Balakrishna: బింబిసార చూసిన బాలయ్య.. ప్రశంసలతో ముంచెత్తిన నటసింహం

నందమూరి కల్యాణ్ రామ్ నటించిన తాజా చిత్రం బింబిసార. ఆగస్టు 5న ప్రపంచ వ్యాప్తంగా ప్రేక్షకుల ముందుకొచ్చిన ఈ సినిమా వసూళ్ల పరంగూ దూసుకెళ్తోంది. వారం దాటినా కానీ ఈ చిత్రం కలెక్షన్ల వర్షాన్ని కురిపిస్తోంది. ఇప్పటికే ఈ సినిమాను చూసిన చాలా మంది సెలబ్రేటీలు మేకర్స్‌ను అభినందిస్తున్నారు. తాజాగా ఈ సినిమాను నందమూరి నటసింహం బాలకృష్ణ వీక్షించారు. అంతేకాకుండా సినిమా బాగుందని చిత్రబృందాన్ని ప్రశంసలతో ముంచెత్తారు.

నటుడు కల్యాణ్‌రామ్‌తో బాలకృష్ణ బింబిసార చిత్రాన్ని వీక్షించారు. సినిమా ఆద్యంతం ఫుల్లుగా ఎంజాయ్ చేసిన ఆయన.. అద్భుతమైన ప్రయత్నానికి టీమ్‌ను అభినందించారు. ప్రస్తుతం ఈ సినిమాను చాలా థియేటర్లలో హౌస్ ఫుల్ బోర్డు కనిపిస్తోంది.

ఆంధ్రప్రదేశ్, తెలంగాణ రాష్ట్రాల్లో బింబిసార ప్రాజెక్టును రూ. 13 కోట్లకు విక్రయించారు మేకర్స్. అయితే ఓవర్సీస్‌తో పాటు తమిళనాడు, కర్ణాటక, నార్త్ ఇండియా తదితర ప్రాంతాల్లో తమ సొంత ప్రొడక్షన్ హౌస్‌ ద్వారా విడుదల చేశారు. దీంతో వసూళ్లపై ఓ లుక్కేస్తే.. తెలుగు రాష్ట్రాల్లో ఈ సినిమా తొలి వారం ముగిసే లోపు రూ.22.50 కోట్లను వసూలు చేసింది. డిస్ట్రిబ్యూటర్లందరూ నాలుగో రోజు నుంచే లాభాలు బాట పట్టారు.

సోషియో ఫాంటసీ జోనర్‌లో తెరకెక్కిన ఈ సినిమాలో కేథరిన్ థెరిసా, సంయుక్త మీనన్ హీరోయిన్లుగా చేశారు. చింతరామన్ భట్ ఈ చిత్రానికి పాటలు అందించగా.. ఎంఎం కీరవాణి నేపథ్య సంగీతాన్ని సమకూర్చారు. ఎన్టీఆర్ ఆర్ట్స్ పతాకంపై కల్యాణ్ రామ్ స్వయంగా నిర్మిస్తూ నటించారు. మల్లిడి వశిష్ట్ ఈ చిత్రానికి దర్శకత్వం వహించారు. వరినా హుస్సేన్, వెన్నెల కిశోర్, శ్రీనివాస్ రెడ్డి, ప్రకాశ్ రాజ్, బ్రహ్మాజీ తదితరులు కీలక పాత్రలు పోషించారు. చోటా కే నాయుడు సినిమాటోగ్రాఫర్‌గా చేశారు. తమ్మి రాజు ఎడిటింగ్ చేశారు.