Nani Dasara Promotions: నార్త్‌పై ఫోకస్ పెట్టిన నాని.. ముంబయిలో అడుగుపెట్టిన నేచురల్ స్టార్

Nani Dasara Promotions: టాలీవుడ్‌లో నేచురల్ స్టార్ గుర్తింపు తెచ్చుకున్న నాని.. పాన్ ఇండియా హీరో కావాలనుకుంటున్నాడు. తన తొలి పాన్ ఇండియా చిత్రం దసరా ప్రమోషన్లను మొదలుపెట్టేశాడు. మార్చి 30న ప్రేక్షకుల ముందుకు రానున్న ఈ సినిమా కోసం ప్రమోషన్లను వైవిధ్యం చేయనున్నాడు. నాని నటించిన శ్యామ్ సింగరాయ్ కూడా ఇతర భాషల్లో విడుదలైనప్పటికీ సినిమాకు పెద్దగా ప్రమోషన్ చేయకపోవడంతో మూవీ ఎక్కువ మందిని రీచ్ కాలేదు. కానీ దసరా విషయంలో ఆ తప్పు జరగకూడదని నాని భావిస్తున్నాడు. అందుకే నార్త్‌పై దృష్టి పెట్టాడు. ఇందుకోసం ముంబయికి వెళ్లాడు.

మంగళవారం నుంచే ముంబయిలో ప్రమోషన్లు మొదలుపెట్టాడు నాని. కేవలం నార్త్‌లోనే దసరా మూవీ ప్రమోషన్లను 10 రోజుల పాటు నిర్వహించనున్నాడు. ఇందుకోసం వివిధ కార్యకలాపాల్లో పాలుపంచుకోనున్నాడు. మంగళవారం నాడు హోలీ సంబరాల్లో భాగంగా డంక్ ఫెస్ట్ ఇండియాలో పాల్గొననున్నాడు.

నాని తొలిసారిగా ముంబయిలో పబ్లిక్ అప్పియరెన్స్ ఇవ్వబోతున్నాడు. దసరా సినిమాను ప్రమోషన్ కోసం కాలేజీలు, ఇతర ప్రదేశాలను సందర్శించనున్నాడు. నానితో పాటు తన టీమ్ మెంబర్లు ఇద్దరు, ముగ్గురు కూడా పాల్గొననున్నారు. ముంబయిలోని ప్రమోషనల్ ఈవెంట్లలో వీరు బాగం కానున్నారు. ఇంటర్వ్యూలు, ఇతర కార్యక్రమాలకు హాజరుకానున్నారు.

దసరా సినిమా నుంచి మూడో పాటు బుధవారం విడుదల కానుంది. హోలీ సందర్భంగా మార్చి 8న మేకర్స్ విడుదల చేయనున్నారు. ఇప్పటికే విడుదలైన రెండు పాటలు సూపర్ హిట్ నిలవడమే కాకుండా సోషల్ మీడియాలో వైరల్ అయ్యాయి. టీజర్‌పై కూడా మంచి స్పందన వచ్చింది. నాని ఇటీవల మాట్లాడుతూ.. తను నటించిన దసరా మూవీ బాహుబలి, ఆర్ఆర్ఆర్, కేజీఎఫ్ సరసన నిలుస్తుందని తెలిపాడు. నార్త్ బెల్ట్‌లో అదిరిపోయే బిజినెస్ చేస్తుందని స్పష్టం చేశాడు.

శ్రీకాంత్ ఓదెల దర్శకత్వం వహించిన దసరా చిత్రం పీరియాడికల్ యాక్షన్ జోనర్‌లో తెరకెక్కింది. సుధాకర్ చెరుకూరి నిర్మాతగా వ్యవహరిస్తున్నారు. నేచురల్ స్టార్ నాని సరసన కీర్తి సురేష్ హీరోయిన్‌గా చేస్తోంది. ఈ చిత్రంలో సముద్రఖని కీలక పాత్ర పోషించారు. భారీ బడ్జెట్‌తో రూపొందుతున్న ఈ సినిమా పాన్ఇండియా స్థాయిలో విడుదల కానుంది. ఈ చిత్రాన్ని 2023 మార్చి 30న ప్రపంచ వ్యాప్తంగా ప్రేక్షకుల ముందుకు తీసుకురావాలని మేకర్స్ సన్నాహాలు చేస్తున్నారు.