నెట్‌ఫ్లిక్స్ కామెడీ షోకి వస్తున్న టీమిండియా స్టార్ క్రికెటర్లు.. హెడ్ కోచ్ గంభీర్ కూడా..
నెట్‌ఫ్లిక్స్ ఓటీటీలోకి మూడో సీజన్ తో రాబోతున్న కామెడీ షో ది గ్రేట్ ఇండియన్ కపిల్ షోకి టీమిండియా క్రికెటర్లు రాబోతున్నారు. హెడ్ కోచ్ గౌతమ్ గంభీర్ తోపాటు యుజ్వేంద్ర చహల్, రిషబ్ పంత్, అభిషేక్ శర్మ రావడం విశేషం.
నెట్‌ఫ్లిక్స్ తన సూపర్ హిట్ కామెడీ షో ది గ్రేట్ ఇండియన్ కపిల్ షో మూడో సీజన్ ను గట్టిగానే ప్లాన్ చేస్తోంది. ప్రముఖ కమెడియన్, నటుడు కపిల్ శర్మ తన బృందంతో కలిసి 'ది గ్రేట్ ఇండియన్ కపిల్ షో' సీజన్ 3తో ప్రేక్షకులను అలరించడానికి సిద్ధంగా ఉన్నాడు.
ఈ మధ్యే నవజ్యోత్ సింగ్ సిద్ధూ తిరిగి షోలోకి వస్తున్నట్లు ప్రకటించారు. అలాగే, సల్మాన్ ఖాన్ అతిథులలో ఒకరిగా వస్తారని వెల్లడించారు. ఇప్పుడు క్రికెటర్ యుజ్వేంద్ర చహల్ కూడా తాను షోలో కనిపించనున్నట్లు ధృవీకరించాడు.
టీమిండియా ప్లేయర్స్ అతిథులుగా..
క్రికెటర్ యుజ్వేంద్ర చహల్ సోమవారం (జూన్ 9) తన ఇన్‌స్టాగ్రామ్‌లో 'ది గ్రేట్ ఇండియన్ కపిల్ షో' సెట్స్‌లో నవజ్యోత్ సింగ్ సిద్ధూ, కపిల్ శర్మలతో కలిసి పోజులిచ్చిన చిత్రాలను పంచుకున్నాడు. ఒక ఫొటోలో టీమిండియా హెడ్ కోచ్ గౌతమ్ గంభీర్, క్రికెటర్లు రిషబ్ పంత్, అభిషేక్ శర్మ కూడా చహల్, సిద్ధూలతో పాటు కనిపించారు. ఈ ఫొటోలను పంచుకుంటూ "@The Kapil Sharma Show" అని చహల్ రాశాడు.
'ది గ్రేట్ ఇండియన్ కపిల్ షో'లో క్రికెటర్లు అతిథులుగా రావడం చూసి అభిమానులు ఎంతో ఉత్సాహంగా ఉన్నారు. ఒక అభిమాని "మేము GTA 5 కంటే ముందు 'ది కపిల్ శర్మ షో'లో గౌతమ్ గంభీర్‌ను చూస్తున్నాం" అని వ్యాఖ్యానించారు. మరొకరు "గౌతమ్ గంభీర్, యుజ్వేంద్ర చహల్‌ని చూడండి" అని రాశారు. ఇంకో అభిమాని "ఈ ఎపిసోడ్ చాలా సరదాగా ఉంటుంది" అని అన్నారు. "ఇది ఐకానిక్ అవుతుంది" అని మరొక కామెంట్ కనిపించింది. కొందరు అభిమానులు శ్రేయస్ అయ్యర్‌ను మిస్ అవుతూ.. "సర్పంచ్ సాబ్ కహా హై?" అని అడిగారు.
సల్మాన్ ఖాన్ మొదటి అతిథి
ఇంతకుముందు నవజ్యోత్ సింగ్ సిద్ధూ, సల్మాన్ ఖాన్‌తో కలిసి ఉన్న కొన్ని తెరవెనుక ఫొటోలను కపిల్ శర్మ పంచుకున్నాడు. కొత్త సీజన్‌కు సల్మాన్ ఖాన్ మొదటి అతిథి అని అతడు ధృవీకరించాడు. ఆ ఫొటోలలో, సల్మాన్ 'బీయింగ్ హ్యూమన్' టీ-షర్ట్, ఫేడెడ్ డెనిమ్స్ ధరించి కనిపించాడు.
కపిల్ శర్మ హోస్ట్ చేస్తున్న ఈ కామెడీ టాక్ షోలో కృష్ణ అభిషేక్, సునీల్ గ్రోవర్, కికు శారద, అర్చన పూరణ్ సింగ్ కూడా కనిపిస్తారు. మొదటి సీజన్‌లో రణబీర్ కపూర్, రోహిత్ శర్మ, శ్రేయస్ అయ్యర్, ఆమిర్ ఖాన్, సన్నీ డియోల్ వంటి అతిథులు పాల్గొన్నారు. రెండో సీజన్‌లో ఆలియా భట్, కరణ్ జోహార్, సైఫ్ అలీ ఖాన్, జూనియర్ ఎన్టీఆర్, కరీనా కపూర్, కరిష్మా కపూర్ వంటివారు వచ్చారు. మూడో సీజన్ జూన్ 21న నెట్‌ఫ్లిక్స్‌లో ప్రసారం కానుంది.
సంబంధిత కథనం