Spy OTT Platform: నిఖిల్ స్పై ఓటీటీలోకి వ‌చ్చేది అప్పుడే - డిజిట‌ల్ రైట్స్ ఎన్ని కోట్ల‌కు అమ్ముడుపోయాయంటే?

Spy OTT Platform: నిఖిల్ (Nikhil) హీరోగా న‌టించిన స్పై మూవీ గురువారం పాన్ ఇండియా లెవెల్‌లో రిలీజైంది. కార్తికేయ -2 త‌ర్వాత నిఖిల్ నుంచి వ‌చ్చిన ఈ సినిమాపై భారీగా అంచ‌నాలు ఏర్ప‌డ్డాయి. కానీ క‌థ‌లోని లోపాల కార‌ణంగా ఆ ఎక్స్‌పెక్టేష‌న్స్‌ను ఈ సినిమా అందుకోలేక‌పోయింది.

కాగా ఈ సినిమా ఓటీటీ ప్లాట్‌ఫామ్‌పై క్లారిటీ వ‌చ్చేసింది. ఈ సినిమా అమెజాన్ ప్రైమ్ ఓటీటీలో రిలీజ్‌కానుంది. జూలై ఎండింగ్ లేదా ఆగ‌స్ట్ ఫ‌స్ట్‌వీక్‌లో స్పై ఓటీటీ ప్రేక్షకుల ముందుకు వచ్చే అవ‌కాశం ఉన్న‌ట్లు స‌మాచారం. కార్తికేయ -2 తో నిఖిల్‌కు పాన్ ఇండియ‌న్ లెవెల్‌లో మార్కెట్ ఏర్ప‌డ‌టంతో స్పై డిజిట‌ల్, శాటిలైట్ రైట్స్ క‌లిపి దాదాపు న‌ల‌భై కోట్లకుపైనే అమ్ముడుపోయిన‌ట్లు స‌మాచారం నిఖిల్ కెరీర్‌లో ఇదే హ‌య్యెస్ట్ అని ప్ర‌చారం జ‌రుగుతోంది.

తెలుగుతో పాటు మిగిలిన భాష‌ల్లో కూడా అమెజాన్ ప్రైమ్‌లోనే(Amazon Prime) ఈ మూవీ రిలీజ్ కానుంది. కాగా స్పై సినిమాతో ఎడిట‌ర్ గ్యారీ బీహెచ్ డైరెక్ట‌ర్‌గా టాలీవుడ్‌లోకి ఎంట్రీ ఇచ్చాడు. ఐశ్వ‌ర్య‌మీన‌న్ హీరోయిన్‌గా న‌టించింది. ఆర్య‌న్ రాజేష్ కీల‌క పాత్ర‌ను పోషించ‌గా...రానా ద‌గ్గుబాటి అతిథి పాత్ర‌లో క‌నిపించాడు.

ఈ సినిమాలో జై అనే స్పై పాత్ర‌లో నిఖిల్ క‌నిపించాడు. త‌న సోద‌రుడి మ‌ర‌ణానికి సంబంధించిన మిస్ట‌రీతో పాటు దేశంలో కుట్ర‌ల‌కు ప్లాన్ చేస్తోన్న ఓ టెర్ర‌రిస్ట్‌ను రా ఏజెంట్ ఎలా ప‌ట్టుకున్నాడ‌న్న‌దే ఈ సినిమా క‌థ‌.

పాయింట్ బాగున్నా ఎగ్జైటింగ్‌గా చెప్ప‌డంలో ద‌ర్శ‌కుడు త‌డ‌బ‌డ‌టంతో తొలిరోజు ఈ సినిమా నెగెటివ్ టాక్‌ను మూట‌గ‌ట్టుకుంది. అయితే అడ్వాన్స్ బుకింగ్స్ మాత్రం భారీగానే జ‌ర‌గ‌డంతో టాక్‌తో సంబంధం లేకుండా ఫస్ట్ డే ఈ సినిమా నిఖిల్ కెరీర్‌లో హ‌య్యెస్ట్‌ ఓపెనింగ్స్ రాబ‌ట్టే అవ‌కాశం ఉన్న‌ట్లు ట్రేడ్ వ‌ర్గాలు చెబుతోన్నాయి.