్టైనర్ ను ప్రేక్షకులు బాగా ఆదరించారు.

ఈ సినిమా ఓటీటీ హక్కులను సొంతం చేసుకున్న సన్ నెక్ట్స్ కొన్ని రోజుల కిందటే స్ట్రీమింగ్ తేదీని అనౌన్స్ చేసింది. థియేటర్లలో 100 రోజులు పూర్తి చేసుకున్న వెంటనే ఓటీటీలోకి తీసుకొచ్చారు.

కృష్ణం ప్రణయ సఖి మూవీ స్టోరీ ఇదీ..

కృష్ణం ప్రణయ సఖి మూవీ లీడ్ రోల్స్ పోషించిన గణేష్, మాళవికా నాయర్ చుట్టూ తిరుగుతుంది. ఈ మూవీలో కృష్ణ పాత్రలో గణేష్, ప్రణయ పాత్రలో మాళవిక నటించారు. ఈ ఇద్దరి లవ్ స్టోరీతోపాటు వాళ్ల ప్రేమ ఎదుర్కొనే సవాళ్ల చుట్టూ తిరిగే కథ ఇది. ఆమెతో ప్రేమలో పడిన తర్వాత అమ్నేసియా బారిన పడతాడు కృష్ణ.

దీంతో ఆమెను అతడు గుర్తు పట్టడు. ఆ తర్వాత ఏం జరిగింది? వీళ్ల లవ్ స్టోరీ పెళ్లి వరకూ వెళ్లిందా లేదా అన్నది ఈ కృష్ణం ప్రణయ సఖి సినిమాలో చూడొచ్చు. ఈ సినిమాలోని పాటలకు ప్రేక్షకుల నుంచి మంచి రెస్పాన్స్ వచ్చింది. అర్జున్ జన్యా మూవీకి మ్యూజిక్ అందించాడు. ఈ సినిమాను సన్ నెక్ట్స్ ఓటీటీలో చూడొచ్చు.