OTT Malayalam Thriller Movie: తెలుగులోనూ ఓటీటీలోకి వస్తున్న మలయాళం థ్రిల్లర్ మూవీ.. స్ట్రీమింగ్ డేట్ ఇదే

OTT Malayalam Thriller Movie: మలయాళం సినిమాలు, అందులోనూ సైకలాజికల్ థ్రిల్లర్ మూవీస్ ఇష్టపడే వారికి గుడ్ న్యూస్. ఆ ఇండస్ట్రీ నుంచి ఇప్పుడు ఆ జానర్ లో మూవీ ఒకటి ఓటీటీలోకి రానుంది. మలయాళంతోపాటు తెలుగు, తమిళం, కన్నడ, హిందీ భాషల్లో వస్తున్న ఆ సినిమా పేరు లెవల్ క్రాస్. సుమారు మూడు నెలల తర్వాత ఈ మూవీ డిజిటల్ ప్రీమియర్ కు సిద్ధమైంది.

లెవల్ క్రాస్ ఓటీటీ రిలీజ్ డేట్

మలయాళ సైకలాజికల్ థ్రిల్లర్ మూవీ లెవల్ క్రాస్. జులై 26న థియేటర్లలో రిలీజైంది. ఇప్పుడీ సినిమా వచ్చే ఆదివారం (అక్టోబర్ 13) నుంచి అమెజాన్ ప్రైమ్ వీడియోలో స్ట్రీమింగ్ కానుంది. ఆసిఫ్ అలీ, అమలా పాల్, షరాఫుదీన్ లాంటి వాళ్లు నటించిన ఈ సినిమాకు అర్ఫాజ్ ఆయుబ్ దర్శకత్వం వహించాడు.

మలయాళ స్టార్ నటుడు ఆసిఫ్ అలీ నటించిన సినిమా కావడంతో లెవల్ క్రాస్ పై ఓటీటీ ప్రేక్షకులకు భారీ అంచనాలు ఉన్నాయి. ఆసిఫ్ అలీ నటించిన తలవన్, అడియోస్ అమిగో మూవీస్ ఇప్పటికే ఓటీటీలో స్ట్రీమింగ్ అవుతుండగా.. ఇప్పుడీ థ్రిల్లర్ మూవీ లెవల్ క్రాస్ కూడా వచ్చేస్తోంది.

ఏంటీ లెవల్ క్రాస్ మూవీ?

లెవల్ క్రాస్ మూవీ రఘు అనే ఓ రైల్వే గేట్ కీపర్, అతని జీవితంలోకి అనుకోకుండా వచ్చిన ఓ అమ్మాయి చుట్టూ తిరుగుతుంది. ఏళ్ల పాటు అదే గేటు దగ్గర ఒంటరిగా గడిపిన రఘుకి ఓ రైల్లో నుంచి దిగిన అమ్మాయి పరిచయం అవుతుంది. ఆ తర్వాత ఆ ఇద్దరి మనసులు కలుస్తాయి.

అయితే చైతాలీ(అమలా పాల్) అనే ఆ అమ్మాయికి అప్పటికే పెళ్లవడం, ఆమె భర్త వీళ్ల జీవితాల్లోకి రావడంతో కథ మలుపు తిరుగుతుంది. ఊహించని ట్విస్టులతోపాటు భయపెట్టే నిజాలు ఒక్కొక్కటిగా బయటకు వస్తాయి. గ్రిప్పింగ్ స్క్రీన్ ప్లేతో ఈ లెవల్ క్రాస్ మూవీకి ప్రేక్షకుల నుంచి పాజిటివ్ రివ్యూలు వచ్చాయి.

సైకలాజికల్ థ్రిల్లర్ జానర్ మూవీస్ ఇష్టపడే వారికి ఈ లెవల్ క్రాస్ మూవీ బాగా నచ్చుతుంది. సినిమాలోని ట్విస్టులు మంచి థ్రిల్ ను పంచుతాయి. డైరెక్టర్ అర్ఫాజ్ ఆయుబ్ ఈ మూవీని ఎక్కడా బోర్ కొట్టకుండా చాలా జాగ్రత్తగా మలిచిన తీరు మూవీలో కనిపిస్తుంది.

థియేటర్లలో మిస్ అయిన వారు ఇప్పుడీ సినిమాను ప్రైమ్ వీడియోలో చూసే అవకాశం దక్కనుంది. మలయాళంతోపాటు మరో నాలుగు భాషల్లోనూ లెవల్ క్రాస్ మూవీ రానుండటంతో ఆయా భాషల ప్రేక్షకులు ఈ సినిమాను హాయిగా చూసేయొచ్చు.