బాక్సాఫీస్ వ‌ద్ద నాని మాస్ రాంపేజ్ - ఆరు రోజుల్లోనే హిట్ 3 బ్రేక్ ఈవెన్ - వ‌రుస‌గా నాలుగో బ్లాక్‌బ‌స్ట‌ర్‌

నాని హిట్ 3 మూవీ ఆరు రోజుల్లోనే బ్రేక్ ఈవెన్‌ను సాధించింది. యాభై కోట్ల టార్గెట్‌తో రిలీజైన ఈ యాక్ష‌న్ థ్రిల్ల‌ర్ మూవీ మంగ‌ళ‌వారం నాటితో లాభాల్లోకి అడుగుపెట్టింది. ఏడాది అతి త‌క్కువ టైమ్‌లో బ్రేక్ ఈవెన్‌ను సాధించిన‌ తెలుగు సినిమాల్లో ఒక‌టిగా రికార్డ్ క్రియేట్ చేసింది.

ఆరు రోజుల్లో...

వర‌ల్డ్ వైడ్‌గా ఆరు రోజుల్లో ఈ మూవీ 110 కోట్ల‌కుపైగా గ్రాస్‌, 58 కోట్ల వ‌ర‌కు షేర్ క‌లెక్ష‌న్స్ రాబ‌ట్టిన‌ట్లు ట్రేడ్ వ‌ర్గాలు చెబుతోన్నాయి. హిట్ 3 మూవీ 49 కోట్ల వ‌ర‌కు ప్రీ రిలీజ్ బిజినెస్ చేసింది. యాభై కోట్ల టార్గెట్‌తో ప్రేక్ష‌కుల ముందుకొచ్చింది. కేవ‌లం ఆరు రోజుల్లోనే యాభై కోట్ల‌ మైలురాయిని ట‌చ్ చేసింది. మంగ‌ళ‌వారం రోజు ఈ మూవీ రెండు కోట్ల డెబ్భై ఐదు ల‌క్ష‌ల‌కుపైనే వ‌సూళ్ల‌ను ద‌క్కించుకున్న‌ట్లు ట్రేడ్ వ‌ర్గాలు పేర్కొంటున్నాయి.

నాలుగో హిట్‌...

హిట్ 3 మూవీతో వ‌రుస‌గా నాలుగో హిట్‌ను త‌న ఖాతాలో వేసుకున్నాడు నాని. హిట్ 3 కంటే ముందు నాని న‌టించిన ద‌స‌రా, హాయ్ నాన్న‌, స‌రిపోదా శ‌నివారం సినిమాలు బ్లాక్‌బ‌స్ట‌ర్స్‌గా నిలిచాయి. ఈ వారం పెద్ద సినిమాలేవి పోటీలో లేక‌పోవ‌డం హిట్ 3కి క‌లిసివ‌చ్చే అవ‌కాశం క‌నిపిస్తోంది. వంద కోట్ల షేర్ మార్కును ఈ మూవీ ట‌చ్ చేసే అవ‌కాశం ఉంద‌ని ట్రేడ్ వ‌ర్గాలు చెబుతోన్నాయి. ఓవ‌ర్‌సీస్‌లో ఈ మూవీ బాక్సాఫీస్‌ను షేక్ చేస్తోంది. ఒక్క నార్త్ అమెరికాలోనే రెండు మిలియ‌న్ల మార్కును దాటేసిన‌ట్లు స‌మాచారం. ఈ ఏడాది సంక్రాంతికి వ‌స్తున్నాం, తండేల్‌, కోర్ట్‌, మ్యాడ్ స్క్వేర్ త‌ర్వాత హ‌య్యెస్ట్ క‌లెక్ష‌న్స్ రాబ‌ట్టిన సినిమాగా నిలిచింది.

శ్రీనిధి శెట్టి హీరోయిన్‌...

హిట్ 3 మూవీకి శైలేష్ కొల‌ను ద‌ర్శ‌క‌త్వం వ‌హించాడు. శ్రీనిధి శెట్టి హీరోయిన్‌గా న‌టించిన ఈ మూవీలో ప్ర‌తీక్ బ‌బ్బ‌ర్‌, స‌ముద్ర‌ఖ‌ని, రావుర‌మేష్ కీల‌క పాత్ర‌ల్లో న‌టించారు. అడివి శేష్‌, కార్తీ అతిథి పాత్ర‌ల్లో మెరిశారు.

హిట్ 3 క‌థ ఇదే...

అర్జున్ స‌ర్కార్ (నాని) ఎస్‌పీగా ఏపీకి ట్రాన్స్‌ఫ‌ర్ మీద వ‌స్తాడు. బ‌దిలీపై వ‌స్తాడు. సొసైటీలో క్రిమిన‌ల్ అనే వాడు క‌నిపించ‌కూడ‌దు అన్న‌ది అత‌డి సిద్ధాంతం.సిన్సియ‌ర్ పోలీస్‌ అయిన అర్జున్ స‌ర్కార్...కొన్ని హ‌త్య‌లు చేస్తూ వ‌ర్ష అనే ఆఫీస‌ర్‌కు దొర‌కిపోతాడు. అస‌లు అర్జున్ ఈ హ‌త్య‌లు ఎందుకు చేస్తున్నాడు? దేశంలో జ‌రుగుతోన్న సీరియ‌ల్ కిల్లింగ్స్‌కు సీటీకే అనే డార్క్ వెబ్‌సైట్‌కు ఉన్న సంబంధ‌మేమిటి?

సీటీకే ఆగ‌డాల‌ను అర్జున్ అడ్డుకున్నాడా? మృదుల‌తో అర్జున్ ప్రేమాయ‌ణం సాఫీగా సాగిందా? అన్న‌దే ఈ మూవీ క‌థ‌.

హిట్ ఫ్రాంచైజ్‌లో మూడో పార్ట్‌గా హిట్ 3 తెర‌కెక్కింది. హిట్ 4లో కార్తీక్ హీరోగా క‌నిపించ‌బోతున్న‌ట్లు ప్ర‌చారం జ‌రుగుతోంది.