Naga Chaitanya: నా ఫస్ట్ సినిమాకు మధ్యలోనే థియేటర్ నుంచి వెళ్లారు.. చై కామెంట్స్

టాలీవుడ్ యంగ్ హీరో నాగచైతన్య బాలీవుడ్‌‍లో నటించిన తొలి చిత్రం లాల్ సింగ్ చడ్ఢా. ఆమీర్ ఖాన్ ప్రధాన పాత్రలో వచ్చిన ఈ సినిమాలో నాగచైతన్య కీలక పాత్రను పోషించాడు. ఈ సినిమా ఈ గురువారం ప్రేక్షకుల ముందుకు వచ్చి మిక్స్‌డ్ టాక్ తెచ్చుకుంది. ఇందులో కరీనా కపూర్ హీరోయిన్‌గా చేసింది. ఈ చిత్ర ప్రమోషన్లలో పాల్గొన్న నాగచైతన్య తన తొలి చిత్రం జోష్ గురించి ఆసక్తికర విషయాలు చేశాడు. ఆ సినిమా అనుకున్న స్థాయిలో ప్రేక్షకాదరణ పొందలేదని, అది తన కెరీర్‌లో ఓ మచ్చలాగా మిగిలిందని స్పష్టం చేశాడు.

"నా తొలి సినిమాను థియేటర్లో చూసినప్పుడు చాలా మంది ప్రేక్షకులు మధ్యలోనే బయటకు వెళ్లారు. అప్పుడు నాకు ఏం చేయాలో తెలియక అలాగే ఉండిపోయేవాడిని. అందుకే సినిమా విడుదలయ్యే రోజున తీవ్రంగా ఆందోళన చెందుతాను. సినిమా చూసి ప్రేక్షకులు స్పందించకపోతే ఏంటి? కామెడీ సీన్లకు నవ్వకపోతే ఎలా? ఇలా పలు రకాలుగా ఆలోచిస్తాను" అని నాగచైతన్య స్పష్టం చేశాడు.

నాగచైతన్య నటించిన తొలి చిత్ర జోష్. 2009లో విడుదలైన ఈ సినిమాలో అలనాటి అందాల తార రాధ ముద్దుల తనయ కార్తీక హీరోయిన్. జేడీ చక్రవర్తి విలన్ రోల్‌లో నటించారు. ఈ సినిమాకు వాసు వర్మ దర్శకత్వం వహించగా.. దిల్ రాజు నిర్మాతగా వ్యవహరించారు.

అయితే ఈ చిత్రం విడుదలైన సందర్భమే సరి కాదు. ఎందుకంటే 2009 సెప్టెంబరు 9న ఈ చిత్రాన్ని ప్రేక్షకుల ముందుకు తీసుకురావాలని చిత్రబృందం భావించింది. అయితే అదే సమయంలో అప్పటి ఉమ్మడి ఏపీ ముఖ్యమంత్రి వైఎస్ రాజశేఖర్ రెడ్డి మరణించడంతో రాష్ట్ర వ్యాప్తంగా గందరగోళ పరిస్థితులు తలెత్తాయి. దీంతో సినిమా విడుదలను సెప్టెంబరు 5కు వాయిదా వేసి అప్పడు రిలీజ్ చేశారు. సినిమాపై వాణిజ్యపరంగా ప్రభావం పడుతుందని అప్పటికే ఎంతో మంది ట్రేడ్ పండితులు హెచ్చరించినప్పటికీ మేకర్స్ పట్టించుకోలేదు. దీంతో సినిమా కమర్షియల్‌గానూ ఫ్లాప్ అయింది.

ప్రస్తుతం నాగచైతన్య నటించిన లాల్ సింగ్ చడ్ఢా ఆగస్టు 11న విడుదలై మిక్స్‌‍డ్ టాక్ తెచ్చుకుంది. ఇందులో కరీనా కపూర్, మోనా సింగ్ తదితరులు కీలక పాత్రలు పోషించారు. ఇది కాకుండా అతడు ధూత అనే వెబ్‌సిరీస్‌తో ఓటీటీలో అరంగేట్రం చేశాడు. ఇందులో ప్రాచీ దేశాయ్ కీలక పాత్ర పోషించింది.